Read west central oromo Macaafa Saamu'el Isa Lammaffaa 17 Bible Online

Macaafa Saamu'el Isa Lammaffaa 17 - west central oromo bible

Macaafa Saamu'el Isa Lammaffaa 17

¹Ahiitofel itti dabalee Abiishaalomiin, ?Ka'eetan namoota kuma kudha lama fo'adhee, halkanuma kana Daawitin hordofa.

²Utuu inni dadhabee humni isaa laafee jiruu, isa irra ba'ee isa nan rom'isiisa; yeroo kanatti namoonni isaa wajjin jiran hundinuu in baqatu, ani immoo mooticha isa kophaatti hafe sana rukutee nan ajjeesa.

³Namoota hundumaa siif nan deebisa; nama isa ati barbaaddu irraa kan hafe, namoonni warri kaan deebi'anii nagaatti in jiraatu? jedhe.

⁴Yaadni inni dhi'eesse, Abiishaalomii fi jaarsolii Israa'el hundumaa biratti qajeelaa fakkaatee in mul'ate.

⁵Haa ta'u iyyuu malee, Abiishaalom, ?Wanta Hushaayi Arkaa'ichi jedhus immoo akka dhageenyutti, mee isa waamaa!? jedhe*.

⁶Hushaayi gara Abiishaalom yommuu dhufe, Abiishaalom yaada Ahiitofel kenne isatti mul'isee, ?Yaada inni nuuf kenne kana duukaa buunuu? ?Kun hin ta'u? yoo jette immoo, yaada ofii keetii qabdu dubbadhu!? ittiin jedhe.[73]

⁷Hushaayi deebisee Abiishaalomiin, ?Gorsi Ahiitofel yeroo kana kenne kun ba'eessa miti!

⁸Daawit abbaan kee fi namoonni abbaa keetii, loltoota jajjaboo, akka amaaketa dhaltuu ishee ilmaan ishee bakkee keessatti jalaa butatanii sodaachisoo akka ta'an ati beekta! Kana malees, abbaan kee nama lola itti beeku waan ta'eef, loltootaa wajjin iddoo tokko hin bulu.

⁹Inni ammuma iyyuu holqa dhagaa keessa yookiis iddoo tokko dhokatee jira ta'a; inni harka dursee loltoota kee yoo rukute, namni waa'ee kanaa dhaga'u, ?Loltoonni gara Abiishaalom goran lafa lolaatti dhumaniiru? in jedha.

¹⁰Israa'eloonni hundinuu abbaan kee nama lolatti beekamaa akka ta'e, warri isaa wajjin jiranis loltoota jagna akka ta'an waan beekaniif, loltuu jagni akka leencaa garaan isaa waa hin shakkine iyyuu na'ee bishaan in ta'a.

¹¹Egaa kanan si gorsu Israa'eloota Daanii hamma Bersheebaatti jiran hundumaa of biratti walitti qabi! Isaan akka cirracha galaana qarqaraa baay'atan kana fudhadhuutii lolaaf ba'i!

¹²Yommus nuyi iddoodhuma inni itti argamu dhaqnee, akkuma fixeensa lafa bu'uutti isa irratti lafa in dhoofna; isas, namoota isaas tokko illee utuu hin hambisin in fixna.

¹³Inni gara booddeetti deebi'ee mandara tokkotti yoo gale, Israa'eloonni hundinuu gara mandara sanaatti wadaroo in fidu; nuyi immoo mandarattii diignee dhagaa tokko illee achitti utuu hin hambisin, wadaroo kanaan gad harkifnee dachaa keessa in buufna? jedhe.

¹⁴Abiishaalom, namoonni Israa'elis guutummaatti, ?Gorsi Hushaayi Arkaa'ichaa gorsa Ahiitofel irra in caala!? jedhan; Waaqayyo sababii Abiishaalom irratti wanta hamaa fiduu yaadeef, gorsa ba'eessa isa Ahiitofel kenne, akka inni hin fudhanne godhe*.[74]

¹⁵Hushaayi yeroo sanatti Ahiitofel gorsa attamii Abiishaalomii fi jaarsolii Israa'eliifis akka kenne, inni ofii isaatii immoo maal akka isaan gorse Zaadoqii fi Abiyaataar warra lubootatti in hime.

