Read west central oromo Seera Uumamaa 44 Bible Online

Seera Uumamaa 44 - west central oromo bible

Seera Uumamaa 44

¹Yommus Yoseef namicha isa hojii mana isaa adeemsisu ajajee, ?Namoota kanaaf midhaan hamma qalqalli isaanii baachuu danda'u itti gugguutiif; horii isaaniis adduma addaan afaan qalqala isaanii keessa kaa'i!

²Xoofoo koo isa meetii irraa hojjetame, horii isa inni midhaan ittiin bite wajjin afaan qalqala isa quxisuu sanaa keessa kaa'i!? jedhe; innis akkuma Yoseef isatti dubbate in godhe.

³Ganama yeroo lafti ifetti namoonni sun harroota isaanii fudhatanii akka adeemaniif in geggeeffaman.

⁴Utuu isaan mandara keessaa ba'anii fagoo hin ga'in, Yoseef namicha isa hojii mana isaa adeemsisuun, ?Ka'ii namoota kana faana dha'i! Yeroo isaan qaqqabdu, ?Maaliif qooda gaarii hamaa deebiftan?

⁵Xoofoon isin fudhattan kun isa gooftaan koo itti dhugu mitii ree? Hooda argus isumaan arga mitii ree? Isin kana gochuun keessan hamaa hojjettan? jedhiin!? jedhe.

⁶Namichi yommuu jara qaqqabe, dubbii isatti himame kana isaanitti in dubbate.

⁷Jarri immoo deebisanii, ?Maal gooftaa! Maaliif akkas dubatta? Kana gochuun garboota kee irraa haa fagaatu!

⁸Kunoo! Horii isa afaan qalqala keenyaa keessaa argine iyyuu biyya Kana'aanii deebifnee sitti fidne, attamitti immoo mana gooftaa keetiitii meetii yookiis warqee hanna ree*?

⁹Nuyi garboota kee keessaa abbaan wanti kun biratti argame haa du'u! Nuyi warri kaan immoo gooftaa keenyaaf garba in taana? jedhan.

¹⁰Inni immoo jaraan, ?Amma akkuma isin jettan iyyuu haa ta'u; abbaan wanti kun biratti argame anaaf garbicha in ta'a; isin warri kaan immoo gad in dhiifamtu? jedhe.

¹¹Isaanis dafanii adduma addaan qalqala isaanii gad buusanii in hiikan.

¹²Namichi fonqolchuu isaa qalqala isa angafaatti jalqabee kan isa quxisuutiin in raawwate; xoofichi immoo qalqala Benyaamiin keessatti argame.

¹³Kana irratti isaan na'anii uffata isaanii in tarsaasan; adduma addaanis harroota isaanii deebisanii fe'atanii gara mandaraatti in deebi'an.[205]

¹⁴Yihudaanii fi obboloonni isaa dhufanii mana Yoseefitti yeroo ol lixan, inni amma iyyuu achuma ture; isaan miilla isaatti in kufan.

¹⁵Yoseef garuu isaaniin, ?Wanti isin gootan kun maali? Namni akka kootii hooda arguu akka danda'u hin beektanii ree? jedhe.

¹⁶Yihudaan immoo deebisee, ?Gooftaa ko! Maal jechuu dandeenya? Maal dubbannas? Nuyi wanta kana akka hin fuudhin maaliin mul'ifna ree? Waaqayyo yakka garboota kee irraa argateera; kunoo nuyi, inni xoofichi harkatti argames, gooftaa kootiif garboota ta'uu keenya? jedhe*.

¹⁷Yoseefis immoo, ?Kana gochuun ana irraa haa fagaatu! Inni xoofichi harkatti argame anaaf garbicha ta'a; isin warri kaan garuu nagaadhaan gara abbaa keessanitti ol ba'aa!? jedhe.[206]

¹⁸Ergasii Yihudaan gara Yoseefitti dhi'aatee, ?Yaa gooftaa, ati akkuma mootii Gibxii; ani dubbii tokko si gooftaa koo nan dhageessifadha, ati hadaraa garbicha keetti aartee hin boba'in!

¹⁹Gooftaan koo, ?Abbaan keessan jiraa? Obbooleessa biraas qabduu?? jedhee garboota isaa gaafatee ture;

²⁰nuyi immoo, ?Abbaan keenya jira, innis dulloomeera; ilmi quxisuun inni dulluma isaa jala godhate tokkos jira; haadhoon mucichaa in du'e, ijoollee haati isaa deesse keessaa mucichi duwwaan waan hafeef, abbaan isaa caalaa isa in jaallata? jenne.

²¹Yommus ati nuyi garboota keetiin, ?Isa na bira fidaa ija kootiin isa nan ilaala!? jette;

²²nuyi immoo si gooftaa kootiin, ?mucichi abbaa isaa dhiisee adeemuu hin danda'u; dhiisee yoo adeeme garuu, abbaan isaa in du'a? jenne.

²³Kana irratti ati garboota keetiin, ?Obbooleessi keessan inni quxisuun isinii wajjin yoo dhufe malee, isin lammaffaa ija koo hin argitan? jette*;

²⁴nuyis yommuu gara abbaa koo garbicha keetti ol deebine, dubbii ati gooftaan koo dubbatte, isatti himneerra.[207]

²⁵?Takka turre abbaan keenya, ?Ammas dhaqaa midhaan xinnoo ishee nuuf bitaa? nuun jedhe;

²⁶nuyi garuu, ?Obboleessi keenya inni quxisuun nuu wajjin hin jiru yoo ta'e, ija namichaa arguu hin dandeenyu; kanaaf obboleessi keenya inni quxisuun nuu wajjin yoo jiraate in dhaqna; kanaa achi nuyi dandeenyee gad hin buunu? jenne.

²⁷Abbaan koo garbichi kee immoo, ?Haati manaa koo haati mucichaa ilmaan lama akka anaaf deesse isin iyyuu in beektu;

²⁸Inni tokko ana biraa ba'e, ani utuun isa hin argin nan hafe; egaa inni dhuguma gargar kukkutame jedheen yaade*.

²⁹Isa kanas immoo ija koo duraa fuutanii wanti hamaan isa irra yoo ga'e, dulluma koo keessa gaddaan gara iddoo lafa jalaatti akkan gad bu'u in gootu? nuun jedhe*.[208]

³⁰?Yaa gooftaa ko, lubbuun abbaa kootii mucicha malee waan hin jiraanneef, ani mucichi yoo nu bira jiraate malee, abbaa koo garbicha kee biratti galuu hin danda'u;

³¹nuyi akkasitti deebinee yoo galle, abbaan keenya mucichi nu bira akka hin jirre yommuu argu, in du'a; nuyi garboonni kees abbaan keenya garbichi kee dulluma isaa keessa gaddaan iddoo lafa jalaatti akka gad bu'u in goona.

³²Ani garbichi kee immoo abbaa koo duratti mucichaaf darbee, ?Ani mucicha deebisee gara keetti yoon fiduu dhabaadhe, bara koo guutuu abbaa koo akkan yakketti nan hafa? jedheera*.

³³Ammas ani garbichi kee iddoo mucichaa si gooftaa kootiif garbicha ta'e hafee, mucicha obboloota isaa wajjin akka ol ergituuf sin kadhadha!

³⁴Wanta hamaa abbaa koo irra ga'u akkan hin arginetti, mucichi na bira hin jiru yoo ta'e, ani gara abbaa kootti ol ba'uu hin danda'u? jedhe.[209]