Read wanga 1 SAMWELI 27 Bible Online

1 SAMWELI 27 - wanga bible

1 SAMWELI 27

¹Daudi napaara mumwoyokwe ari, “Inyanga yindi, Saulo anyala okhunzira. Eshindu eshilayi eshienyala okhukhola nokhwilukha okhutsia Filisiti. Mana Saulo alalekha okhuukhaaba mu Isiraeli ne ndalaba nomulembe.”

²Daudi nende abandube ebikhumi bisasaba (600) batsia bwangu khu Akishi omusiani wa Moaki, ouli omuruchi wa Gatsi.

³Daudi nende abandube halala nende abomunzuwe nibamenya mwitookho lia Gatsi. Daudi yali nabakhasibe babili abo mbu, Ahinomu okhurula mushialo shia Yezirili nende Abigaili owali omukhasi omulekhwa wa Nabali okhurula Karimeli.

⁴Olwa Saulo yahulila mbu, Daudi yali niyelushiile Gatsi yalekha okhumukhaaba.

⁵Daudi naboolela Akishi ari, “Nemba nekhuchamisiye, chama umbeekhwo litookho litiiti eliemenyamwo. Omwami, shibulaho eshichila isie emenye ninawe mwitookho likali lino.”

⁶Akishi namuhelesia litookho lia Zikilagi, ne nishio eshifune shichila litookho lia Zikilagi niliba eliabaruchi ba Abayahudi okhuula bulano.

⁷Daudi yamenya Filisiti khulwemiesi ekhumi nachisasaba.

⁸Mutsinyanga etsio, Daudi nende abandube batsitsanga okhuseera abandu bamatookho ka Geshuri, Girizi, nende Ameleki, abali nibamenya mushialo eshio oluhoono olurambi. Baseeranga nibayaaya eshialo shiabwe okhuula Shuri, okhulondoola khunjila okhuula Misiri,

⁹nibeeranga abasaatsa boosi nabakhasi ne nibabukula amakondi kabwe, tsing'ombe, tsisishili, tsingamia nende kata ebifwalo biabwe.

¹⁰Olunyuma lwako, yachelelanga ewa Akishi, mana Akishi amureeba ari, “Niheena ewotsile inyanga yino okhuyaaya?” Naye Daudi yamuboolelanga ari, “Enzilenje okhuyaaya elubeka lwemulambo wa Yuda, noho mushialo shiaboluyia lwa Yerahimeli noho mushialo shia Abakeni bamenyangamwo.”

¹¹Daudi yeeranga buli mundu omusaatsa nende omukhasi kho mbu, abuleho ounyala okhutsia Gatsi, aboole akatoto aka Daudi nende abandube balinji nibakholile. Kano niko aka Daudi yakholanga oluhoono lwosi olwa yamenya Filisiti.

¹²Nebutswa Akishi yali niyasuubila amakhuwa ka Daudi mana omwene yapaaranga mumwoyokwe ari, “Abandube ba Isiraeli beene basila Daudi muno. Khulweshio, alaakhalabanila isie inziayo.”