Read wanga 1 SAMWELI 4 Bible Online

1 SAMWELI 4 - wanga bible

1 SAMWELI 4

¹Abafilisiti nibekhung'asia halala ebise ebio okhwirechekha okhuseera Abaisiraeli, nabo Abaisiraeli nibarula nibatsia okhubalwana. Abaisiraeli bakhupa ikambi yabwe Ebenezeri nabo Abafilisiti nibakhupa eyabwe Afeki.

²Abafilisiti nibaseera Abaisiraeli, ne olunyuma lwokhulwana obutinyu, Abafilisiti bahula Abaisiraeli ne nibeera abandu ebikhumila bine (4,000) ebulafu wa balwanilanga eyo.

³Olwa abelihe ba Abaisiraeli bali nibatoonyile bakalukha mukambi, abemilisi ba Abaisiraeli babareeba bari, “Mbushiina OMWAMI Nyasaye nakhola Abafilisiti okhukhuhula ifwe leelo luno? Chende khutsie khwende lisanduku lieindakano okhurula Shilo kho mbu, OMWAMI Nyasaye atsie ninefwe mana akhuhonokosie okhurula khubasuku befwe.”

⁴Baruma abandu Shilo nibareera lisanduku lieindakano eya OMWAMI Nyasaye, elimanyisinjia obunyali bwoburuchi bwa OMWAMI Nyasaye omwene mahe, owikhaale khushifumbi shioburuchi hekulu webilonje bietsimbaha. Nabo abasiani ba Eli babili Hofuni nende Finehasi, nibetsa ninalio.

⁵Olwa lisanduku lieindakano liola mukambi, Abaisiraeli bachinga olukhu lwomwikhoyo omukhongo mana eshialo shiosi nishirenga.

⁶Ne olwa Abafilisiti bahulila olukhu olwo bareeba bari, “Olukhu luli mukambi ya Abaisiraeli luno lumanyisinjia shiina?” Ne olwa bamanya mbu, lisanduku elieindakano eya OMWAMI Nyasaye liali nilireerirwe mukambi eya Abaisiraeli,

⁷baria muno nibaboola bari, “Omunyasaye yetsile mukambi yabwe! Khuli mumatinyu! Kano kashili okhwikholekhakhwo khwifwe!

⁸Niwiina oulanyala okhukhuhonokosia okhurula khubanyasaye abamaani bano? Nibo abanyasaye beerera Abamisiri mushitsiimi!

⁹Muume ikholo, inywe Abafilisiti! Mulwane shinga abasaatsa, ne nimulakhola murio ta, khulaba abasumba ba Abaisiraeli, shinga olwa bali abasumba befwe. Mulwane shinga abasaatsa!”

¹⁰Abafilisiti nibalwana nomwoyo kwosi nibahula Abaisiraeli nibelukha nibakalukha mungo tsiabwe. Abaisiraeli beerwa abanji ebikhumila amakhumi kataru (30,000).

¹¹Abafilisiti nibabukula lisanduku lieindakano eya OMWAMI Nyasaye khandi nibeera abasiani ba Eli Hofini nende Finehasi.

¹²Omusaatsa undi womuluyia lwa Benjamini yarula ewa lihe liali niyelukha tsimbilo natsia Shilo inyanga yene eyo. Yali naranduule ebifwalobie khandi niyepuuchile olufu khumurwekwe.

¹³Olwa yoola Eli yali niyekhaale khushifumbishie khundulo weinjila nahenjelesinjia, okhuba omwoyokwe kwali nikuhendelanga lisanduku lieindakano eya OMWAMI Nyasaye. Ne lwomusaatsa oyo yenjila mwitookho, naboolela abandu akali nikekholeeshe mwihe, abamwitookho omwo boosi bekhuula nibalila.

¹⁴Ne olwa Eli yahulilakhwo okhwikhuula okhwo, yareeba ari, “Okhwikhuula okhwo nokhwa shiina?” Omusaatsa oyo niyetsa bwangu muno naboolela Eli akali nikekholeeshe.

¹⁵Eli yali nali nemiyika amakhumi shienda namunane (98), natsio tsimonitsie nitsilanyala okhulola tawe.

¹⁶Omusaatsa oyo naboola ari, “Ndibisile okhurula mwihe, mana nindilukha okhuula hano inyanga yino.” Eli namureeba ari, “Mwana wanje, nishiina eshiikholeshe?”

¹⁷Omusaatsa oyo nakalusia ari, “Abaisiraeli beluushe okhurula khu Abafilisiti, mana Abaisiraeli abanji nibeerwa. Nabo abasianibo babili Hofuni nende Finehasi berirwe khandi lisanduku lieindakano eya OMWAMI Nyasaye libukuulwe!”

¹⁸Olwa omusaatsa oyo yarumbulakhwo butswa mbu lisanduku lieindakano eya OMWAMI Nyasaye, Eli yakwa makalama okhurula khushifumbishie hashiliibwa wa yali niyekhaale. Eli yali omukofu muno khandi omukhomefu mana olwa yakwa, likosilie liafunikha ne nafwa. Yali niyemiliilenje Abaisiraeli khulwemiyika amakhumi kane (40).

¹⁹Nyakhufialanyene Eli, omukhasi wa Finehasi yali nali inda nali ahambi okhwibula. Olwa yahulila mbu lisanduku lieindakano libukuulwe, naye Eli nyakhufialanyene nende Finehasi omusaatsawe bafwile, yakhalikha omukongo, nalumwa inzibula ne niyebula omwana.

²⁰Olwa omukhasi oyo yali nafwitsanga, abakhasi abali nibamwibusinjia bamuboolela bari, “Shiolafwa omwoyo ta! Wibuule omwana omusiani!” Nebutswa omukhasi oyo shiyarecheresiakhwo kata okhubakalusiakhwo likhuwa tawe.

²¹Yakulikha omwana oyo eliira mbu Ikabodi[3] eshisina mbu, “Oluyali lwa Nyasaye luleshile Abaisiraeli,” okhumanyisia mbu lisanduku lieindakano libukuulwe, khandi mbu nyakhufialanyene nende omusaatsawe bafwa.

²²Omukhasi oyo yaboola ari, “Oluyali lwa Nyasaye lurulile khu Abaisiraeli shichila lisanduku lieindakano eya OMWAMI Nyasaye libukuulwe.”