Read west central oromo Seera Uumamaa 40 Bible Online

Seera Uumamaa 40 - west central oromo bible

Seera Uumamaa 40

¹Kana booddee immoo eegduun warra mootii Gibxiif dhugaatii dhi'eessanii, eegduun warra buddeena tolchanii, mootii Gibxii gooftaa isaanii duratti balleessaa godhatan.

²Mootiin Gibxii yommus hojjetoota isaa warra gurguddoota kana lamaanitti in dheekkame;

³inni mana hidhaa iddoo Yoseef itti hidhamee eegamaa jiru keessatti akka isaan eeguuf, ajajjuu eegdota mana hidhaatti isaan kenne.

⁴Ajajjuun eegdota mana hidhaa sunis Yoseefitti hadaraa isaan kenne; innis isaaniif in ergame; isaanis takka achitti in eegaman.

⁵Gaaf tokko halkan, eegduun warra mootii Gibxiif dhugaatii dhi'eessanii, eegduun warra buddeena tolchaniis abjuu abju'atan; abjuun isaan lamaanuu mana hidhaa keessa utuu jiranii mata mataatti abju'atan kun, hiikaa adda addaa qaba ture.

⁶Yoseef ganama isaan bira dhufee yeroo isaan ilaaletti, fuula badanii isaan in arge.

⁷Inni kana irratti hojjetoota mootii Gibxii warra gurguddoota isaa wajjin mana gooftaa isaatti eegamaa jiraniin, ?Har'a maaliif nyaara guurtan?? jedhee isaan gaafate.

⁸Isaan immoo deebisanii, ?Nuyi abjuu abju'anne, namni nuuf hiiku dhibe? jedhaniin; yommus Yoseef isaaniin, ?Abjuu Waaqayyotu hiikaatii, isin anatti himadhaa!? jedhe*.[189]

⁹Eegduun warra dhugaatii dhi'eessanii, abjuu isaa Yoseefitti yommuu himatu, ?Abjuu kootiin ani muka waynii fuula koo duratti nan arge;

¹⁰mukti waynichaa damee sadii qaba ture; inni akkuma hudheen in daraare, ija in naqate, hurbuun isaas in bilchaate;

¹¹xoofoon mootiin Gibxii itti dhugu ana harka ture, anis ija waynichaa ciree xoofoo mootii Gibxiitti cuunfee, xooficha harka mootii Gibxiitti nan kenne? jedhe.

¹²Yommus Yoseef namichaan, ?Abjuun kee kan itti hiikamu, dameen sadan sun guyyoota sadii;

¹³guyyaa sadiitti mootiin Gibxii ol si qaba, lafa hojii keettis si deebisa; akkuma dur yeroo ati dhugaatii dhi'eessaa turte fudhatamee turetti, ati xoofoo mootii Gibxii harka isaatti in kennita.

¹⁴Yeroo siif tolu sanatti garuu ana yaadadhu! Hadaraa, mootiin Gibxii akka na yaadatu gootee mana kana keessaa na baasisuudhaan wanta gaarii anaaf godhi!

¹⁵Ani biyya Ibrootaa keessaan hatamee dhufe; biyya kanattis immoo mana boollaa kana keessa kan na buusisu, ani waan tokko illee hin hojjenne? jedhe*.[190]

¹⁶Eegduun warra buddeena tolchaniis, Yoseef abjuu gara gaariitti hiikuu isaa in arge; innis abjuu isaa isatti yommuu himatu, ?Anis immoo abjuu kootiin kunoo buddeena gundoo sadiitu mataa koo irra ture.

¹⁷Buddeenni bifa garaa garaatiin tolfamanii, mootiin Gibxii akka nyaatuuf qopheeffaman hundinuu gundoo mataa koo irraa isa ol aanu keessa turan; allaattonni immoo gundoo isa mataa koo irra jiru keessaa in nyaatu turan? jedhe.

¹⁸Yommus Yoseef deebisee, ?Abjuun kee kan itti hiikamu, gundoon sadan sun guyyoota sadii;

¹⁹guyyaa sadiitti mootiin Gibxii ol si fuusisee, mukatti akka si rarraasan in godha; allaattonnis foon kee irraa ciratanii in nyaatu? jedhe.

²⁰Guyyaan sadaffaan guyyaa itti mootiin Gibxii dhalachuu isaa ayyaaneffatu waan tureef, hojjetoota isaa hundumaaf nyaachisa guddaa godhe; inni eegduu warra dhugaatii dhi'eessanii, eegduu warra buddeena tolchaniis hojjetoota isaa gidduutti ol in waamsise.

²¹Innis eegduu warra dhugaatii dhi'eessanii sana hojii dhugaatii dhi'eessuu isaatti isa deebise; namichis xoofoo harka mootii Gibxiitti kenne;

²²eegduun warra buddeena tolchanii immoo akka rarraafamu godhe; kunis akkuma Yoseef isaaniif hiike ta'e.

²³Kana keessaa immoo eegduun warra dhugaatii dhi'eessanii Yoseefin in irraanfate malee, hin yaadanne.