Read west central oromo Seera Uumamaa 25 Bible Online

Seera Uumamaa 25 - west central oromo bible

Seera Uumamaa 25

¹Abrahaam haadha manaa kan biraa fuudhe; maqaan ishees ?Qexuuraa? jedhama ture.

²Isheen ijoollee, ?Zimraan, Yokshaan, Medaan, Miidiyaan, Ishbaak, Shuwaa? jedhaman in deesseef.

³Yokshaan immoo Sheebaa fi Dedaanin dhalche; ilmaan Dedaan, Ashuriim, Letushiim, Le'umiim;

⁴ilmaan Miidiyaan immoo, Efaa, Efer, Henok, Abiidaa, Elda'aa turan; isaan kun hundinuu ijoollee warra Qexuuraan hortee dha.

⁵Abrahaam wanta qaba ture hundumaa Yisihaqiif in kenne.

⁶Ijoollee saajjatoota isaatiif garuu Abrahaam fayyaatti utuu jiruu kennaa kekkenneefii, ilma isaa Yisihaq irraa kaasee, gara boruutti biyya ba'a-biiftuutti isaan erge.

⁷Barri Abrahaam jiraate waggaa dhibbaa fi torbaatamii shan ture.

⁸Abrahaam in obbaafate; ba'eessa godhee dulloomee baras quufee in du'e, gara saba isaattis in sassaabame*.

⁹Yisihaqii fi Ishmaa'el ilmaan isaa, holqa Makfelaa maasii Efron ilma Zohaar Heetichaa, isa Mamree irraa gara ba'a-biiftuutti hafu sana keessatti, isa in awwaalan.

¹⁰Maasichi isa Abrahaam ijoollee Heet irraa bitee ture; Abrahaam haadha manaa isaa Saaraa biratti achitti awwaalame*.

¹¹Abrahaam erga du'ee, Waaqayyo Yisihaqin ilma Abrahaam in eebbise; Yisihaqis ?Be'er-Lahaayi-Ro'i? iddoo jedhamu in taa'e*.[110]

¹²Hiddi dhaloota sanyii Ishmaa'el isa Aggaar xomboreen Saaraa isheen nama biyya Gibxii sun Abraamiif deesse, kanatti fufee in lakkaa'ama;

¹³maqaan ilmaan Ishmaa'el akkuma tarree dhaloota isaaniitti, Nabaayot ilma Ishmaa'el isa angafa, Qedaar, Adbi'el, Miibsaam,

¹⁴Miishmaa, Dumaa, Maasaa,

¹⁵Hadaad, Temaa, Yetuur, Nafiish, Qedimaas ture.

¹⁶Ilmaan Ishmaa'el isaan kana turan; gandi isaaniif lafti buufata isaanii maqaa isaanii kanaan in waamamu; akka gosa isaaniittis gurguddoota kudha lama qabu*.

¹⁷Barri Ishmaa'el jiraate waggaa dhibbaa fi soddomii torba ture; Ishmaa'el in obbaafate, gara sanyii isaattis in sassaabame.

¹⁸Inni fuullee obboloota isaa hundumaa qabatee waan tureef, ijoolleen isaa lafa ?Awiilaa fi Shuur? jedhaman gidduu taa'an; innis lafa yeroo gara biyya Asoritti adeeman fuullee Gibxiitti mul'atuu dha.[111]

¹⁹Hiddi dhaloota sanyii Yisihaq ilma Abrahaam kanatti fufee in lakkaa'ama; Abrahaam Yisihaqin dhalche.

²⁰Yisihaq nama waggaa afurtamaa yeroo ta'e, Ribqaa in fuudhe; isheen intala Batu'el nama Aaram isa Phaadaan-Aaram[112] sanaa ti; isheen obboleettii Laabaan nama Aaram turte.

²¹Yisihaq waa'ee haadha manaa isaa ishee dhabduu turteef Waaqayyoon kadhate; Waaqayyos wanta inni kadhate waan dhaga'eef, Ribqaan haati manaa Yisihaq in ulfoofte.

²²Ijoolleen garaa ishee keessatti wal in dhidhiitu turan; isheenis, ?Erga akkas ta'ee, kun maal anaaf godha ree?? jette; kanas Waaqayyoon gaafachuu in dhaqxe.

²³Waaqayyos isheedhaan, ?Gadameessa kee keessa saba lamatu jira; gosoonni lamaan si irraa dhalatanis gargar in hiramu; gosa isa tokkotu isa kaan irra jabaata; isa angafatu isa quxisuudhaaf ergama!? jedhe*.[113]

²⁴Yeroon da'uu ishee yommuu ga'e, kunoo lakkuun gadameessa ishee keessa turan.

²⁵Inni duraa diimaa, dhagni isaa hundinuus akka uffata dabbasaa qabuu rifeensa'aatu as ba'e; maqaas isaa ?Esaawuu? jedhaniin.

²⁶Isa booddeedhaan immoo obboleessi isaa as ba'e; harki isaa koomee Esaawuu qabatee ture; maqaan isaas ?Yaaqoob? jedhame; yeroo isaan dhalatan Yisihaq nama waggaa jaatamaa ture*.[114]

²⁷Ijoolleen kunis in guddatan; Esaawuun nama akka itti adamsu beeku, nama bakkee oolu ta'e; Yaaqoob garuu nama amal-toleessa qe'ee keessa oolu ture.

²⁸Yisihaq wanta inni adamsee fidu nyaachuun waan itti toluuf, Esaawuu in jaallata ture; Ribqaan garuu Yaaqoobin in jaallatte.

²⁹Gaaf tokko utuu Yaaqoob nyaata tolchuutti jiruu, Esaawuun bakkeedhaa dhufee ol gale; isas uruuriin dha'ee ture.

³⁰Esaawuun yommus Yaaqoobiin, ?Amma uruuriin na dha'eraa, nyaata diimaa sana akkan nyaadhuuf anaaf kenni!? jedhe; kanaafis maqaan isaa ?Edoom? jedhame; [?Edoom? jechuun ?Diimticha? jechuu dha].

³¹Yaaqoob immoo, ?Ati dura angafummaa kee anatti gurguri kaa!? jedheen.

³²Esaawuunis, ?Anoo amma du'uu ga'e, angafummaan kun maal anaaf godha ree?? jedheen.

³³Yaaqoob immoo, ?Dura anaaf kakadhu!? jedhe; innis in kakateef; akkasittis angafummaa isaa Yaaqoobitti in gurgure*.

³⁴Yommus Yaaqoob buddeenaa fi ittoo misiraa sana Esaawuuf in kenne; innis nyaatee, dhugee, ka'ees karaa isaa irra in bu'e; Esaawuun akkasitti angafummaa isaa in tuffate.[115]