Read west central oromo Seera Uumamaa 31 Bible Online

Seera Uumamaa 31 - west central oromo bible

Seera Uumamaa 31

¹Ilmaan Laabaan, ?Kan abbaa keenyaa kan ture hundumaa Yaaqoobtu fudhate, kan abbaa keenyaa isa tureenis badhaadhummaa kana hundumaa argate? ittiin jechuu isaanii Yaaqoob in dhaga'e.

²Akkasumas Laabaan akka isaa durii akka faara itti hin tolle, Yaaqoob fuula isaa irraa in arge.

³Waaqayyo yommus Yaaqoobiin, ?Gara biyya abboota keetti, gara lammii keettis deebi'i, anis sii wajjin nan ta'a!? jedhe.

⁴Yaaqoob kanaaf Raahelii fi Liyaatti ergee, gara bakkee lafa karri bushaayee isaa jiranitti in waamsise.

⁵Isaaniinis, ?Abbaan keessan amma akka isaa durii akka faara anatti hin tolle, ani fuula isaa irraa nan arga; Waaqayyo inni kan abbaa kootii garuu anaa wajjin ta'eera.

⁶Ani humna koo guutuudhaan abbaa keessaniif akkan hojjedhe immoo, isin in beektu.

⁷Inni garuu na gowwoomsee gatii dadhabbii koo si'a kudhan geddare; haa ta'u iyyuu malee, Waaqayyo akka inni na miidhu hin goone.

⁸Yeroo Laabaan, ?Warri xiiffeen gatii dadhabbii kee haa ta'an? jedhe, karri bushaayee hundinuu ilmoolee xiiffee in dhalu turan; yeroo inni, ?Warri qaxxaamurroo qaban gatii dadhabbii kee haa ta'an? jedhes, karri bushaayee hundinuu qaxxaamurroo dhalan.

⁹Akkasitti Waaqayyo horii abbaa keessanii isa harkaa baasee, anaaf kenneera.

¹⁰?Yeroo bushaayeen korbeessa kajeelanitti, ani ol ilaalee abjuutti korbeeyyiin warri qaxxaamurroo qaban, xiiffeen, booxxoon, utuu bushaayee hobobsanii nan arge.

¹¹Yommus ergamaan Waaqayyoo abjuutti, ?Yaaqoob!? naan jedhe; anis, ?Asan jira!? nan jedheen.

¹²Innis, ?Ani wanta Laabaan si irratti hojjete waanan argeef, ol jedhi, korbeeyyiin warri bushaayee hobobsan hundinuu qaxxaamurroo kan qaban, xiiffee, booxxoos akka ta'an ilaali!

¹³Ani Waaqayyo isa Bet'el iddoo ati utubaa dibdee wareega itti anaaf wareegde sanatti sitti mul'atee dha; ammas ka'i, biyya kana keessaa ba'ii adeemi, gara biyya lammii keettis deebi'i!? naan jedhe? jedhe*.[150]

¹⁴Raahelii fi Liyaanis deebisanii, ?Ga'aan, dhaallis mana abbaa keenyaa keessa nuuf jiraa ree?

¹⁵Nuyi isa biratti akka ormaatti ilaalamneerra mitii ree? Inni nu gurgureera, horii waa'ee keenyaaf kennames nyaatee fixe mitii ree?

¹⁶Badhaadhummaan inni abbaa keenya kana harkaa Waaqayyo baase immoo kan keenya, kan ijoollee keenyaa tis; kanaaf amma ati waanuma Waaqayyo siin jedhe godhi!? ittiin jedhan.

¹⁷Ergasii Yaaqoob ilmaan isaa fi dubartoota isaa gaala irra kaa'atee in ka'e;

¹⁸inni horii qe'ee hundumaa, mi'a manaa isa argate hundumaas, horii qe'ee qabeenya isaa keessaa warra Phaadaan-Aaramitti horate oofatee gara biyya Kana'aan, gara abbaa isaa Yisihaq dhaquudhaaf in ka'e.

¹⁹Laabaan hoolota irraa rifeensa murmurachuu dhaqee ture; Raahelis Waaqayyo tolfamaa isa kan abbaa ishee mana keessaa in hatte*;

²⁰Yaaqoob akka baqachuu yaade isatti himachuu dhiisuu isaatiin, Laabaanin namicha biyya Aaram sana garaa nyaachise.

