Read west central oromo Seera Uumamaa 35 Bible Online

Seera Uumamaa 35 - west central oromo bible

Seera Uumamaa 35

¹Waaqayyo yommus Yaaqoobiin, ?Ka'ii gara Bet'elitti ol ba'i, achi taa'i! Ana Waaqayyo isa yeroo ati Esaawuu obboleessa kee duraa baqattetti sitti mul'ateef, iddoo aarsaa ijaari!? jedhe*.

²Kana irratti Yaaqoob warra mana isaa fi namoota isaa wajjin turan hundumaan, ?Waaqayyolii ormaa kan qabdan of gidduudhaa baasaa, of qulleessaa, uffata keessanis geddaradhaa*!

³Kottaa gara Bet'el in dhaqnaa! Ani achitti Waaqayyo isa guyyaa rakkina kootti deebii anaaf kenne, karaa koo hundumaatti anaa wajjin tureef, iddoo aarsaa nan ijaara? jedhe.

⁴Yommus isaan waaqayyolii ormaa warra isaan harka turan, amartii gurra isaanii isa qorichummaadhaaf kaa'atanis, fidanii Yaaqoobitti kennan; inni immoo qilxuu isa Sheekemitti dhi'oo jiru jala in awwaale.[167]

⁵Yeroo isaan ka'anii adeemanitti, namni tokko illee akka isaan hin hordofnetti, naasisuun Waaqayyoo mandaroota naannoo sana turan hundumaa irra in bu'e*.

⁶Yaaqoobis namoota isa bira turan hundumaa wajjin gara Luz dhufe; innis Bet'el isa biyya Kana'aan keessaa ti.

⁷Achitti iddoo aarsaa tokko ijaare; yeroo inni obboleessa isaa duraa baqatee adeemetti, Waaqayyo achitti isatti mul'atee waan tureef, iddoo sana ?El-Bet'el? jedhee moggaase* [innis ?Waaqayyo isa kan Bet'el? jechuu dha].

⁸Yeroo sanatti Deboraan, guddiseen Ribqaa duutee, Bet'el godaa qilxuu tokko jalatti in awwaalamte; kanaafis qilxuun sun, ?Qilxuu boo'ichaa[168]? jedhamee moggaafame*.[169]

⁹Yeroo Yaaqoob Phaadaan-Aaramii dhufetti, Waaqayyo deebi'ee isatti mul'atee, isa eebbises.

¹⁰Waaqayyo, ?Maqaan kee Yaaqoob, si'achi garuu maqaan kee ?Israa'el? jedhama malee, ?Yaaqoob? hin jedhamu? jedheen; kanaaf akkuma Waaqayyo isa moggaasetti maqaan isaa ?Israa'el? jedhame*.

¹¹Waaqayyo yommus, ?Ani Waaqayyo isa hundumaa danda'uu dha; hori, baay'adhus! Sabni, tuuti sabaas si irraa in argamu, mootonnis mudhii kee keessaa in ba'u*;

¹²biyya isa ani Abrahaamii fi Yisihaqiifis kenne, siif nan kenna, si booddeedhaanis biyyicha sanyii keetiif nan kenna? jedheen*.

¹³Kana booddee Waaqayyo iddoo isatti dubbate sanatti isa dhiisee biraa ol ba'e;

¹⁴Yaaqoob dhagaa tokko utubaa seenaa godhee ol qajeelche, iddoo itti Waaqayyo isatti dubbate sana dhaabee, kennaa dhugaatii irratti dhangalaasee, dhadhaa ejersaas dibe.

¹⁵Kanaaf Yaaqoob maqaa iddoo itti Waaqayyo isatti dubbate sana ?Bet'el? jedhee moggaase*.[170]

¹⁶Isaan Bet'elii ka'anii in adeeman; biyya Efraataa ga'uudhaaf amma illee waa hafe utuu jiruu, Raahel da'uudhaaf in ciniinsifatte, ciniinsuun ishees jabaa ture.

¹⁷Utuu isheen da'uudhaaf ciniinsuu jabaa sana keessa jirtuu, deessiftuun ishee, ?Ammas immoo ilma dabalachuuf waan jirtuuf hin sodaatin!? ittiin jette*.

¹⁸Raahel du'uudhaaf yeroo lubbuun ishee ba'uuf jettetti, maqaa mucichaa ?Ben-Onii? jettee moggaafte; abbaan isaa garuu ?Benyaamiin? jedhee moggaase; [?Ben-Onii? jechuun ?Ilma gadda koo? jechuu yommuu ta'u, ?Benyaamiin immoo? ?Ilma mirga koo? jechuu dha].

¹⁹Raahel duutee, karaa Efraataa dhaqu irratti in awwaalamte; inni amma ?Betlihem? jedhama*.

²⁰Yommus Yaaqoob utubaa tokko awwaala ishee irra in dhaabe; inni utubaa awwaala Raahel isa hamma har'aatti iyyuu achuma jiruu dha.[171]

²¹Israa'el achii adeemee, riqaa Edar garasitti godoo dhaabbate.

²²Israa'el iddoo sana buufatee utuu jiruu, Ruuben gara Bilhaa saajjatoo abbaa isaa dhaqee, ishee wajjin ciise; Israa'elis waa'ee kanaa in dhaga'e*.[172] Ilmaan Yaaqoob kudha lama turan;

²³ilmaan Liyaan deesseef, Ruuben ilma Yaaqoob isa angafa, Shimi'oon, Lewwii, Yihudaa, Yisaakor, Zebuloon;

²⁴ilmaan Raahel immoo Yoseef, Benyaamiin;

²⁵ilmaan Bilhaa xomboree Raahel, Daan, Niftaalem;

²⁶ilmaan Zilfaa xomboree Liyaa immoo Gaadi, Asheer; ilmaan Yaaqoob warri Phaadaan-Aaramitti dhalataniif isaan kana turan.

²⁷Yaaqoobis mandara Mamreetti Kiriiyat-Arbaa isa ?Kebroon? jedhamutti, abbaa isaa Yisihaq bira dhufe; kunis iddoo Abrahaamii fi Yisihaq akka ormaatti buufatan ture*.

²⁸Barri Yisihaq jiraate waggaa dhibbaa fi saddeettama ture;

²⁹Yisihaqis dulloomee, baras quufee du'e, gara saba isaattis in sassaabame; ilmaan isaa Esaawuu fi Yaaqoob isa in awwaalan.[173]