Read west central oromo Macaafa Moototaa Isa Lammaffaa 14 Bible Online

Macaafa Moototaa Isa Lammaffaa 14 - west central oromo bible

Macaafa Moototaa Isa Lammaffaa 14

¹Yeho'aash ilmi Yeho'ahaaz Israa'el irratti mo'ee waggaa lammaffaa isaatti, Amaasiyaan ilmi Yo'aas mootii Yihudaa in ta'e*.

²Inni mootii yommuu ta'e, nama waggaa digdamii shanii ture; Yerusaalem keessa taa'ee waggaa digdamii sagal in mo'e; maqaan haadha isaatii Yo'adaan; isheen durba mandara Yerusaalem turte.

³Inni Waaqayyo duratti wanta qajeelaa ta'e in hojjete; haa ta'u iyyuu malee, akka Daawit abbaa isaa hin hojjenne; hojii Yo'aas abbaan isaa hojjete hundumaa duukaas in bu'e*.

⁴Garuu iddoowwan sagadaa warri ol ka'oon waan hin diigaminiif, namoonni amma iyyuu iddoowwan sana irratti qalma in qalu aarsaas in dhi'eessu turan*.

⁵Amaasiyaan mootummaa isaa erga jabeeffatee booddee hojjetoota gurguddoota warra abbaa isaa mooticha ajjeesan sana in ajjeese*.

⁶Macaafa seera Musee keessatti Waaqayyo, ?Namni adduma addaan cubbuu ofii isaatiif haa ajjeefamu malee abboonni ilmaan isaaniif hin ajjeefamin, ilmaanis abboota isaaniif hin ajjeefamin!? jedhee akkuma abboometti, Amaasiyaan ilmaan warra abbaa isaa ajjeesan sanaa hin ajjeefne*.

⁷Mootichi loltoota Edoom kuma kudhan dachaa soogiddaa keessatti in fixe, mandara ?Selaa? jedhamtu tokko qabatee maqaa ishees ?Yaqti'el? jedhee in moggaase; isheenis hamma har'aatti maqaa kanaan in waamamti.

⁸Amaasiyaan yommus Yeho'aash ilma Yeho'ahaaz akaakayyuu Yehuu mootii Israa'elitti nama ergee, ?Mee kottu! Wal ilaallaa!? jedhe.

⁹Yeho'aash mootiin Israa'el immoo, Amaasiyaa mootii Yihudaaf deebisee, ?Qoraattiin Liibaanon gaatirraa Liibaanonitti ergaa ergitee, ?Intala kee ilma kootti heerumsisi!? jette; bineensi Liibaanon tokko garuu dhufee lafatti ishee in dhidhiite*.

¹⁰Dhuguma iyyuu ati namoota Edoom mooteetta; garaa kee keessatti of jajuutti kaateetta; mo'icha keetiin illee of gurguddisi! Garuu sassaabadhuutii mana kee taa'i! Maaliif ofii kuftee Yihudaas akka kuffiftuuf tuttuqxee waan hamaa ofitti kaafta ree?? jedhe.

¹¹Amaasiyaan garuu isa dhaga'uu waan dideef, Yeho'aash mootiin Israa'el Amaasiyaan mootii Yihudaa loluudhaaf itti adeemee, biyya Yihudaa keessatti mandara Bet-Shemeshitti walitti ba'anii wal in lolan.

¹²Kana keessatti loltoonni Yihudaa loltoota Israa'eliin mo'amanii, kara karaa gara mana mana isaaniitti in baqatan.

¹³Yeho'aash mootiin Israa'el, Bet-Shemeshitti Amaasiyaa ilma Yo'aas mootii Yihudaa akaakayyuu Ahaaziyaa in booji'e; darbees Yerusaalem dhaqee dallaa ishee isa dhagaadhaan ijaarame karra Efreemii hamma karra isa gooleetti dhundhuma dhibba afur in caccabse.