²¹Inni wanta qabu hundumaa wajjin baqatee, laga Efraaxiis in ce'e; fuula isaas gara tulluu Giil'aaditti in qajeelfate.[151]

²²Yaaqoob akka baqate gaafa guyyaa sadaffaa Laabaanitti himame;

²³inni yommus namoota aantii isaa fudhatee, guyyaa torba Yaaqoobin ari'ee, Giil'aad biyya tulluu gubbaatti isatti in dhi'aate.

²⁴Waaqayyo garuu halkan abjuutti Laabaan nama biyya Aaram sana bira dhufee, ?Gaarii malee hamaa Yaaqoobitti akka hin dubbanne of eeggadhu!? jedheen.

²⁵Laabaan, Yaaqoobin in qaqqabe; Yaaqoob biyya tulluu gubbaa sana keessa dunkaana isaa dhaabbatee ture; Laabaanis namoota aantii isaa wajjin Giil'aad biyya tulluu gubbaa sana keessa dunkaana isaa in dhaabbate.

²⁶Laabaan achitti Yaaqoobiin, ?Ati na sossobdee, intaloota koos akka waan billaadhaan booji'amaniitti fudhattee sokkuu keetiin maal gochuu kee ti?

²⁷Ati maaliif dhoksaatti baqatte? Maaliifis na sossobde? Ani gammachuudhaan, weedduudhaan, dibbeedhaa fi kiraaraan akkan si geggeessutti maaliif anatti himuu didde?

²⁸Maaliifis akka ani intalootaa koo fi ijoollee koo dhudhungadhee nagaa itti hin dhaamne goote? Egaa kana ati gowwummaadhaan hojjette.

²⁹Si, namoota kees miidhuu illee nan danda'an ture, garuu Waaqayyo inni kan abbaa keetii eda halkan, ?Ati gaarii malee hamaa Yaaqoobitti akka hin dubbanne of eeggadhu!? naan jedhe;

³⁰adeemuu illee ati mana abbaa kee baay'iftee waan yaaddeef adeemte ta'a, garuu waaqayyolii koo immoo maaliif hatte?? jedhe.

³¹Yaaqoob immoo deebisee, ?Intaloota kee humnaan ana irraa fudhatta jedhee waanan sodaadheef, utuu sitti hin himin nan sokke;

³²Yaaqoob akka Raahel waaqayyolii Laabaan hattee turte waan hin beekiniif, namni ati waaqayyolii kee biratti argattu hafee hin jiraatu; fuula aantii keenyaa kana duratti mi'a koo keessa ilaaltee, yoo argite fudhadhu!? jedheen*.[152]

³³Laabaanis dunkaana Yaaqoob, dunkaana Liyaas lixee, darbees dunkaana xomboreewwan lamaanii lixe; garuu waaqayyolii isaa hin arganne; dunkaana Liyaa keessaa ba'ees kan Raahel in lixe.

³⁴Raahel immoo waaqayyolii mana keessaa sana fuutee koraa gaalaa jala keessee irra teesse; Laabaanis waanuma dunkaanicha keessa ture hundumaa qaqqabee in ilaale; garuu waaqayyolii isaa hin arganne.

³⁵Isheenis abbaa isheetiin, ?Garaa dhukkubbiin anatti dhufnaan, siif ka'uu waanan dadhabeef, ati gooftaan koo anatti aartee hin boba'in!? jette; inni akkasitti yoo fonqolche iyyuu waaqayyolii mana keessaa sana hin arganne*.[153]

³⁶Yommus Yaaqoob aaree, Laabaanitti ori'ee, ?Maalan balleesse? Cubbuun koo inni ati faana dhooftee na ari'aa dhufteefis maali?

³⁷Mi'a koo hundumaa keessa yoo fonqolchite iyyuu, mi'a mana kee hundumaa keessaa maalfaa argatte? Yoo jiraate, isaan nu lamaan gidduutti akka faradaniif, aantii koo fi aantii kee kana dura kaa'i!

³⁸Ani waggoota digdaman si bira ture; kana keessatti hoolonnii fi re'oonni kee warri dhaltuun hin gatanne; korbeeyyii bushaayyee keetiis ani hin nyaanne.

