Read west central oromo Macaafa Moototaa Isa Duraa 5 Bible Online

Macaafa Moototaa Isa Duraa 5 - west central oromo bible

Macaafa Moototaa Isa Duraa 5

¹Hiiraam mootiin Xiiros inni Daawitii wajjin jaalala guddaa qaba ture, Solomoon ilmi Daawit iddoo abbaa isaa dibamee akka moosifame yommuu dhaga'e, namoota isaa warra gurguddoota isatti in erge*.

²Solomoon immoo deebisee ergaa kanatti fufee jiru Hiiraamitti ergee,

³?Sababii diinonni karaa hundumaa isatti ka'aniif hamma Waaqayyo diinota isaa harka isaa jala galchuufitti abbaan koo ulfina maqaa Waaqayyo gooftaa isaatiif mana qulqullummaa ijaaruu akka hin danda'in ati in beekta.

⁴Amma garuu Waaqayyo gooftaan koo karaa hundumaa nagaa anaaf kenneera; diinni anaan mormu yookiis wanti hamaan hin jiru.

⁵Waaqayyo, ?Ilmi kee inni ani iddoo kee moosisee teessoo kee irra teessisu ulfina maqaa kootiif mana qulqullummaa in ijaara? jedhee abbaa koo Daawitin abdachiiseera; kanaaf ani amma ulfina maqaa Waaqayyo gooftaa kootiitiif mana qulqullummaa ijaaruudhaaf murtoo godheera*.

⁶Nama akka warra Sidoonitti muka muruu beeku nuyi akka hin qabne ati iyyuu beekta; kanaaf gatii dadhabbii namoota keetii akkuma ati jettetti nan baasaatii namoota koo wajjin dhaqanii Liibaanonii muka gaatirraa akka anaaf muraniif namoota kee anaaf ergi!? jedhe.[18]

⁷Hiiraam ergaa Solomoon yommuu dhaga'e guddaa gammadee, ?Har'a Waaqayyo isa ilma ogeessa saba guddaa kana bulchuu danda'u Daawitiif kenneef galanni haa ta'u!? jedhe.

⁸Hiiraam dhaamsa kanatti aanee jiru Solomoonitti ergee, ?Dhaamsa ati anatti dhaammatte dhaga'eera; muka gaatirraa fi muka birbirsaa wanta si barbaachisu hundumaa siif nan kenna.

⁹Namoonni koo mukicha Liibaanonii gara galaanaatti gad in fidu; iddoo ati barbaadde akka siif ga'uuf walitti hiisisee bishaan irra buusee siif nan erga; achittis gargar nan hiiksisa, ati immoo iddoo sanaa ol fufuusifachuu in dandeessa; karaa kee immoo akka ati namoota mana kootiif nyaata kennitu si irraa nan fedha? jedhe.

¹⁰Hiiraam akka kanatti muka gaatirraa fi muka birbirsaa Solomoon barbaade hundumaa in kenneef.

¹¹Solomoon immoo qamadii kuntaala kuma afurii fi dhibba afur akkasumas dhadhaa ejersaa isa calalamaa liitrii kumaatama dhibba afurii fi kuma afurtama soora namoota mana Hiiraamiif in kenne; kanas wagguma waggaan itti fufee in kenneef.

¹²Waaqayyo akkuma isa abdachiisetti Solomooniif ogummaa in kenne; Hiiraamii fi Solomoon gidduu nagaatu ture; kanas waliif galanii kakachuu isaaniitiin in cimsan.

¹³Solomoon mootichi guutummaa biyya Israa'el keessaa namoota giddisiifamanii hojii humnaa hojjetan kuma soddoma walitti in qabate.

¹⁴Adoniiraam itti gaafatamaa namoota giddisiifamanii hojii humnaa hojjetanii ture; inni immoo namoota hojii humnaa hojjetan kana mana isaanii ji'a lama lama akka turan, Liibaanon keessa immoo ji'a tokko tokko akka taa'an godhe; akkasitti kutaa sadiitti isaan hiree, darabee darabee, ji'a ji'aan kuma kudhan kudhan Liibaanonitti in erge.

¹⁵Solomoon namoota ba'aa baatan kuma torbaatama, tulluu keessaa warra dhagaa cabsanii soofan kuma saddeettama qaba ture.

¹⁶Akkasuma immoo gurguddoota itti gaafatamoo hojichaa malee, namoota irra adeemanii hojjicha ilaalan kuma soddomaa fi dhibba sadii qaba ture.

¹⁷Isaan abboommii mootichaatiin hundee mana qulqullummaa kaa'uudhaaf dhagaa gati-jabeeyyii gurguddaa boolla keessaa qotanii baasanii soofanii in fidan.

¹⁸Ijaartuuwwan Solomoonii fi Hiiraam akkasumas namoonni biyya Gebaal warri harka toleyyiin manicha qulqullummaa ijaaruudhaaf muka murmuranii, dhagaas soofanii in qopheessan*.[19]