¹⁴Kana booddee inni warqee fi meetii hundumaa akkasumas mi'a mana qulqullummaa fi mana mootummaa keessa jiru hundumaa fudhatee, namootas qabatee, mandara Samaariyaatti in deebi'e.

¹⁵Waa'een Yeho'aash inni hafe, wanti inni bara mootummaa isaa keessa hojjete hundinuu, jabinni isaa, Amaasiyaa mootii Yihudaa wajjin wal loluun isaas macaafa seenaa mootota Israa'el keessatti caafameera mitii ree?

¹⁶Yeho'aash akkuma abboota isaatii du'ee, Samaariyaa keessatti, mootota Israa'el biratti in awwaalame; Yerobi'aam ilmi isaa immoo mootii ta'ee iddoo isaa in bu'e*.

¹⁷Yeho'aash ilmi Yeho'ahaaz mootiin Israa'el erga du'ee booddee, Amaasiyaan ilmi Yo'aas mootiin Yihudaa waggaa kudha shan in jiraate.

¹⁸Wanta Amaasiyaan hojjete keessaa inni hafe, macaafa seenaa mootota Yihudaa keessatti caafameera mitii ree?

¹⁹Booddee garuu namoonni tokko Yerusaalem keessatti Amaasiyaatti in koratan; yeroo inni mandara Laakiishitti isaan jalaa baqatetti immoo, namoota duukaa buusanii, achitti isa in ajjeesisan*.

²⁰Reeffa isaa fardaan fidanii Yerusaalem mandara Daawit keessatti awwaala abboota isaa biratti isa in awwaalan*.

²¹Kana booddee sabni Yihudaa guutummaatti waliif galanii Azaariyaa isa ?Uziyaa?, jedhamee beekame, dargaggeessa waggaa kudha ja'aa iddoo abbaa isaa Amaasiyaa in moosifatan*.

²²Amaasiyaan erga du'ee booddee, Azaariyaan mandara Eloot gara biyya Yihudaatti deebifatee haaressee ishee in ijaare*.

²³Amaasiyaan ilmi Yo'aas mootii Yihudaa ta'ee, waggaa kudha shanaffaa isaatti Yerobi'aam ilmi Yeho'aash mootii Israa'el ta'ee Samaariyaa keessa taa'ee waggaa afurtamii tokko in mo'e*.

²⁴Inni Waaqayyo duratti wanta hamaa ta'e in hojjete; cubbuu Yerobi'aam ilmi Nebaat Israa'eloota hojjechiise hundumaa irraa hin deebine*.

²⁵Waaqayyo gooftichi inni kan Israa'el, karaa garbicha isaa Yoonaas ilma Amiitaayi raajii Gaat-Hefer akkuma dubbatetti, daarii Israa'el, itti lixa Haamaatii kaasee hamma galaana ?Arabaayi? jedhamutti lafa isaa duriitti in deebise*.

²⁶Garba yookiis birmaduu dha, utuu hin jedhin namoonni Israa'el rakkina jabaa keessa akka jiran, namni isaan gargaarus akka hin jirre Waaqayyo in arge.

²⁷Waaqayyo, ?Maqaan Israa'elootaa bantii waaqaa jalatti akka hin dha'amne nan godha? hin jenne; kanaaf karaa Yerobi'aam ilma Yeho'aash isaan in oolche*.

²⁸Waa'een Yerobi'aam inni hafe, wanti inni bara mootummaa isaa keessa hojjete hundinuu, jabinni inni ittiin lolaa ture, Damaasqoo fi Haamaat warra harka Yihudaa jala galanii turan mootummaa Israa'eliif deebisuun isaa macaafa seenaa mootota Israa'el keessatti caafameera mitii ree?

²⁹Yerobi'aam akkuma abboota isaa du'ee mootota Israa'el biratti in awwaalame; Zakaariyaas ilmi isaa immoo mootii ta'ee iddoo isaa in bu'e*.