Read wanga 1 SAMWELI 26 Bible Online

1 SAMWELI 26 - wanga bible

1 SAMWELI 26

¹Abandu bandi okhurula mushialo shia Zifu betsa nibaboolela Saulo nali Gibea mbu, Daudi yali niyebisile mushikulu shia Hakila khundulo weshitsiimi shia Yuda.

²Saulo natsia bwangu nabasikaari Abaisiraeli ebikhumila bitaru (3,000) abali bamaani, mushitsiimi shia Zifu okhukhaaba Daudi.

³Mana nibakhupa ikambi yabwe khumuhanda khushikulu shia Hakila. Naye Daudi yali nashili mushitsiimi. Ne olwa yahulila mbu, Saulo yali niyetsile okhumukhaaba,

⁴yaruma abarunilisi ne nanyoola toto mbu, Saulo yali niyetsileyo.

⁵Daudi yatsia bwangu ne namanyilisia habundu bwene aha Saulo nende Abuneri omusiani wa Neri omusesia wabasikaaribe bali nibeyalisiye. Saulo yali niyeyalisiye mukambi mukari nabo abelihebe nibamubotokhaane.

⁶Daudi nareeba Ahimeleki Omuhiti nende Abishai omusiani wabwe Yoabu, abali abasiani ba Zeruyia ari, “Niwiina khwinywe babili outsia ninasi mukambi ya Saulo?” Abishai namukalusia ari, “Nisie oulatsia.”

⁷Mushilo eshio Daudi nende Abishai nibenjila mukambi ne nibanyoola Saulo niyeyalisiye mukambi hakari tsindoolo nitsimuyilile, nalio lifumolie nilifumiirwe hasi hamurwekwe. Abuneri nende abelihebe bali nibeyalisiye nibamubotokhaane.

⁸Abishai naboolela Daudi ari, “Nyasaye areere omusukuwo hasi wobunyalibwo inyanga yino. Bulano lekha emufumire lulala lwonyene nelifumolie omwene nimuhandia hasi khwiloba. Shiemufumirakhwo khabili tawe!”

⁹Nebutswa Daudi namukaania ari, “Shiolamusaalisiakhwo tawe! Okhuula OMWAMI Nyasaye alahelesia omundu yesi yesi ousaalisia omuruchiwe omulobole eshinyasio.”

¹⁰Daudi natsiililila okhuboola ari, “Muliira elia OMWAMI Nyasaye, emanyile mbu, OMWAMI Nyasaye mwene aleera Saulo olwa ebisebie biakhoole shinga kalachikha noho okhwirwa mwihe.

¹¹OMWAMI Nyasaye yambeele tsimbabasi khulwa okhuteema mbu, esaalisie owa yaahula mbu abe omuruchi! Lekha khubukule lifumolie nende eshimuka shiamaatsi mana khutsie.”

¹²Daudi nabukula lifumo lia Saulo nende eshimuka shia Saulo eshialimwo amaatsi, ebiali nibireerwe hamurwe kwa Saulo, mana ye nende Abishai nibatsia. Abulaho omundu yesi yesi owalola kata okhumanyisia akekholekha noho kata okhusisimukha okhurula mundoola tawe. Tsindoolo tsiali nitsibayilile muno boosi, shichila OMWAMI Nyasaye yali nabareereere tsindoolo tsinyinji boosi.

¹³Daudi niyambukha natsia injelekha welibanda elo khubutenje bweshikulu, habundu halayi ehale.

¹⁴Mana nayiibila abelihe lia Saulo nende Abuneri naboola ari, “Abuneri! Munyala okhumbulila noho?” Abuneri nareeba ari, “Ouyiibanga nabuusia omuruchi oyo niwiina?”

¹⁵Daudi nakalusia namureeba ari, “Abuneri, shiniwe omundu omukhongo mu Isiraeli noho? Nishiina eshichila nolaterera omwamiwo ouli omuruchi? Omundu undi yetsile mukambi bulano okhwira omwamiwo.

¹⁶Abuneri, okhayilwe okhukhola omulimokwo! Nditsuba muliira elia OMWAMI Nyasaye ouliho mwoyo mbu, mwesi mukwanile okhufwa, shichila shimuterereere omwami wenywe, owa OMWAMI Nyasaye yaahula okhuba omuruchi tawe. Lole! Lifumo liomuruchi lili heena? Eshimuka shiamaatsi shibeele hamurwekwe shili heena?”

¹⁷Saulo yamanyilisia omwoyo kwa Daudi ne nareeba ari, “Toto mwene omwoyo okwo nokwomusiani wanje Daudi?” Daudi namukalusia ari, “Omwami, nisie.”

¹⁸Daudi natsiililila okhureeba ari, “OMWAMI Nyasaye, mbushiina niunondachila isie omusumbawo? Nishiina eshia ekholile? Ni libi shiina elia isie ekholile?

¹⁹Khulweshio, bulano omwami, hulilakhwo aka emboola. Naba nali OMWAMI Nyasaye oukhukholile niusila, omusango nikuhaanwa khuye, amapaaroke kaba kalaba amalayi khwisie. Nikhuba nikhuli okhukhola khwabandu, kho lekha eshilaamo shiobubi shibe khubo. Baarusiye isie mushialo eshia OMWAMI Nyasaye, nibandeera mushialo eshienyala okhwinamila abanyasaye abacheni bonyene.

²⁰Shiolaafuchilila ndeerirwa mushialo eshicheni, ehale okhurula khwiwe OMWAMI Nyasaye tawe. Eshichila omuruchi wa Isiraeli yetse okhunzira isie, ouli butswa shinga eshichinji nishiina? Eshichila omuruchi yayiime shinga ouyiima linyonyi liomubulimo nishiina?”

²¹Saulo namukalusia ari, “Ekholile obubi. Omusiani wanje Daudi, kalukha! Shindalakhusaalisiakhwo khandi ta, shichila undeshile nembaho mwoyo inyanga yino. Ndabeeleenje omuyingwa! Ekholile eshikhole eshibi shiamakana!”

²²Daudi nakalusia ari, “Omwami woluyali, lifumolio ndielino. Ruma mulala khubandubo yetse alibukule.

²³OMWAMI Nyasaye arunganga abesiikwa khandi khubali abalunjishi ikhabi. Inyanga yino OMWAMI Nyasaye akhureere hasi wobunyali bwanje, nebutswa shiekhusaalisiye iwe, owa OMWAMI Nyasaye yaahula okhuba omuruchi tawe.

²⁴OMWAMI Nyasaye akhoya yahonia obulamu bwanje khandi yarusia isie mumatinyu koosi, shinga olwa isie ehoniye obulamubwo!”

²⁵Saulo naboolela Daudi ari, “Mwana wanje, Nyasaye akhuhelesie ikhabi! Olakhola amakhuwa amakhongo khandi olanyalilwa mubuli eshindu shiosi eshiokhola!” Mana Daudi narulaho natsia, naye Saulo nakalukha nangowe.