Read wanga 1 SAMWELI 7 Bible Online

1 SAMWELI 7 - wanga bible

1 SAMWELI 7

¹Abandu belitookho lia Kiriatsi Yearimu nibetsa nibabukula lisanduku lieindakano elo nibaliyila munzu yomundu mbu Abinadabu, owamenyanga khushikulu. Nibaahula Eliazeri omusianiwe okhuba omulindi welisanduku lieindakano elia OMWAMI Nyasaye elo.

²Lisanduku lieindakano eya OMWAMI Nyasaye liamenya Kiriatsi Yearimu emiyika amakhumi kabili. Emiyika echio chiosi Abaisiraeli balilanga nibahabila OMWAMI Nyasaye mbu abakhoonye.

³Samweli naboolela Abaisiraeli boosi ari, “Nimuba nimukalushila OMWAMI Nyasaye nende emioyo chienywe chiosi, okhuula abeene murusieho abanyasaye abacheni nende ebifwanani ebia omunyasaye omukhasi Asitarite. Mwihaane abeene khu OMWAMI Nyasaye, ne mumwinamile ye yenyene, naye alamuhonokosia okhurula mubunyali bwa Abafilisiti.”

⁴Kho Abaisiraeli nibeyiniakhwo ebifwanani bia omunyasaye Baali nende Asitarite. Mana nibenamila OMWAMI Nyasaye yenyene.

⁵Mana Samweli narumana mbu Abaisiraeli boosi bakhung'ane Mizipa, ne naboola ari, “Ndalamusaayila khu OMWAMI Nyasaye ebweneyo.”

⁶Abaisiraeli boosi nibakhung'ana Mizipa, mana nibataha amaatsi okhurula musebele, nibakasuundula elwanyi okhuba eshihaanwa khu OMWAMI Nyasaye ne nibahonga inzala khulwokhusaaya inyanga eyo yoosi. Baboola bari, “Khwonooneele OMWAMI Nyasaye.” Samweli yayaasia abandu nareera omulembe hakari wa Abaisiraeli nibali Mizipa.

⁷Olwa Abafilisiti bahulila mbu Abaisiraeli bali nibekhung'asiye Mizipa, abaruchi barano ba Abafilisiti barula nabelihe babwe okhutsia okhuseera Abaisiraeli. Abaisiraeli baria muno olwa bahulila mbu, Abafilisiti betsanga okhubaseera.

⁸Baboolela Samweli bari, “Tsiililila okhusaaya OMWAMI Nyasaye, Nyasaye wefwe akhuhonie okhurula khu bafilisiti.”

⁹Khulweshio Samweli nabukula eshimeeme eshielikondi eshisaatsa eshishinuunanga nashihaana shinga omusango omusambe khu OMWAMI Nyasaye. Samweli nasaba OMWAMI Nyasaye mbu, ahabine Abaisiraeli, naye OMWAMI Nyasaye nahulila okhusaba okhwo.

¹⁰Olwa Samweli yali nashihaananga omusango okwo, Abafilisiti berechekha okhuseera Abaisiraeli, ne bwangu bwene OMWAMI Nyasaye nabaatulushilakhwo nali mwikulu. Abafilisiti nibakoyaana nibelukha nibali neindenga.

¹¹Abaisiraeli nibarula Mizipa nibalondachila Abafilisiti, ne nibeera abandi khubo khunjila okhuula Betsi-kari.

¹²Samweli nabukula lichina nalisinjisia hakari wa Mizipa nende Sheni naboola ari, “OMWAMI Nyasaye akhukhoonyile okhuula bulano.” Nakulikha lichina elo mbu, “Ebenezeri,” eshisina mbu, “Lichina liobukhoonyi.”

¹³Abafilisiti nibahulwa khandi OMWAMI Nyasaye nabekalila okhuseera ebimenyo bia Abaisiraeli khuluhoono lwa Samweli yali nashiliho mwoyo.

¹⁴Amatookho koosi aka Abafilisiti bali nibabukula okhurula khu Abaisiraeli, akali hakari welitookho lia Ekironi nende Gotsi kakalushila Abaisiraeli. Khandi Abaisiraeli nibanyoola eshialo shiabwe shiosi, mana nibamenya nomulembe nende tsimbia etsia Kanani.

¹⁵Samweli yatsiililila okhuba omuyaasi mu Isiraeli okhuula olwa yafwa.

¹⁶Yatsitsanga mumatookho ka Betseli, Giligali nende Mizipa buli omuyika nayaasinjia Abaisiraeli.

¹⁷Yamalanga akalushe nangowe Rama, ewa khandi yakholanga emilimno shinga omuyaasi. Nali Rama, yakasiliayo OMWAMI Nyasaye eshimalilo shiemisango.