Read west central oromo Seera Uumamaa 34 Bible Online

Seera Uumamaa 34 - west central oromo bible

Seera Uumamaa 34

¹Dhinee intalli Yaaqoob, isheen Liyaan deesse, durboota biyya sanaa ilaaluudhaaf in baate*.

²Sheekem ilmi Hamoor nama Hiiwoo, abbaa biyya sanaa yommuu ishee arge, ishee butee wajjin ciisee ishee salphise.

³Yaadni isaa Dhinee intala Yaaqoob duukaa in sokke; inni intalattii in jaallata, garaa intalaa kan ittiin laaffifatus in dubbata ture.

⁴Sheekem abbaa isaa Hamooriin immoo, ?Intala kana na fuusisi!? jedhe.

⁵Sheekem Dhinee irraa ulfina erga fuudhee, Yaaqoob waan intalli isaa taate dhaga'e; garuu ilmaan isaa lafa horii tikaa waan jiraniif, hamma isaan galanitti calluma jedhe.[163]

⁶Hamoor abbaan Sheekemis Yaaqoobii wajjin dubbachuudhaaf gara isaa dhaqe.

⁷Ilmaan Yaaqoob lafa tikaatii galanii, wanta ta'e yommuu dhaga'an, garaan isaanii in gubate, aaraniis in boba'an; wanti namichi intala Yaaqoobii wajjin ciisuu isaatiin hojjete, Israa'el keessatti waan hin taanee dha; wanti akkasii hojjetamuun hin ta'u ture.

⁸Kana gidduutti Hamoor isaaniin, ?Yaadni Sheekem ilma koo intala keessan duukaa sokke; hadaraa, ishee ilma koof kennaa!

⁹Fuudhaa fi heerumaan nutti firoomaa; durboota keessan nuuf kennaa, durboota keenyas fuudhaa!

¹⁰Nuu wajjin taa'aa, lafti isin dura jira, lafa barbaaddan taa'aa, asii fi achi adeemaa nagaddadhaa, araddaas godhadhaa!? jedhe.

¹¹Sheekemis immoo abbaa intalaa fi obbolaa isheetiin, ?Fuula keessan duratti faara argachuun koo haa ta'u malee, waanuma isin jettan nan kenna;

¹²qaraxa, kennaa kennamus guddisaa anatti baay'isaa! Intala anaaf kennaa duwwaa malee, ani waanuma isin jettan nan kenna? jedhe*.[164]

¹³Ilmaan Yaaqoob immoo Sheekem kun Dhinee obboleettii isaanii irraa ulfina waan fuudheef, isaaf, Hamoor abbaa isaatiifis haxxummaadhaan deebii kennaniif.

¹⁴Isaanis Sheekemiif abbaa isaatiin, ?Nuyi nama dhagna hin qabatiniif obboleettii keenya kennuu hin dandeenyu; wanta akkasii kana gochuun nutti yeelloo dha;

¹⁵isin akka keenya taatanii dhiironni keessan hundinuu dhagna akka qabatan yoo gootan duwwaa, tole isiniin jenna*.

¹⁶Isa booddee, nuyi durboota keenya isiniif in kennina, durboota keessanis in fuuna; isinii wajjin in jiraanna, saba tokkos in taana.

¹⁷Dubbii nuyi isinitti himnu kana dhageessanii yoo dhagna qabachuu dhabaattan, nuyi intala keenya in fudhanna, in adeemnas? jedhan.

¹⁸Wanti isaan dubbatan Hamoorii fi Sheekem ilma Hamooritti ba'eessa ta'ee mul'ate.

¹⁹Dargaggeessichi intala Yaaqoobitti waan gammaduuf, wanta jedhame gochuudhaaf hin tursine; inni namoota mana abbaa isaa hundumaa irra caalaa ulfina qaba ture.[165]

²⁰Hamoorii fi Sheekem ilmi isaa gara balbala kellaa mandara isaanii dhufanii, namoota mandara isaaniitiin,

²¹?Jarri kun warra nagaa dha, nuu wajjin biyya haa taa'an, asii fi achi adeemaniis haa naggadatan! Bal'inni lafichaas kunoo karaa hundumaa isaan in ga'a; nus intaloota isaanii in fuuna, intaloota keenyas isaaniif in kenninaa!

²²Akkuma isaan dhagna qabatan, nuyis dhiira kan ta'e hundumaa yoo dhagna qabne duwwaa, namoonni kun tole jedhanii, nuu wajjin in jiraatu; saba tokkos in taana.

²³Karri horii gaanfaa, wanti isaan qaban, horiin biraa isaan qe'eedhaa qaban hundinuus kan keenya in ta'u mitii ree? Wanta isaan jedhan kana tole yoo jenne duwwaa, isaanis nuu wajjin in jiraatu? jedhan.

²⁴Namoonni balbala kellaa mandara isaaniitiin darban hundinuu, Hamoorii fi Sheekem ilma Hamooriif in dhaga'an; dhiirri balbala kellaa mandara isaaniitiin darbu hundinuu dhagna in qabame.

²⁵Isaanis dhagna qabatanii gaafa guyyaa sadaffaa yeroo dhukkubbiin isaanitti dhaga'amutti, ilmaan Yaaqoob keessaa lamaan Shimi'oonii fi Lewwii kan jedhaman obboloonni Dhinee adduma addaan billaa fudhatanii, warri mandaricha keessaa ?Biyyi nagaa dha? jedhanii utuu taa'anii, irra ba'anii, dhiira hundumaa ajjeesan*.

²⁶Hamoorii fi Sheekem ilma isaa qara billaatiin ajjeesanii Dhinee immoo mana Sheekemii fudhatanii ba'an.

²⁷Ilmaan Yaaqoob sababii obboleettii isaanii irraa ulfinni fuudhameef, warra waraanaman sana irra ba'anii mandaricha saaman;

²⁸bushaayee isaanii, saawwan isaanii, harroota isaanii, wanta mandara keessaa, wanta ala tures in fudhatan;

²⁹wanta jara biratti gatii qabu hundumaa, mucoolii isaanii, dubartoota isaaniis booji'anii, wanta mana jiru hundumaas in saaman.[166]

³⁰Yaaqoobis Shimi'oonii fi Lewwiidhaan, ?Warri biyya kanaa, warri Kana'aan, warri Pheriizonni jibbanii akka ana ajeeffatan gochuun keessan dubbiitti na galchitaniittu; lakkoobsi nama kootii muraasa; isaan anatti dacha'anii na rukutu, ani, maatiin koos lafa irraa in balleeffamna? jedhe.

³¹Isaan garuu, ?Yoos akkuma gaalamootaatti obboleettii keenyatti haa taphatuu ree?? jedhan.