Read west central oromo Seera Uumamaa 24 Bible Online

Seera Uumamaa 24 - west central oromo bible

Seera Uumamaa 24

¹Yommus Abrahaam dulloomee, barri isaas in sokke; Waaqayyos waan hundumaan Abrahaamin eebbiseera.

²Gaaf tokkos Abrahaam namoota mana isaa keessaa hojjetaa isaa isa jaarsa, isa wanta inni qabu hundumaa irratti abboomaa ture sanaan, ?Kakaadhaaf harka keetiin gudeeda koo gidduu qabi!

³Ati durboota warra Kana'aan warra ani isaan keessa jiraadhu kana keessaa ilma koo akka hin fuusifneef, Waaqayyo gooftaa waaqaa fi lafaatiin sin kaksiisa*!

⁴Biyya koo, lammii koo bira dhaqi! Yisihaq ilma kootiif durba barbaadii fidi!? jedhe*.[105]

⁵Hojjetaan sunis Abrahaamiin, ?Intalattiin ana duukaa buutee biyya kana dhufuu hin barbaaddu ta'a; yoos ilma kee biyya ati keessaa dhufte sanatti deebisee geessuu ree?? jedhee gaafate.

⁶Abrahaamis deebisee, ?Ilma koo achitti akka hin geessine of eeggadhu!

⁷Waaqayyo gooftaan bantii waaqaa, inni mana abbaa kootii, biyya ani itti dhaladhe keessaa baasee na fide, inni, ?Lafa kana sanyii keetiif nan kenna? jedhee anaaf kakate, ergamaa isaa si dura in erga; atis achii ilma kootiif durba barbaaddee in fidda*.

⁸Intalattiin si duukaa buutee dhufuu hin barbaaddu yoo ta'e immoo, ati ilma koo achitti hin geessin malee, kakaan kun si irraa in bu'a? jedhe.

⁹Yommus hojjetichis harka isaatiin gudeeda Abrahaam gooftaa isaa gidduu qabee, dubbii kana irratti isaaf in kakate.

¹⁰Ergasii hojjetichi gaalota gooftaa isaa keessaa kudhan, mi'a gooftaa isaa hundumaa keessaas wanta gaggaarii fuudhee ka'ee, Aaram biyya bishaan lama gidduu sana, gara mandara Naahor keessa jiraateetti in adeeme*.

¹¹Innis mandarichatti utuu hin lixin gaalota isaa bishaan boollaa tokko bira in dhaabachiise; yeroon isaas galgala yeroo dubartoonni bishaan waraabbachuuf ba'an ture.

¹²Hojjetichis, ?Yaa Waaqayyo gooftaa isa kan Abrahaam gooftaa kootii, ati har'a adda anaaf kenni, Abrahaam gooftaa kootti gaarummaa argisiisi!

¹³Kunoo, ani boolla bishaanii kana bira dhaabachaan jira, durboonni warra mandara kanaa bishaan waraabbachuuf ba'uuf jiru.

¹⁴Ani durba tokkoon, ?Mee bishaanan dhugaa gomboo kee gad anaaf qabi!? nan jedha; isheen immoo, ?Ati dhugi, gaalota kees nan obaasa? yoo anaan jette, isheen kun ishee ati Yisihaq garbichaa keef yaaddee qopheessite haa taatu! Kanaanis ati gooftaa kootti gaarummaa argisiisuu kee nan beeka? jedhe.[106]

¹⁵Hojjetichi kana dubbatee utuu afaanii hin fixin, kunoo, Ribqaan gomboo gatiittii irratti baattee dhufte; isheen intala Batu'el; Batu'el immoo ilma Naahor obboleessa Abrahaam; haati isaa immoo Miilkaa dha*.

¹⁶Intalattiin baay'ee ija namaatti in tolti, durba dhiirri bira hin ga'inis turte; isheen gara boolla bishaanichaatti gad buutee, gomboo ishees guutattee ol deebite.

¹⁷Hojjetaan sunis ariitiidhaan gara isheetti adeemee, ?Hadaraa! Gomboo kee keessaa bishaan xinnoo ishee na habuuqqachiisi!? jedhe.

¹⁸Isheenis, ?Dhugi gooftaa ko? jettee, daftee gomboo ishee harkatti gad buufattee, isa obaafte.

¹⁹Erga isa dheebuu baaftee booddee immoo, ?Gaalota keetiifis hamma isaan dhuganii quufanitti nan waraabaaf? jette;

²⁰isheen daftee bishaanicha gomboo ishee keessaa bidiruutti gara galchitee ammas bishaan waraabuudhaaf fiigichaan gara boolla bishaaniitti gad buute; gaalota isaa hundumaafis bishaan in waraabde.

