Read west central oromo Seera Uumamaa 4 Bible Online

Seera Uumamaa 4 - west central oromo bible

Seera Uumamaa 4

¹Addaam, Hewwaan haadha manaa isaa bira ga'e; isheenis ulfooftee ilma Qaayin jedhamu deessee, ?Ani gargaarsa Waaqayyootiin nama tokko godhadheera? jette;

²itti dabaltees obboleessa isaa Abeelin deesse; Abeel tiksituu hoolaa ta'e, Qaayin garuu qottuu ta'e.

³Guyyaa baay'ee booddee Qaayin wanta lafa irraa galfate irraa Waaqayyoof kennaa dhi'eesse*;

⁴Abeelis immoo hoolota isaa keessaa warra dura dhalatan qalee cooma isaanii aarsaa dhi'eesse; Waaqayyo gara Abeelii fi gara qalma isaa faara tolaadhaan in ilaale*.

⁵Gara Qaayinii fi gara kennaa isaa garuu faara tolaadhaan hin ilaalle; kana irratti Qaayin aaree boba'ee, mataa buuse.

⁶Waaqayyo yommus Qaayiniin, ?Maaliif aartee bobaate? Maaliifis mataa buufte?

⁷Wanta gaarii utuu hojjettee, ol jetta turte mitii ree? Wanta gaarii hin hojjettu yoo ta'e garuu, cubbuun balbala kee dura riphee si eeggata, si argachuus in kajeela; ati garuu isa irratti aboo godhadhu!? jedhe.[21]

⁸Qaayin obboleessa isaa Abeelii wajjin in dubbate; erga gara bakkeetti ba'aniis Qaayin obboleessa isaa Abeel irratti ka'ee isa ajjeese*.[22]

⁹Waaqayyo yommus, ?Abeel obboleessi kee eessa jira?? jedhee Qaayinin gaafate; inni immoo deebisee, ?Ani hin beeku, obboleessa koo natu eegaa?? jedhe.

¹⁰Kana irratti Waaqayyo, ?Wanti ati goote kun maali? Dhiigni obboleessaa keetii lafaa natti in iyyata*.

¹¹Ammas ati abaaramaa dha! Lafa isa dhiiga obboleessaa keetii afaan bane akka dhugu goote sana irraa in ari'atamta*.

¹²Lafa yeroo qottu deebi'ee midhaan siif hin baasu; biyya lafaa irrattis nama jooraa, nama lafa dhaqu hin qabnes in taata? jedhe.[23]

¹³Qaayin deebisee Waaqayyoon, ?Adabamuun koo isa ani baachuu danda'u gara irraa ta'e.

¹⁴Kunoo! Ati har'a lafa maasii koo irraa na ariiteetta, fuula kee duraas dhokachuun na irra jira; ani lafa irratti nama jooraa, nama lafa dhaqu hin qabnes nan ta'a; namni na arge hundinuus ana in ajjeesa? jedhe*.[24]

¹⁵Kana irratti Waaqayyo, ?Akkas miti, nama Qaayinin ajjeese irraa gumaan dachaa torbaa in barbaadama!? jedheen; kana booddee Waaqayyo, namni Qaayinin arge rukutee akka hin ajjeefneef, milikkita itti godhe*.

¹⁶Qaayinis fuula Waaqayyoo duraa ba'ee, Eeden gara ba'a-biiftuu biyya itti jooraa hafetti[25] gale.[26]

¹⁷Qaayin haadha manaa isaa bira ga'e; isheenis ulfooftee ilma in deesse; maqaan isaas ?Henok? jedhame; Qaayin mandara tokko ijaaree, mandarichas maqaa ilma isaa Henokitti moggaase.

¹⁸Henok, Iraadin godhate; Iraad, Mahuyaa'elin dhalche, Mahuyaa'el, Maatushaa'elin dhalche, Maatushaa'el immoo Laamekin dhalche.

¹⁹Laamek dubartoota lama fuudhe; maqaan ishee tokkoo Aadaa, maqaan ishee kaanii immoo Xiilaa ture.

²⁰Aadaan, Yaabaalin deesse; inni abbaa sanyii warra godoo keessa jiraatanii horii horsiisanii ture.

²¹Maqaan obboleessa isaa immoo Yubaal ture; inni immoo abbaa sanyii warra kiraara rukutanii fi ulullee afuufanii ture.

²²Xiilaa immoo Tubaal-Qaayinin deesse; warri sibiila borrajjii fi sibiila gurraacha tuman hundinuu isa irraa baran; obboleettiin Tubaal-Qaayinis Naa'imaa turte.

²³Laamek yommus dubartoota isaatiin, ?Yaa Aadaa, yaa Xiilaa! Sagalee koo dhaga'aa! Yaa dubartoota Laamek, waan ani jedhu dhaggeeffadhaa! Namni yoo na madeesse, dargaggeessi yoo na dirmammeesses, ani isa nan ajjeesa;

²⁴gumaan Qaayin dachaa torba erga ta'ee, gumaan Laamek dachaa torbaatamii torba in ta'a? jedhe*.[27]

²⁵Addaam ammas haadha manaa isaa bira ga'e; isheenis ilma deessee, maqaa isaa ?Sheet? jettee moggaafte; kana irratti, ?Iddoo Abeel isa Qaayin ajjeese Waaqayyo dhala kan biraa naaf buuse? jette; (?Sheet? jechuun ?Iddoo buusuu? jechuu dha).

²⁶Sheetiifis ilmi in dhalate, innis maqaa isaa ?Enosh? jedhee moggaase; bara sana namoonni Waaqayyoon maqaadhaan waammachuu jalqaban*.[28]