Read west central oromo Seera Uumamaa 8 Bible Online

Seera Uumamaa 8 - west central oromo bible

Seera Uumamaa 8

¹Waaqayyo immoo ammas Nohin, horii qe'ee fi bineensota warra isaa wajjin markabicha keessa jiran hundumaa in yaadate; Waaqayyo qilleensa lafa irra in dabarse, bishaanichis gad gale.

²Burqituuwwan callabboo, hulaan bishaan bantii waaqaa in cufame, bokkaan waaqa keessaa roobus in ittifame.

³Bishaanichis guyyaa dhibbaa fi shantama booddee irraa jalaan lafa irraa gad galaa adeemee, in hir'ates.

⁴Markabichi ka'ee ji'a torbaffaa isaatti ji'icha keessaas guyyaa kudha torbaffaatti tulluu Araaraat gubbaa in buufate.

⁵Bishaanichi hamma ji'a kurnaffaatti ittumaa gad galaa adeeme; guyyaa jalqaba ji'a kurnaffaa irratti roggeen tullootaa in mul'atan.

⁶Guyyaa afurtama booddee Nohi qaawwa isa markabichatti baasee ture sana cufaa isaa bane*;

⁷qurruu tokko in erge, innis hamma bishaan lafa irraa gogutti in ba'a, deebi'ees in gala ture.

⁸Nohi kana booddee bishaan lafa irraa akka gad xinnaate ilaaludhaaf gugee tokko of biraa erge;

⁹bishaanichi garuu amma iyyuu lafa hundumaa irra waan jiruuf, gugeen sun lafa qubattu dhabdee, gara markabichaatti deebitee isa bira dhufte; inni immoo harka isaa gad baasee qabee, markabicha keessa lafa ofii jirutti ol ishee galche.

¹⁰Guyyaa torba turee, ammas gugee tokko markabicha keessaa gad baasee erge;

¹¹gugeettiin immoo galgala gara isaatti yommuu deebite kunoo, xobbee baala ejersaa afaanitti in baatti turte; kana irratti Nohi bishaanichi lafa irraa akka gad xinnaate in bare.

¹²Ammas immoo guyyaa torba turee, gugeettii in erge; isheen ergasii gara isaatti hin deebine.[41]

¹³Nohi dhalatee waggaa dhibba ja'aa fi tokkoffaatti, ji'a jalqabaatti, ji'icha keessaa immoo guyyaa tokkoffaatti bishaanichi irra lafaatii goge; Nohis bantii markabichaa irraa fuudhee yeroo ilaale, kunoo, irri lafaa gogaa ta'uu isaa in arge*.

¹⁴Ji'a lammaffaa keessaa guyyaa digdamii torbaffaatti immoo lafichi guutummaatti gogee argame.[42]

¹⁵Waaqayyo yommus Nohitti in dubbate;

¹⁶inni, ?Amma markabicha keessaa ba'i, haati manaa kee, ilmaan kee, dubartoonni ilmaan keetiis sii wajjin haa ba'an!

¹⁷Uumamni foon uffatee si bira jiru hundinuu allaattiin, simbirri, horiin qe'ee, bineensi, warri lafa irra munyuuqan hundinuu si duukaa akka ba'an godhi! Isaan lafa irratti gurmuu haa godhatan, wal horaniis lafa irratti haa baay'atan!? jedhe.

¹⁸Nohis gad ba'e; haati manaa isaa, ilmaan isaa, dubartoonni ilmaan isaatiis isaa wajjin gad ba'an*.

¹⁹Uumamni jiraatan hundinuu, warri munyuuqan, warri baal'eedhaan ka'an, wanti lafa irra socho'u hundinuu akka qomoo qomoo isaaniitti markabicha keessaa in ba'an.[43]

²⁰Nohis iddoo itti Waaqayyoof aarsaa dhi'eessu ijaaree, horii qe'ee warra qullaa'ootti ilaalaman hundumaa, horii baal'eedhaan ka'an warra qullaa'ootti ilaalaman hundumaa keessaas fuudhee, iddoo aarsaa sana irratti aarsaa qalmaa in dhi'eesse*.

²¹Waaqayyos foolii isa garaa ciibsu sana urgeeffatee yaada isaa keessatti, ?Wanti namni mucummaa isaatii jalqabee garaa isaatti yaadu hamaa yoo ta'e iyyuu, sababii namaatiif ani deebi'ee laficha matumaa hin abaaru, deebi'ees akkan kanaan dura godhe uumama jiraatu hundumaa matumaa hin balleessu*.

²²Egaa hamma bara lafti kun itti jiraatutti, midhaan facaasuunii fi sassaabuun, dhaamochinii fi ho'i, bonnii fi ganni, guyyaanii fi halkan ittuma fufu malee hin dhaabatan? jedhe*.[44]