Read wanga 1 SAMWELI 3 Bible Online

1 SAMWELI 3 - wanga bible

1 SAMWELI 3

¹Mutsinyanga etsio, lwomwana Samweli yali nakhalabanilanga OMWAMI Nyasaye niyemiliilwe nomwisaaliisi Eli, shibwali obwangu OMWAMI Nyasaye okhuboola nabandube likhuwalie ta, khandi shiyabaloleshelangakhwo mumalolelo muno muno tawe.

²Inyanga yindi mushilo, Eli nali ahambi okhubofulila elala, yali niyeyalisiye mushisikashie.

³Samweli yali niyeyalisiye muhekalu hambi nende Lisanduku lieindakano eya OMWAMI Nyasaye. Tsindoolo nitsishili okhubayila, ne itaha niyishiakhanga,

⁴OMWAMI Nyasaye yalanga Samweli. Naye Samweli nakalusia ari, “Endiho.”

⁵Samweli natsia tsimbilo ewa Eli yali naboola ari, “Unanjile, nisie uno.” Naye Eli namuboolela ari, “Shiekhulanjilekhwo ta, kalukhayo wiyalisie.” Kho Samweli natsia niyeyalisia.

⁶OMWAMI Nyasaye namulanga khandi ari, “Samweli!” Samweli nabuukha natsia ewa Eli yali namuboolela ari, “Endi hano, shichila unanjile.” Naye Eli namuboolela ari, “Shiekhulanjile ta mwana wanje, kalukhayo wiyalisie.”

⁷OMWAMI Nyasaye shiyali niyaboolakhwo nende Samweli ta, khandi Samweli yali nashili okhumanyilisia omwoyo okwa OMWAMI Nyasaye.

⁸OMWAMI Nyasaye khandi nalanga Samweli olwakhataru. Samweli nabuukha natsia ewa Eli yali naboola ari, “Unanjile ne nisie uno.” Mana Eli namanyilisia mbu, OMWAMI Nyasaye niye owali nalanganga Samweli.

⁹Eli naboolela Samweli ari, “Kalukhayo, wiyalisie, ne naba nakhulanga khandi, omuboolele ori, ‘OMWAMI Nyasaye, boola, shichila omukhalabaniwo akhurecheresinjia.’ ” Mana Samweli nakalukhayo niyeyalisia.

¹⁰OMWAMI Nyasaye niyetsa nasinjila ewa Samweli yali namulanga khandi shinga olwa yali namulanjilenje ari, “Samweli! Samweli!” Naye Samweli nakalusia ari, “Boola isie omukhalabaniwo erecheresinjia.”

¹¹OMWAMI Nyasaye naboola ari, “Samweli, enzitsanga okhukhola likhuwa libi liamakana mu Isiraeli, mbu omundu yesi yesi owakhalihulilekhwo yakhesundushe.

¹²Khunyanga eyo ndakhahaane eshinyasio shianje khubeinzu ya Eli shinga olwa ndalachilisia okhurula mukhuchaaka.

¹³Ndamala okhumuboolela mbu, ndalahelesia abeinzuye eshinyasio inziayo, shichila abasianibe baboolanga amakhuwa amabi khwisie. Eli yamanya mbu bakholanga bario, ne shiyabakania tawe.

¹⁴Endaka ninditsuba mbu, kubulaho omusango kwosi kwosi kata eshihaanwa eshilinyala okhuyiniaho obwonooni obweinzu ya Eli tawe.”

¹⁵Samweli yatsiililila okhwiyalisia okhuula olwa eshialo bwashia. Nabuukha niyekula omuliango kweinzu eya OMWAMI Nyasaye. Yali omuri okhuboolela Eli aka yali nalutsi mwilolelo.

¹⁶Nebutswa Eli yalanga Samweli namuboolela ari, “Samweli mwana wanje.” Naye nakalusia ari, “Endiho.”

¹⁷Eli namureeba ari, “Nishiina eshia OMWAMI Nyasaye akhubooleele? Shiolabisakhwo likhuwa liosi liosi tawe. OMWAMI Nyasaye alakhuhelesia eshinyasio eshilulu noba nolamboolela koosi kakhubooleele tawe.”

¹⁸Samweli namuboolela koosi nalamubisakhwo likhuwa liosi liosi tawe. Eli nakalusia ari, “Niye OMWAMI Nyasaye, lekha akhole liosi elimuchamisia.”

¹⁹OMWAMI Nyasaye yalindanga Samweli olwa yakhulanga, khandi niyosia amakhuwa koosi aka Samweli yali niyaboola.

²⁰Mana abandu ba Isiraeli boosi okhurula khundulo welihanga emasaba okhuula khundulo undi emulambo, nibamanya mbu toto Samweli yali omulakusi watieli owa OMWAMI Nyasaye.

²¹OMWAMI Nyasaye natsiililila omwene okhwifwimbula Shilo, ewa yali nalolesheele Samweli, khandi nasungaane nende Samweli. Abaisiraeli boosi barecheresinjia olwa Samweli aba naboola.