Read wanga 1 SAMWELI 31 Bible Online

1 SAMWELI 31 - wanga bible

1 SAMWELI 31

¹Mana Abafilisiti nibaseera Abaisiraeli khushikulu shia Giliboa. Abaisiraeli abanji beerirwa khushikulu okhwo, nabo abatong'a halala nende omuruchi Saulo nende abasianibe nibelukha.

²Nebutswa Abafilisiti babalondachila nibabanyoola ne nibeera abasiani ba Saulo bataru: Yonatsani, Abinadabu nende Milikishua.

³Lihe liali litinyu muno nilibotokhaane Saulo, ne nasaalisibwa obubi muno nomubano okwobuyingo obwomusukuwe.

⁴Naboolela omusianiwe wamuchinjilanga ebimanulwabie ari, “Tsomola olukangalwo mana unzire kho mbu, Abafilisiti abalamanyile Nyasaye abo baleshe okhunzitsakhwo nibanzeshelela nibanzira.” Nebutswa omuraaka oyo yaria muno okhumufumira. Kho Saulo nabukula olukangalwe niyefumirakhwo omwene.

⁵Olwa omuraaka oyo yalola mbu, Saulo amalile okhufwa, yesi khandi niyefumira omwene nolukangalwe ne nafwa.

⁶Nolwa Saulo nabasianibe bataru nende omuraaka oyo bafwa bario, abandu ba Saulo boosi khandi bafwa inyanga yeneyo.

⁷Olwa Abaisiraeli abali elubeka undi welibanda lia Yezirili nende abali ebukwe womwalo kwa Yorodani bahulila mbu, Saulo nende abasianibe beerirwe, balekha amatookho kabwe ne nibelukha. Abafilisiti nabo nibetsa ne nibakabukula.

⁸Ne inyanga yalondakhwo olwa Abafilisiti betsa okhurusia ebimanulwa khumilambo, banyoola omubili kwa Saulo nende emibili chiabasianibe bataru nichikonile khushikulu shia Giliboa.

⁹Nibakhalaka Saulo omurwe nende okhumufwalula ebimanulwabie, ne nibaruma abandu mushialo shia Abafilisiti shiosi mbu, batsie bamanyie amakhuwa amalayi ako abanyasaye babwe nende abandu babwe.

¹⁰Mana nibara ebimanulwa bia Saulo muhekalu yomunyasaye omukhasi oweliiralie mbu, Asitarite khandi nibakhoma omubilikwe khwisiisi lielitookho lia Betsishani.

¹¹Olwa abandu belitookho lia Yabeshi mu Giliadi bahulilakhwo aka Abafilisiti bali nibakholeele Saulo,

¹²abasaatsa abeitswoni barula nibachenda eshilo shiosi okhutsia Betsishani. Nibeshia omubili kwa Saulo nende emibili chiabaanabe okhurula khwisiisi, nibachikalusia Yabeshi ne nibachisambilayo.

¹³Ne nibabukula amakumba kabwe nibakayabila mushisina shiomusaala Omutamarisiki okuli mwitookho lia Yabeshi, mana nibahonga inzala khulwa tsinyanga musaafu khulwokhusaaya nibekhuulanga Saulo.