¹⁶Itti dabalees, ?Amma ariitiidhaan Daawititti nama ergaatii, ?Laga Yordaanos ce'i malee, dachaa isa gara lafa onaatti ceesisu keessa hin bulin! Yoo akkas gochuu dhaabaatte, ati mootichi in ajjeefamta, namoonni sii wajjin jiran hundinuus in dhumu? jedhaa itti himaa!? jedhe.

¹⁷Yonaataanii fi Ahimaaz mul'atanii mandara Yerusaalemitti lixuu waan hin dandeenyeef, burqaa ?En-Rogeel? jedhamu bira in dhaabatu turan; xomboreen tokkos dhaqxee, dhaamsa sana isaanitti in himte; isaan immoo dhaqanii wanta dhaga'an Daawit mootichatti himuuf turan.

¹⁸Gaafas gurbaan tokko isaan argee Abiishaalomitti in hime; kana irratti jarri lamaan ariitiidhaan ba'anii, gara mandara Bahuriim dhaqanii mana nama tokkootti in goran; namichi oobdii isaa keessaa boolla bishaanii qabaa iyyuu, isaan immoo boollicha keessa lixan.

¹⁹Haati manaa namichaa immoo qadaada boolla bishaanichaa irra waa diriirsitee, midhaan irra in afte; namni tokko illees waa'ee kanaa hin beekne.

²⁰Hojjetoonni Abiishaalom gara mana sanaa dhufanii, ?Ahimaazii fi Yonaataan eessa jiru?? jedhanii haadha manaa namichaa in gaafatan; isheen immoo, ?Isaan laga bishaanii kana ce'anii sokkaniiru? jettee deebifteef; hojjetoonni sun yommus isaan barbaadanii dhabanii, gara Yerusaalemitti in deebi'an.

²¹Erga isaan adeemanii booddee, Ahimaazii fi Yonaataan boollicha keessaa ba'anii, dubbicha Daawit mootichatti himuu in dhaqan; isaan Daawitiin, ?Ahiitofel waan hamaa si irratti fiduudhaaf jara waan gorseef, ka'iitii ariitiidhaan lagicha ce'i!? jedhan.

²²Daawit, namoonni isaa wajjin turan hundinuus ka'anii laga Yordaanos in ce'an; yeroo boruun baqaqetti namni laga Yordaanos hin ce'in hafe tokko illee hin turre.

²³Ahiitofel gorsi isaa akka hin fudhatamin yommuu hubate, harree isaa fe'atee ka'ee gara mandara isaa in dhaqe; mana isaatti galee, namoota mana isaatiif erga dhadhaamee booddee of rarraasee du'ee, awwaala abbaa isaatii biratti in awwaalame*.[75]

²⁴Abiishaalomii fi Israa'eloonni warri isa duukaa turan hundinuu laga Yordaanos yommuu ce'an, Daawit immoo dur mandara Mahanaayim ga'e.

²⁵Abiishaalom yeroo sanatti Amaasaa iddoo Yo'aab buusee loltoota irratti abbaa duulaa akka inni ta'u in godhe; Amaasaan kun ilma Yeter Iraa'eltichaa isa Abigaayil intala Naa'ash fuudhee ti; Abigaayil obboleettii Zeruyaa ishee Yo'aabin deessee ti.

²⁶Abiishaalom namoota Israa'el warra gara isaa goranii wajjin biyya Giil'aad keessa in buufate.

²⁷Daawit mandara Mahanaayimitti yommuu gale, Shobii ilmi Naa'ash, inni Raabaa mandara Amoonotaatii dhufe, Maakiir ilmi Amii'el inni mandara Lodebaarii dhufe, Baarzilaayi Giil'aadichi inni mandara Rogeeliimii dhufe isa in simatan*.

²⁸Isaan wanta irra ciisan, caabii, qodaa suphee irraa hojjetaman, qamadii, garbuu, daakuu, akaayii baaqilaa, misira, midhaan akaa'amaa,

²⁹damma, itittuu, hoolaa, baadduus in dhi'eessan; warri dhi'eessanis, ?Daawit, namoonni isaa wajjin jiranis lafa onaa kana keessatti beela'aniiru, dheebotaniiru, laabba'aniirus waan ta'eef, ittiin haa gargaaraman!? jedhan.[76]