²¹Namichis Waaqayyo karaa isaa in qajeelcha yookiis hin qajeelchu yoo ta'e baruudhaaf, calluma jedhee ishee in ilaala ture.[107]

²²Gaalonni isaa yeroo bishaan dhuganii quufan, namichi amartii warqee akka rubii waqeetaa ta'u isa funyaanitti kaa'atan, bitawoo warqee lamaan akka waqeeta shanii kan ta'anis harkatti akka isheen kaa'attuuf gad fuudhee in kenneef.

²³Isheedhaanis, ?Ati intala eenyuu ti? Mana abbaa keetiittii immoo iddoo bultii in argannaa? Hadaraa anatti himi!? jedhe.

²⁴Isheenis namichaan, ?Ani intala Batu'el; innis ilma Naahor; haati isaa immoo Miilkaa dha.

²⁵Nuyi afaa, okaas baay'ee qabna, iddoon bultiis immoo jira? jette.

²⁶Namichis gad gugguufee Waaqayyoof sagadee,

²⁷?Waaqayyo gooftaan inni kan Abrahaam gooftaa kootii haa jajamu! Inni gaarummaasaa fi amanamummaa isaa gooftaa kootti argisiisuu hin dhiifne; Waaqayyo ana immoo karaa irra buusee gara mana obboleessa gooftaa kootti na fide? jedhe.

²⁸Intalattiinis fiigdee wanta ta'e hundumaa namoota mana haadha ishee jiranitti in himte.

²⁹Ribqaan kun obboleessa ?Laabaan? jedhamu tokko qabdi turte; innis fiigichaan gara namicha isa bakkee boolla bishaanii bira jiruu dhaqee,

³⁰amartii funyaanii fi bitawoo harkaa Ribqaa obboleettii isaa irratti argee, isa obboleettiin isaa, ?Namichi akkas anaan jedhe? jettes dhaga'e; gara namichaa yeroo dhaqetti, kunoo, namichi gaalota bira boolla bishaanii bukkee in dhaabata ture.

³¹Laabaan yommus namichaan, ?Yaa namicha Waaqayyo eebbise, kottu maaliif bakkee dhaabatta? Ani manicha qopheesseera, gaalotaafis iddoo qopheesseera? jedhe.

³²Namichis gara manaa in dhaqe; Laabaanis gaalota irraa hiikee midhaanii fi okaa kenneefii, namichaa fi warra namichaa wajjin adeemaniifis bishaan miillaa in kenne.

³³Yeroo nyaanni dhi'aatefitti immoo namichi, ?Dhimma koo utuun hin himatin hin nyaadhu!? jedhe; Laabaanis, ?Himadhu kaa!? jedhe.

³⁴Yommus namichi, ?Ani hojjetaa Abrahaamii dha;

³⁵Waaqayyo, gooftaa koo kana baay'ee eebbisee, nama guddaa isa godheera; inni hojjetoota dhiiraa fi dubartii, bushaayee, saawwa, meetii, warqee, gaalota, harrootas kenneeraaf.

³⁶Saaraan haati manaa gooftaa koos erga lafa guurtee, gooftaa kootiif ilma godhatte; innis wanta qabu hundumaa ilma isaa kanaaf kennuuf jira.

³⁷Gooftaan koo na kaksiisee, ?Durboota biyya Kana'aan isa ani keessa jiraadhu keessaa ilma koo hin fuusisin!

³⁸Gara mana abbaa koo gara qomoo koo dhaqiitii, achii durba barbaadii fidiif!? jedhee na abboomeera? jedhe.

³⁹Anis gooftaa kootiin, ?Intalattiin na duukaa hin dhuftu ta'a? nan jedhe.

⁴⁰Inni immoo, ?Waaqayyo inni akka deddeebii kootii ilaalu, ergamaa isaa sii wajjin in erga, karaa kees in qajeelcha; atis qomoo koo keessaa mana abbaa kootii keessaa ilma koof durba barbaadii fidiif!

⁴¹Waa'ee kakaan koo si irraa bu'uu isaatii immoo, ati gara qomoo koo dhaqxee, isaan sitti hin kennan yoo ta'e, kakaan koo si irraa in bu'a? anaan jedhe.

⁴²Har'a immoo ani dhufee burqituu bishaanii bira yommuun ga'e, ?Yaa Waaqayyo, gooftaa isa kan Abrahaam gooftaa kootii, waan ani adeemuuf kana karaa isaa anaaf qajeelchi!

⁴³Kunoo, ani amma burqituu bishaanii bira dhaabadheen jira; ani intala bishaan waraabbachuu dhuftu tokkoon, ?Gomboo kee keessaa bishaan xinnoo ishee na obaasi!? nan jedha;

⁴⁴yommus isheen immoo, ?Dhugi, gaalota keefis nan waraaba? yoo anaan jette, isheen kun ishee Waaqayyo ilma gooftaa kootiif yaadee qopheesse haa taatu!? nan jedhe.

⁴⁵Ani yaada koo keessatti kana dubbadhee utuun hin fixin, kunoo, Ribqaan gomboo gatiittii irratti baattee dhufte; isheen gara boolla bishaanichaatti gad buutee, bishaan waraabde; anis isheedhaan, ?Hadaraa, bishaan na obaasi!? nan jedhe.