³⁹Horii warra bineensi caakkaa cabses, hir'ina isaa ofitti nan lakkaa'e malee, fidee sitti hin argisiifne; warra guyyaa butaman, warra halkan butamanis, ati harka koo keessaa eeggatte.

⁴⁰Ani akkasitti nan ture; guyyaa ho'a isaa, halkanis qora isaatu na waxale; hirribnis ija koo irraa in baqate.

⁴¹Waggaa digdaman kana ani mana kee keessan ture; waggaa kudha afur intaloota kee lamaaniif, waggaa ja'a immoo bushaayyee keefan siif hojjedhe; atis kana keessatti gatii dadhabbii koo si'a kudhan geddarte*.

⁴²Waaqayyo inni kan abbaa kootii, Waaqayyo inni kan Abrahaam, inni Yisihaq safeeffatu utuu gara koo goruu dhabaatee, ati amma harka koo duwwaa na ergita turte; Waaqayyo garuu gad deebi'uu koo fi harkaan itti dadhabee hojjechuu koo argee, eda halkan si ifate? jedheen*.[154]

⁴³Laabaan deebisee Yaaqoobiin, ?Dubartoonni kun intaloota koo ti, ijoolleen kun ijoollee koo ti, bushaayeen kunis bushaayee koo ti, wanti ati argitu hundinuu kan koo ti; garuu ani har'a intaloota koo kanaa fi ijoollee isaanii warra isaan da'aniif maal gochuun danda'a*?

⁴⁴Kottu, ammas anii fi ati kakaadhaan walii in gallaa, innis sii fi ana gidduutti dhugaa ba'uudhaaf haa ta'u!? jedhe.

⁴⁵Yaaqoobis dhagaa tokko fuudhee utubaa seenaa godhee ol qajeelchee in dhaabe;

⁴⁶Yaaqoob aantii isaatiin, ?Dhagaa walitti qabaa!? jedhe; isaanis dhagaa fidanii tuulanii, isa irratti in nyaatan.

⁴⁷Laabaan afaan Aaramitti, ?Yegaar-Sahadutaa[155]? jedhee tuullaa sana in moggaase; Yaaqoob immoo afaan Ibrootaatti ?Gaal-Ed? jedhee in moggaase.

⁴⁸Laabaan, ?Tuullaan kun har'a sii fi ana gidduutti dhuga-baatuu dha? jedhe; kanaaf ?Gaal-Ed? jedhee isa moggaase*.

⁴⁹Akkasumas, ?Waaqayyo yeroo nuyi walittii gargar baanutti, sii fi ana gidduutti eegduu haa ta'u!? waan jedheef, ?Maqaan isaa Miisphaadhas? jedheera*.

⁵⁰Itti dabalees, ?Ati intaloota koo kana yoo rakkifte, intaloota koo irratti yoo fuute, namni nu bira yoo jiraachuu dhabaate illee, Waaqayyo sii fi ana gidduutti akka dhugaa ba'u yaadadhu!? jedhe.[156]

⁵¹Laabaan itti dabalee Yaaqoobiin, ?Tuullaa kana, utubichas isa ani sii fi ana gidduu dhaabe ilaali!

⁵²Tuullaan kun dhuga-baatuu dha, utubichis ani tuullaa kana akkan sitti hin darbine, ati miidhaadhaaf tuullaa kana, utubaa kanas akka anatti hin darbineef dhuga-baatuu dha.

⁵³Waaqayyo inni kan Abrahaam, Waaqayyo inni kan Naahor, Waaqayyo inni kan abbaa isaanii nu gidduutti in farada? jedhe; Yaaqoob akkasitti isa abbaan isaa Yisihaq safeeffatuun in kakate.

⁵⁴Yaaqoob biyya tulloota irratti aarsaa dhi'eessee, aantii isaas buddeena akka nyaataniif in waame; isaanis buddeena nyaatanii, halkan guutuu achi turan.

⁵⁵Laabaan ganama bariidhaan ka'ee, ijoollee isaa, intaloota isaas dhudhungatee, isaan in eebbise; kana booddee Laabaan isaanittii gargar ba'ee gara iddoo isaatti in deebi'e.