Read west central oromo Seera Uumamaa 14 Bible Online

Seera Uumamaa 14 - west central oromo bible

Seera Uumamaa 14

¹Bara sanatti Amraafel mootiin biyya Shiinaar, Aryook mootiin biyya Elaasaar, Kador-Laa'omer mootiin biyya Elaam, Tidaal mootiin biyya saba baay'ee mootummaa irra turan.

²Isaan Beraa mootii Sodoom, Birishaa mootii Gomoraa, Shanaab mootii Aadimaa, Shemeber mootii Zebo'iim, mootii Belaa, mandara isa ?Zo'aar? jedhamee beekame sanaa loluudhaaf ba'an.

³Warri booddee kanaa shanan dachaa Siidiim isa amma ?Galaana soogiddaa? jedhamee beekamutti wal ga'anii walitti hidhatan.

⁴Kador-Laa'omerin waggaa kudha lama gabbaranii, waggaa kudha sadaffaa keessa immoo isa irratti in ka'an.

⁵Kador-Laa'omer, mootonni isaa wajjin turanis waggaa kudha afuraffaatti dhufanii warra Refaa'iim iddoo ?Ashtaarot-Karnaayim? jedhamutti, warra Zuziim iddoo ?Ham? jedhamutti, warra Emiimis bakkee Kiriiyat-Aayimitti rukutan.

⁶Warra Hooris roga tulluu Se'iir irraa kaasanii hamma El-Phaaraan isa daarii lafa onaatti duukaa bu'anii in rukutan.

⁷Isa booddee immoo deebi'anii gara En-Miishphaat isa ?Qaadesh? jedhamee beekamu dhufanii, biyya warra Amaaleqootaa, Amoorota warra Haazezon-Taamaar jiraatanis in balleessan.

⁸Kana irratti mootiin Sodoom, mootiin Gomoraa, mootiin Aadimaa, mootiin Zebo'iim, mootiin Belaa isa ?Zo'aar? jedhamu, ba'anii isaan loluudhaaf dachaa Siidiim keessa in dhaabatan.

⁹Warri isaan itti duulanis, Kador-Laa'omer mootii biyya Elaam, Tidaal mootii biyya saba baay'ee, Amraafel mootii biyya Shiinaar, Aryook mootii biyya Elaasaar turan; mootonni warri duraa shan ta'anii isaan kana arfanitti duulan.

¹⁰Dachaan Siidiim boolla suphee gurraachaatiin guutuu ture; mootiin Sodoomii fi mootiin Gomoraa utuu baqatanii boollatti kukkufan; warri hafan immoo gara tulluutti baqatan.

¹¹Warri isaan ari'an sunis, qabeenya warra Sodoomii fi Gomoraa, midhaan isaanii hundumaas fudhatanii adeeman.

¹²Loox ilma obboleessa Abraam isa Sodoom keessa jiraachaa tures qabeenya isaa wajjin fudhatanii adeeman*.[70]

¹³Namni baqatee ba'e tokko, Abraam Ibricha bira dhufee kana itti hime; yommus Abraam mukkeetii qilxuu Mamree Amorichaa bira in jiraata ture; Mamreen immoo obboleessa Eshkolii fi Aner ture; isaan kun kakuudhaan Abraamii wajjin walitti hidhatanii turan.

¹⁴Abraam booji'amuu ilma obboleessaa isaatii yommuu dhaga'e, namoota dhibba sadii fi kudha saddeet warra mana isaatti dhalatanii lolaaf ga'an birmachiisee, warra booji'e sana hamma Daanitti hordofe*.

¹⁵Namoota isaa warra gargar hire adeemsisuu wajjinis, halkaniin jara sana irra ba'ee isaan rukutee, hamma Hobaa isa Damaasqoo irraa gara harka bitaa jirutti isaan ari'e.

¹⁶Qabeenya isaan fudhatanii turan hundumaa, Loox ilma obboleessa isaa, qabeenya isaa, dubartoota, namoota warra kaanis deebisee in galche.[71]

¹⁷Abraam Kador-Laa'omerii fi mootota isaa wajjin turan rukutee utuu deebi'aa jiruu, mootiin Sodoom dachaa Shaawwee isa ?Dachaa mootii? jedhamutti itti adeemuudhaaf ba'e.

¹⁸Malkiisedeq mootiin Saalem lubni Waaqayyo isa hundumaa gara irraa jiruus, Abraamiif buddeenaa fi daadhii waynii fide;

¹⁹isa eebbisees, ?Waaqayyo inni hundumaa gara irraa jiru, inni waaqaa fi lafa uume, Abraamin haa eebbisu!

²⁰Waaqayyo inni hundumaa gara irraa jiru, inni diinota kee harka kee keessa buuse, haa jajamu!? jedhe. Abraam immoo wanta hundumaa irraa kudhan keessaa tokko isaaf in kenne*.[72]

²¹Mootiin Sodoomis Abraamiin, ?Namoota booji'amanii turan deebisii anaaf kenni, qabeenya kan ta'e immoo ati fudhadhu!? jedhe.

²²Abraam garuu mootii Sodoomiin, ?Ani harka koo gara Waaqayyo gooftaa isa hundumaa gara irraa jiruu fi isa waaqaa fi lafa uumetti ol nan kaasa;

²³kanaanis ati, ?Anatu Abraamin sooromse? akka hin jenneef, waanuma kan kee ta'e keessaa fo'aa yookiis teepha ittiin kophee hidhatan illee akkan hin fudhanne kakadhee sitti nan hima.

²⁴Kan koo haa hafu, garuu wanti namoonni koo nyaatan, ga'aan Aner Eshkolii fi Mamree warra anaa wajjin dhaqanii haa kennamuuf; isaan ga'aa isaanii haa fudhatan!? jedhe.