Read west central oromo Seera Uumamaa 50 Bible Online

Seera Uumamaa 50 - west central oromo bible

Seera Uumamaa 50

¹Yoseef immoo abbaa isaa irratti lafa dha'ee isa dhudhungatee isaaf boo'e.

²Yoseef ergasii hojjetoota isaa warra hojii qorichaa beekan, reeffa abbaa isaa qorichaan sukkuumanii akka gogsaniif in abboome; warri hojii qorichaa beekan sun, reeffa Israa'el qorichaan sukkuumanii in gogsan.

³Reeffa qorichaan sukkuumanii gogsuun guyyaa afurtama waan fudhatuuf, isaan guyyaa afurtamatti in raawwataniif; warri Gibxiis guyyaa torbaatama isaaf boo'an.

⁴Guyyoonni isaaf itti boo'an raawwatamnaan, Yoseef gurguddoota mana mootichaan, ?Faara tolaadhaan na ilaaltu yoo taatan, dubbii ani isinitti himadhu kana gurra mootichaa biraan anaaf ga'aa!

⁵Abbaan koo utuu hin du'in, ?Biyya Kana'aanitti iddoo ani awwaalaaf qopheeffadhe sanatti ana awwaali!? jedhee akkan kana godhuufis na kaksiiseera; kanaaf hadaraa, ?Ol ba'ee abbaa koo awwaalee nan deebi'a? jedheera, jedhaatii anaaf himaa!? jedhe*.

⁶Yommus mootiin Gibxii, ?Akkuma inni si kaksiifatetti ol ba'ii abbaa kee awwaalladhu!? jedheen.[239]

⁷Kana irratti Yoseef reeffa abbaa isaa awwaaluudhaaf fuudhee ol in ba'e; maanguddoonni hojii mana mootichaa irra jiran hundinuu, maanguddoonni biyya Gibxii hundinuus isaa wajjin ol ba'an.

⁸Akkasumas warri mana Yoseef, obboloonni isaa, warri mana abbaa isaas hundinuu duukaa ol ba'an; isaan ijoollee duwwaa bushaayee fi saawwan biratti biyya Gooshenitti hambisan.

⁹Akkasuma immoo konkolaattonni kottee duudaadhaan harkifaman, aboonni fardeeniis isaa wajjin ol ba'an; kutanni warra wajjin ol ba'anii sun baay'ee guddaa ture.

¹⁰Isaan laga Yordaanos gama oobdii Axaad bira ga'anii, achitti boo'icha ulfaataa cimsanii boo'an; Yoseef achitti guyyaa torba abbaa isaaf in boossise.

¹¹Warri biyya Kana'aan keessa taa'an boo'icha namoonni oobdii Axaad biraa boo'an arganii, ?Warri Gibxii boo'icha guddaa isaa boo'uutti jiru? waliin jedhan; kanaaf iddoo sana ?Abeel-Miizraayim? jedhanii moggaasan; [innis ?Boo'icha warra Gibxii? jechuu dha]; iddoon sun laga Yordaanos gamatti argama.

¹²Yommus ilmaan Yaaqoob akkuma inni isaan abboome in godhan*.

¹³Ilmaan isaa reeffa isaa biyya Kana'aanitti geessanii, holqa maasii Makfelaa keessatti awwaalan; maasii isa fuullee Mamree jiru kana Abrahaamtu lafa awwaalaa akka ta'uuf Efron namicha biyya Heet irraa bitee ture*.

¹⁴Yoseef reeffa abbaa isaa erga awwaalee booddee, obboloota isaa fi warra awwaala abbaa isaaf isa duukaa ol ba'an hundumaa wajjin biyya Gibxiitti in deebi'e.[240]

¹⁵Obboloonni Yoseef erga abbaan isaanii du'ee yaadda'anii, ?Yoseef haaloo qabatee, isa nuyi hamaa isa irratti hojjenne hundumaaf ijaa nu baafata ta'a? jedhan*.

¹⁶Isaan Yoseefitti erganii, ?Abbaan kee utuu hin du'in nu abboomee,

¹⁷?Maaloo, isa obboloonni kee sitti balleessan, hamaa si irratti hojjechuudhaan isa si yakkanis, isaaniif dhiisi!? jedhaatii Yoseefitti himaa!? nuun jedhe; ?Ammas immoo obboloonni kee, ?Irra-daddarbaa garboota Waaqayyo isa kan abbaa keetii, hadaraa nuuf dhiisi!? siin jedhaniiru? jedhan; Yoseef ergaa isaanii yommuu dhaga'e in boo'e.

¹⁸Obboloonni isaas dhufanii miilla isaatti kufanii, ?Kunoo, nuyi siif garboota in taana!? jedhan.[241]

¹⁹Yoseef immoo isaaniin, ?Hin sodaatinaa! Anatu iddoo Waaqayyootti ilaalamaa ree?

²⁰Isin hamaa ana irratti akeektan, Waaqayyo garuu gaariidhaaf isa yaade; inni lubbuu namoota baay'ee oolchuudhaaf, akka amma ta'e jiru kana godhe*.

²¹Amma immoo isin, ijoolleen keessanis waan barbaachisu akka argattan ani nan godhaa, hin sodaatinaa!? jedhe; inni dubbii garaa isaan ciibsu isaanitti dubbatee, isaan in jajjabeesse.[242]

²²Yoseefii fi maatiin abbaa isaatii biyya Gibxii in taa'an; Yoseef waggaa dhibbaa fi kudhan jiraate.

²³Inni ijoollee Efreem hamma dhaloota sadiitti in arge; akkasuma immoo ijoollee Maakiir ilma Minaasee ijoollee ofii dhalchetti lakkaa'ate.

²⁴Yoseef yommus obboloota isaatiin, ?Ani du'uufan jedha; Waaqayyo garuu isin in yaadata, biyya kana keessaa gara biyya isa Abrahaam, Yisihaq, Yaaqoobiif kennuuf kakatetti ol isin in baasa? jedhe.

²⁵Yoseef ammas ilmaan Israa'eliin, ?Waaqayyo yommuu isin yaadatu, lafee koo asii fuutanii akka ol baatan anaaf kakadhaa!? jedhe*.

²⁶Yoseef nama waggaa dhibbaa fi kudhanii yeroo ta'etti in du'e; namoonnis reeffa isaa qorichaan sukkuumanii gogsanii, biyya Gibxiitti bidiruu addaan miidhagfamee reeffa keessa ciibsuudhaaf hojjetame keessa in kaa'an.[243]