Read wanga 1 SAMWELI 5 Bible Online

1 SAMWELI 5 - wanga bible

1 SAMWELI 5

¹Olwa Abafilisiti babukula lisanduku lieindakano elo, baliyinia Ebenezeri nibaliyila mwitookho liabwe lia Ashidodi.

²Balinjisia muhekalu yomunyasaye wabwe Dagoni, nibalisinjisia hambi neshifwanani eshiomunyasaye Dagoni oyo.

³Olwa abandu bomwitookho lia Ashidodi babuukha inyanga yalondakhwo mumabwibwi, banyoola omunyasaye wabwe Dagoni oyo nakwile hasi mafumama mubwelu imbeli welisanduku lieindakano eya OMWAMI Nyasaye. Mana nibasinjisia omunyasaye oyo nibamukalusia mubwikhalobwe khandi.

⁴Inyanga yalondakhwo mumabwibwi abandu banyoola omunyasaye oyo khandi nakwile mafumama imbeli welisanduku lieindakano. Omubili kwomunyasaye oyo kwali nikulaatiishe ta, nebutswa omurwekwe nende amakhono biali nibikhalishe nibirulilekhwo nibikonile hamushingachi kwobwinjililo.

⁵Shino nishio eshifune eshichilanga okhuula olwa leelo abesaaliisi ba Dagoni nende boosi abamwinamilanga barumanga khumushingachi okwo nibalakusenakhwo tawe.

⁶OMWAMI Nyasaye yahelesia abandu ba Ashidodi eshinyasio eshilulu, nabariisia muno. Yabahelesia eshinyasio halala nende abandu bamatookho kababotokhana khulwa okhubareerera amabure khumibili chiabwe.

⁷Olwa balola akali nikekholekhanga baboola bari, “Nyasaye wabandu ba Isiraeli akhuhelesinjia ifwe nende omunyasaye wefwe Dagoni eshinyasio. Shikhunyala okhulekha lisanduku lieindakano lino litsiililile okhuba hano tawe.”

⁸Abandu ba Ashidodi nibakhung'asia halala abaruchi boosi barano ba Abafilisiti nibabareeba bari, “Khukhole khurie lisanduku lieindakano lia Nyasaye wa Isiraeli lino?” Nabo nibakalusia bari, “Muyile lisanduku lieindakano elo Gatsi.” Kho nibaliyila Gatsi, eliali elala khumatookho ka Abafilisiti.

⁹Olunyuma lwelisanduku elo okhuula Gatsi, OMWAMI Nyasaye yareerera abandu bomwitookho elo eshinyasio eshikhongo, mana nibaria muno. Yareera amabure khubandu bomwitookho elo boosi okhuchaachila khumutiiti okhuula khumukofu.

¹⁰Nibayinia lisanduku lieindakano elo mwitookho lia Gatsi nibaliyila Ekironi, eliali litookho lindi lia Abafilisiti. Olwa liolayo, abandu abomwitookho elo bekhuula nibaboola bari, “Bareerire hano lisanduku lieindakano lia Nyasaye wa Isiraeli, kho mbu bakhwire fwesi!”

¹¹Abandu abo nibalanga halala abaruchi boosi ba Abafilisiti ne nibababoolela bari, “Kalusie lisanduku lieindakano lia Abaisiraeli habundu walio kho mbu, lileshe okhukhwira ifwe nende abomutsinzu tsiefwe.” Abandu boosi mwitookho omwo nibaria muno, shichila Nyasaye yali nabahelesinjia eshinyasio eshilulu.

¹²Nyasaye yareera amabure khubandu abali nibalafwile ta, mana abandu nibahabila abanyasaye babwe okhubahonokosia.