⁴⁶Isheen yommus daftee gomboo ishee of irraa gad buuftee, ?Ati dhugi, gaalota kees immoo nan obaasa? jette; anis nan dhuge, gaalotas immoo in obaafte.

⁴⁷Kana booddees, ?Ati intala eenyuu ti?? jedheen ishee gaafadhe; isheen immoo deebiftee, ?Ani intala Batu'el; innis ilma Naahor, haati isaa immoo Miilkaa dha? jette; ani immoo funyaan isheetti amartii, harka isheettis bitawoo nan kaa'e;

⁴⁸gad gugguufees Waaqayyoof nan sagade; Waaqayyo gooftaa isa kan Abrahaam gooftaa kootii, isa intala obboleessa gooftaa kootii fuudhee ilma isaatiif akkan geessuuf karaa qajeelaa irra ana buuse nan jajadhe.

⁴⁹Egaa, ?Isin amma gaarummaa fi amanamummaa gooftaa kootti in argisiiftu yoo taatan anatti himaa! Kun yoo ta'uu dhabaates gara bitaatti yookiis mirgaatti akkan goruuf anatti himaa!? jedhe.

⁵⁰Yommus Laabaanii fi Batu'el deebisanii, ?Dubbiin kun Waaqayyo biraa dhufe, nuyi ?Kanatu bade, kanatu tole? jennee sitti dubbachuu hin dandeenyu.

⁵¹Kunoo! Ribqaan fuula kee dura jirti, fuudhii dhaqi! Akkuma Waaqayyo yaade, ilma gooftaa keetiif haadha manaa haa taatu!? jedhan.

⁵²Hojjetaan Abrahaamis wanta isaan dubbatan kana yommuu dhaga'e, lafatti gad gugguufee Waaqayyoof sagade.

⁵³Hojjetichi kana booddee naqata meetii fi naqata warqee uffata babba'eessa fidee Ribqaadhaaf kenne; obboleessa isheef haadha isheefis immoo kennaa gati-jabeessa in laate.

⁵⁴Innii fi namoonni isaa wajjin turan nyaatanii dhuganii achuma bulanii, borumtaas ganamaan in ka'an; namichis, ?Gara gooftaa kootti nan deebi'a, na geggeessaa!? jedhe.

⁵⁵Obbooleessi ishee fi haati ishee namichaan, ?Intalli hamma guyyaa kudhaniitti illee takka nu bira turtee haa adeemtu!? jedhan.

⁵⁶Namichi garuu isaaniin, ?Waaqayyo karaa koo erga anaaf qajeelchee, gara gooftaa koo akkan dhaquuf na geggeessaa malee, isin ana hin tursinaa!? jedheen.

⁵⁷Isaanis, ?Mee, intala waamnee wanta isheen jettu in gaafanna!? jedhan.

⁵⁸Ribqaas waamanii, ?Namicha kanaa wajjin ammuma in dhaqxaa?? jedhanii in gaafatan; isheenis, ?Eyyee nan dhaqa? jette.

⁵⁹Isaanis Ribqaa obboleettii isaanii, guddisee ishee, hojjetaa Abrahaam, namoota isa duukaa turanis in geggeessan.

⁶⁰Yommuu kaasanis, ?Yaa obboleettii keenyaa! Ati kuma kumaatamaa ta'i! Sanyiin kee karra kellaa warra isa jibbanii haa qabatu, mandaroota isaaniis kan isaa haa godhatu!? jedhanii Ribqaa in eebbisan*.

⁶¹Ribqaan, xomboreewwan ishees ka'anii gaalota yaabbatanii namicha duukaa in adeeman; innis Ribqaa fuudhee in adeeme.[108]

⁶²Yisihaq yeroo sana gara bishaan boollaa ?Be'er-Lahaayi-Ro'i? jedhamuu dhufee, biyya gara mirgaa sana keessa in jiraata ture*.

⁶³Innis gaaf tokko gara galgalaa bakkeetti ba'ee yaadaan qabamee utuu adeemuu, ol ilaalee, gaalota as adeemaa jiran arge.

⁶⁴Ribqaanis ol ilaaltee Yisihaqin argitee, gaala irraa buute;

⁶⁵yommus isheen hojjetaa ishee fuudhee adeemu sanaan, ?Namichi bakkee keessaa as nutti adeemu sun eenyu?? jette; hojjetichis, ?Inni ilma goftaa kootii ti? jedhee deebiseef; kana irratti isheen shaashii fudhattee ofitti haguugde.[109]

⁶⁶Hojjetichis wanta hojjette hundumaa Yisihaqitti hime.

⁶⁷Yisihaq gara dunkaana Saaraa haadha isaatti ishee in galfate; inni Ribqaa fuudhee, isheenis haadha manaa isaa taate; ishee jaallatee, gadda haadha isaa irraas in jajjabaate.