Read wanga 1 SAMWELI 6 Bible Online

1 SAMWELI 6 - wanga bible

1 SAMWELI 6

¹Lisanduku lieindakano eya OMWAMI Nyasaye liamenya mushialo shia Abafilisiti khulwemiesi musaafu.

²Mana Abafilisiti nibalanga abesaaliisi nende abafumu babwe nibabareeba bari, “Khukhole khurie lisanduku lieindakano elia OMWAMI Nyasaye lino? Nikhuba nikhulikalusia ewaliarula, khwakhalikalusiayo nende shiina?”

³Nabo nibaboola bari, “Nimuba nimukalusia lisanduku lieindakano elia OMWAMI Nyasaye wa Isiraeli, okhuula mulikalusieyo neshihaanwa eshiomusango kwobwonooni bwenywe. Shimulakalusiayo lisanduku elo nilibula eshihaanwa eshio tawe. Nimukhola murio, mulahona khandi mulamanyilisia eshichila natsiililila okhumuhelesia eshinyasio.”

⁴Abandu nibareeba bari, “Nakhumuyilile eshihaanwa shiina eshiokhuyiniakhwo obwonooni?” Nabo nibaboola bari, “Muyile ebituute bieitsahabu birano ebifwana shinga amabure nende ebituute bieitsahabu birano ebifwana shinga tsimbeba. Buli eshituute shilala shibe shiomuruchi wa Abafilisiti, shichila obulwale bulala obwo nibwo obwareerwa khwinywe mwesi nende khubaruchi barano.

⁵Mukaasie ebifwanani birano biamabure nende birano bietsimbeba etsisasinjia eshialo shienywe, khandi okhuula muhelesie Nyasaye wa Isiraeli oluyali. Nimukhola murio haundi anyala okhulekha okhumuhelesia inywe eshinyasio, abanyasaye benywe nende omukunda kwenywe.

⁶Mbushiina mube abatinyu shinga olwa Abamisiri nende omuruchi wabwe bali? Nyasaye yabareerera amatinyu okhuula olwa balekhuula Abaisiraeli okhurula mushialo shia Misiri.

⁷Recheshe likaari liyia nende tsing'ombe tsibili etsishelungwa, etsishili okhulimakhwo. Mutsiboye khwikaari elo, nabio ebimoosi biatsio bitoonye mushiko.

⁸Mubukule lisanduku lieindakano elia OMWAMI Nyasaye elo mulire khwikaari. Mure mundulo mwa lisanduku elo amatuute keitsahabu ako nende aketsimbeba tsieitsahabu etsio, ebia mumuyilila okhuba omusango kwenywe kwokhurusiakhwo obwonooni. Mana muleshe liyilwe hosi hosi aha litsia.

⁹Mana muhenjelesie lisanduku elo olwa litsia. Niliba nilitsia khunjila yitsia mwitookho lia Betsishemeshi, kaba kali mbu omunyasaye wa Isiraeli niye oureerire eshinyasio eshilulu shino khwinywe. Lisanduku lieindakano elo niliba nililatsia mwitookho elo ta, khuba khulamanya mbu, shinomunyasaye oyo oureerire eshinyasio eshio tawe. Shiba shiitsile butswa eshiene.”

¹⁰Abafilisiti nibakhola shinga olwa bali nibabooleelwe. Babukula tsing'ombe tsibili etsishelungwa, nibatsiboha khwikaari, nabio ebimoosi biatsio nibitong'a mushiko.

¹¹Nibarechekha lisanduku lieindakano mwikaari halala nende akhasanduku khalimwo ebifwanani biamabure bieitsahabu nende ebia tsimbeba ebio.

¹²Tsing'ombe etsio nitsichaaka okhuchenda khunjila shilunji nitsihenjile mwitookho lia Betsishemeshi, nitsilakotokhakhwo khunjila yindi yosi yosi tawe. Tsiananga nitsichenda khunjila nitsitsia. Abaruchi ba Abafilisiti barano batsilondakhwo munyuma okhuula khulwakho lwelitookho lia Betsishemeshi.

¹³Abandu belitookho lia Betsishemeshi bali nibachesanga ingano yabwe mwibanda. Olwa bakololokha nibahenga ne nibalola lisanduku lieindakano, basaangaala muno, nibalekha okhuchesa ingano nibachaaka okhwikhoya.

¹⁴Tsing'ombe tsiali nitsikhwesanga likaari elo tsiakotokha okhurula khunjila nitsinjila mumukunda kwa Yoshwa wa Betsishemeshi, nitsisinjila hambi khulwanda olukhongo. Kho nibaasiakamwo likaari elo ne nibasinzilaho tsing'ombe etsio, nibatsihaana shinga omusango omusambe khu OMWAMI Nyasaye.

¹⁵Abalawi abo nibeeshia hasi lisanduku lieindakano eya OMWAMI Nyasaye okhurula khwikaari elo, nibalirenjekha khulwanda olwo. Khandi nibeeshia ebifwanani ebiamabure nende ebietsimbeba ebio. Abandi khubo nibaarasia likari lietsimbao elo nibabwana omulilo. Nibasinza tsing'ombe etsio nibatsihaana khu OMWAMI okhuba omusango omusambe. Nibakhamala bario, nibameeta okhuhaana emisango chindi.

¹⁶Abaruchi ba Abafilisiti barano abo balola koosi akekholekha mana nibenyokha inyanga yeneyo nibatsia Ekironi.

¹⁷Abafilisiti nibarumila OMWAMI Nyasaye ebihaanwa biabwe birano, ebiebifwanani biamabure akeitsahabu khulwa okhurunga obwonooni bwabwe. Bahaana eshihaanwa khubuli litookho. Elia Ashidodi, elia Gaza, elia Ashikeloni, elia Gatsi nende elia Ekironi.

¹⁸Khandi baruma ebifwanani bietsimbeba bieitsahabu, buli ndala khumatookho akarukungwa nende abaruchi barano ba Abafilisiti abo, abamatookho ketsingoba nende akamataala kalali namasiisi tawe. Olwanda olukhongo lwali mumukunda kwa Yoshwa owa Betsishemeshi, olwa barenjekhakhwo lisanduku lieindakano elia OMWAMI Nyasaye. Ne lishiliho okhuula olwa leelo okhuba obuloli khumakhuwa kekholekha.

¹⁹Abasaatsa bandi khubomwitookho lia Betsishemeshi bahenjelela mukari mwelisanduku lieindakano mana OMWAMI Nyasaye niyeera abandu amakhumi musaafu. Abandu bekhuula neshibeela muno, shichila OMWAMI Nyasaye yali niyeerire abandu babwe abanji.

²⁰Abandu ba Betsishemeshi nibareebana bari, “Niwiina ounyala okhusitakhwo ahambi khu OMWAMI Nyasaye uno, ouli Nyasaye omutakatifu? Nihena ewa khunyala okhuyila Nyasaye uno arule hano khwifwe?”

²¹Nibaruma abarume khubandu boosi abelitookho lia Kiriatsi Yearimu okhuboola bari, “Abafilisiti bachelesiye Lisanduku lieindakano elia OMWAMI Nyasaye, mwitse mulibukule.”