Read wanga 1 SAMWELI 30 Bible Online

1 SAMWELI 30 - wanga bible

1 SAMWELI 30

¹Olwa Daudi nende abandube boola Zikilagi khunyanga ya khataru, Abameleki bali nibamalile okhuseera Negebu nende Zikilagi. Bali nibamalile okhuhula abelitookho lia Zikilagi khandi nibalisambile nomulilo,

²khandi nibatiilile abakhasi nende abandu boosi abalimwo, abatiiti khubakhongo. Shibayerakhwo omundu yesi yesi ta, habula bababukula nibatsia ninabo nibali mwoyo.

³Olwa Daudi nabandube boola mwitookho lia Zikilagi, banyoola litookho elo nilisambilwe nilikwile nabo abakhasi babwe nende abaana babwe abasiani nende abakhaana bali nibatiililwe nibayililwe.

⁴Daudi nende abandube nibachaaka okhwikhuula, ne nibalaholeela ta, okhuula olwa bachonya muno.

⁵Kata abakhasi ba Daudi babili mbu, Ahinoamu nende Abigaili bosi bali nibatiililwe nibayililwe.

⁶Daudi yali nali mumatinyu kamakana, shichila abandube bali nibaluyilile khulwa okhukosia abaana babwe. Ne bali nibasiomanga okhumulasa namachina. Nebutswa OMWAMI Nyasayewe yamutinyilisia omwoyo.

⁷Daudi naboolela omwisaaliisi Abiatsari omusiani wa Ahimeleki ari, “Ndeerera ifodi.” Mana Abiatsari namureerera.

⁸Daudi nareeba OMWAMI Nyasaye ari, “Enzie enondachile abandu abo noho? Ndalabanyoola noho?” OMWAMI Nyasaye namukalusia ari, “Balondachile, olabanyoola khandi olahonokosia abatiililwe.”

⁹Kho Daudi nabandube ebikhumi bisasaba (600) nibachaaka okhutsia. Ne olwa boola khumwalo kwa Besori, abandi khubo batong'aho.

¹⁰Daudi natsiililila nabandu ebikhumi bine (400) nabo abandi ebikhumi bibili (200) bali nibachonyile, abalanyala okhwambukha omwalo okwo ta, ne nibatong'a injelekha.

¹¹Abandi bali nende Daudi banyoola Omumisiri mushibakala ne nibamureera khu Daudi. Bamuhelesia ebiokhulia nende amaatsi.

¹²Khandi nibamuhelesia eshitonye eshiamakhuyu akomibwa shibumbilwe, nende ebitonye bibili ebietsinzabibu tsinyumu ebibumbilwe. Olwa yamala okhulia yanyoola amaani, shichila shiyali naliilekhwo eshiokhulia shiosi shiosi kata okhunywakhwo amaatsi koosi koosi khulwa tsinyanga tsitaru tawe.

¹³Daudi nareeba omundu oyo ari, “Omwamiwo niwiina, ne orula heena?” Omundu oyo nakalusia ari, “Endi Omumisiri, omusumba wa Omumeleki. Omwami wanje yayandeshile inyuma tsinyanga tsitaru tsiahwele, shichila ndabeele nendi omulwale.

¹⁴Khwabeele nikhuseerire eshialo shia Abakeretsi elubeka wemulambo wa Yuda nende eshialo shiaboluyia lwa Kalebu, khandi nikhusambile litookho lia Zikilagi nilikwile.”

¹⁵Daudi namureeba ari, “Onyala okhumbila khubaseeri abo noho?” Naye namukalusia ari, “Enyala, noba niunzitsubila muliira lia Nyasaye mbu, shiolanzira ta, khandi mbu shiolaahaana khumwami wanje tawe.”

¹⁶Mana nayila Daudi khubo. Abaseeri abo bali nibasalaanile habundu yaho nibaliitsanga, nibanywetsanga khandi nibekhoyanga khulwa ebindu ebinji ebia bali nibayaayile Abafilisiti nende Yuda.

¹⁷Daudi nabaseera inyanga yalondakhwo mumabwibwi nibalwana okhuula khubwile. Abandu abo boosi nibeerwa, okhuyiniakhwo abaraaka ebikhumi bine (400), baniina khutsingamia nibelukha.

¹⁸Daudi nahonokosia buli mundu nende buli shindu eshia Abameliki bali nibabukuule, halala nende abakhasibe babili.

¹⁹Shibulaho eshindu shiosi shiosi eshiakorera elala tawe. Daudi nakalusia abaana beshisiani nende abeshikhaana babandube boosi nende biosi ebia Abameleki bali nibayaayile.

²⁰Khandi yakalusia ebiayo nende tsing'ombe. Abandube nibabiimisia imbeli wabwe nibaboola bari, “Bino nebiyaayo bia Daudi!”

²¹Mana Daudi nakalukha khubasaatsa abo ebikhumi bibili (200) abali nibachonyile muno okhutsia ninaye, ne nibatoonyile inyuma khumwalo kwa Besori. Betsa okhwakaanila Daudi nende abandube, naye Daudi natsia nabashiesia nobusaangaafu.

²²Nebutswa abandu abamayanu khandi abeinduli abali nibatsiile nende Daudi, baboola bari, “Shibatsiile ninefwe ta, kho shikhubakabakhwo eshindu shiosi shiosi eshia khuyaayile tawe. Lekha babukule abakhasi babwe nende abaana babwe mana batsie.”

²³Nebutswa Daudi yababoolela ari, “Baana befwe, shimunyala okhukhola murio khushindu eshia OMWAMI Nyasaye akhuhelesiye tawe. Akhulindile obulayi khandi akhukholile okhuhula abaseeri abo.

²⁴Abulaho ounyala okhufuchilila aka muboolanga tawe! Mwesi okhuula mukabane ebihelana. Omundu yesi yesi outong'a inyuma okhulinda ikambi, anyoola eshichelo shihelana nende eshioutsiile mwihe.”

²⁵Mana okhurula olwo, Daudi nakaasia elo okhuba lilako, ne nilichaaka okhulondwa mu Isiraeli okhuula olwa leelo.

²⁶Olwa Daudi yakalukha Zikilagi yayila bilala khubindu bia yali nayaayile ebio khubemilisi ba Yuda, abali abetsabe ne naboola ari, “Shino nishio eshihaanwa shienywe khubiakhuyaayile abasuku aba OMWAMI Nyasaye.”

²⁷Yaruma ebihaanwa khubandu bali Betseli, aba Ramotsi abali emulambo wa Yuda, nende khubali mumatookho ka Yatiri,

²⁸Aroeri, Sifumotsi, Eshitemoa

²⁹nende Rakoli, khuboluyia lwa Yerehimeli, Abakeni

³⁰nende khubandu abali mumatookho ka Horima, Borashani, Atsaki,

³¹nende Heburoni, khandi narumila buli habundu hosi aha ye mwene nende abandube bali nibatsiakhwo.