Read wanga 1 SAMWELI 9 Bible Online

1 SAMWELI 9 - wanga bible

1 SAMWELI 9

¹Yaliho omundu undi omuyinda khandi owoluyali oweliira mbu, Kishi, owomuluyia lwa Benjamini. Yali omusiani wa Abieli khandi omwitsukhulu wa Zero. Yali oweinzu ya Bekoratsi mulala khubeshiliibwa shia Afia.

²Kishi yali nomwana omusiani oulangwa mbu Saulo, owali omuraaka welikondo lilayi khandi owamaani. Saulo yali omurambi okhushila omundu yesi yesi mu Isiraeli khandi yali owelikondo lilayi muno.

³Kishi yali niyaruka tsisishili, ne etsindi khutsio nitsikora. Naboolela omusianiwe Saulo ari, “Bukula mulala khubakholi, mutsie ninaye mukhaabe tsisishili etsio.”

⁴Mana nibatsia nibabirira mushialo shieshikulu shia Efuraimu nende eshia Shalisha ne nibalatsinyoola tawe. Batsiililila niboola mushialo shia Shalimu nende eshia Benjamini khandi nibalatsinyoolayo tawe.

⁵Olwa boola mushialo shia Zufu, Saulo yaboolela omukholi oyo ari, “Chenda khukalushe nango, okhuba papa anyala okhulekha okhupaara tsisishili nachaaka okhuhendela ifwe.”

⁶Omukholi oyo namukalusia ari, “Linda mbelio. Aliho omulakusi undi mwitookho lino owoluyali olukhongo, shichila buli akaboolanga kabetsanga akatoto. Chenda khutsie khumureebe. Haundi anyala okhukhuboolela ewa khunyala okhutsia okhutsinyoola.”

⁷Saulo nareeba omukholi oyo ari, “Khwakhatsia khurie okhusungana nende omulakusi olwa emba nembula eshindu shiosi shiosi shiokhumuhelesia? Shikhulikhwo nende kata eshiokhulia shiosi eshitoonyile muloloti yefwe tawe. Khwakhamuhelesiakhwo shiina?”

⁸Omukholi oyo namuboolela ari, “Endi nende eshitonye shitiiti eshieifetsa. Khunyala okhumuhelesia mana akhuboolele ewa khunyala okhutsia okhutsinyoola.”

⁹Khale mu Isiraeli omundu niyenyanga okhureeba Nyasaye likhuwa, yaboolanga ari, “Yitsa khutsie khulole omufumu, shichila munyanga etsio omulakusi yalangungwa mbu, omufumu.”

¹⁰Saulo nakalusia omukholi oyo ari, “Elo nilipaaro lilayi. Chenda khutsie.” Kho nibatsia mwitookho eliomulakusi oyo yamenyamwo.

¹¹Shinga olwa bali nibatsitsanga nibatikulukha khwitookho elo, baakaana nende abakhaana bandi nibatsitsanga okhutaha amaatsi mumwalo. Nibareeba abakhaana abo bari, “Omulakusi aliho?”

¹²Abakhana abo nibabakalusia bari, “Aliho. Ali mwitookho lino inyanga yino shichila abandu batsitsanga okhukhola emisango habundu hokhwinamila Nyasaye. Muyuuche ali butswa hambeli wenywe.

¹³Shinga olwa mulenjila butswa mwitookho, mulamunyoola nashili okhutsia hashimalilo shiemisango. Abandu shibalachaaka okhulia nashili okhuulayo ta, shichila okhuula asabile ikhabi omusango okwo, kho olunyuma abacheni balanjilwe balie. Tsie bulano, mulamunyoola nashili okhutikulukhayo.”

¹⁴Saulo nende omukholi oyo nibatsia mwitookho, ne olwa bali nibashinjilangamwo, baakaana nende Samweli narulangamwo natsitsanga hashimalilo shiemisango.

¹⁵Niyishili inyanga ndala okhuula inyanga eyo, OMWAMI Nyasaye yali nabooleele Samweli ari,

¹⁶“Mukamba khushise shinga shino, ndalakhurumila omusaatsa undi okhurula muluyia lwa Benjamini. Omutsushililekhwo amafura abe omuruchi wabandu banje ba Isiraeli, naye alabahonia okhurula khu Abafilisiti. Endutsi okhunyakhana khwabandu banje khandi embuliile okhuhaba khwabwe.”

¹⁷Olwa Samweli yalola Saulo, OMWAMI Nyasaye yaboolela Samweli ari, “Uno niye omusaatsa wa ndakhubooleelekhwo. Niye oularuka abandu banje.”

¹⁸Saulo nasita hambi nareeba Samweli, owali nali mushiliibwa ari, “Omulakusi amenyanga hena?”

¹⁹Samweli namuboolela ari, “Nisie omulakusi. Ranjilila okhutsia imbeli wanje okhuula hashimalilo shiemisango, ndalalia ninenywe mwesi babili inyanga yino. Mukamba nibushiele ndalamukalusia amareebo koosi aka mureeba mana emuseebule.

²⁰Shiolahendelakhwo tsisishili tsiakorire tsinyanga tsitaru tsihwele tawe. Tsimalile okhunyoolekha. Nebutswa owa abandu ba Isiraeli benya muno niwiina? Niwe, niwe nende abeinzu ya papawo owa abandu benya.”

²¹Saulo namuboolela ari, “Endi owoluyia lwa Benjamini, oluli olutiiti muno mu Isiraeli, khandi inzu yefwe niyoluyali olutiiti muno muluyia lwefwe. Mbushiina niumboolela ori?”

²²Samweli nayila Saulo nende omukholi oyo mushisika eshikhongo nabekhasia hameesa, ewa abacheni bali nibalanjilwe abahela amakhumi kataru bali nibekhaale.

²³Samweli naboolela omuteeshi webiokhulia ari, “Reera eshitonye shieinyama eshio, eshiekhuboolele mbu, waahule ore elubeka.”

²⁴Mana omuteeshi oyo nareera inyama eyokhushiatakho nachira imbeli wa Saulo. Samweli naboolela Saulo ari, “Yino niyo inyama yekhubiishiile. Bukula olie. Echibiishile khulwa iwe mbu ochilie khubise bino halala nende abacheni benaanjile.” Saulo yamala alie nende Samweli inyanga eyo.

²⁵Olwa bakholomokha nibarula habundu owokhwinamila Nyasaye nibatsia mwitookho, bakaasilia Saulo eshitali shiokhwiyalisiakhwo mushilama shieikulu mushisika eshieinzu.

²⁶Mana Saulo niyeyalisiakhwo. Olwa eshialo bwashia mumabwibwi, Samweli yalanga Saulo nashili ikulu mushisika naboola ari, “Buukha ekhuseebule otsie.” Saulo nabuukha natsia halala nende Samweli khunjila mwitookho.

²⁷Olwa boola khundulo khwelitookho, Samweli yaboolela Saulo ari, “Boolela omukholi uno yemile atsie imbeli wefwe.” Omukholi oyo natsia niyemila imbeli naye Samweli naboolela Saulo ari, “Yemakhwo hano eshise shitiiti nasi ndalakhuboolela aka Nyasaye aboolile.”