Read west central oromo Macaafa Moototaa Isa Lammaffaa 20 Bible Online

Macaafa Moototaa Isa Lammaffaa 20 - west central oromo bible

Macaafa Moototaa Isa Lammaffaa 20

¹Baras Hisqiyaas dhukkubsatee du'uu ga'ee ture; Isaayaas raajichi ilmi Amos gara isaa dhaqee, ?Waaqayyo, ?Ati in duuta malee, hin fayyituutii wanta mana keetiif abboomtu qoqopheessi!? siin jedha? jedheen.

²Yommus Hisqiyaas gara keenyaniitti gara galee Waaqayyoon in kadhate.

³Kadhata isaa keessattis, ?Maaloo, yaa Waaqayyo! Bara jireenya kootti amanamummaadhaa fi garaa guutuudhaan fuula kee dura deddeebi'aa wanta si duratti gaarii ta'es hojjechaa akkan ture akka yaadattuuf sin kadhadha? jedhee boo'icha guddaa in boo'e.

⁴Isaayaas achii gad ba'ee, oobdii mana mootummaa walakkaa utuu hin ga'in dubbiin Waaqayyoo gara isaa dhufee,

⁵?Deebi'iitii Hisqiyaas geggeessituu saba kootiitiin, ?Waaqayyo gooftaan inni kan abbaa keetii Daawit akkana jedha:- Ani kadhata kee dhaga'eera, imimmaan kees argeera; kunoo, ani sin fayyisa, gaafa guyyaa sadaffaas gara mana qulqullummaatti ol in baata;

⁶bara jireenya kee irratti waggaa kudha shan siif dabaleera; si, mandarattii kanas harka mootii Asor nan oolcha; ani ofii kootiif, garbicha koo Daawitiifis jedhee mandarattii kana nan eega? jedhi!? jedhe*.

⁷Kana irratti Isaayaas deebi'ee, ?Ija harbuu ibidda jala dibaatii lafa iita'e irra buusaafii!? jedhe; hojjetoonni mootichaas akkuma abboomaman in godhan; Hisqiyaas mootichis in fayye.

⁸Hisqiyaas immoo, ?Waaqayyo akka na fayyisu, gaafa guyyaa sadaffaas gara mana qulqullummaatti akkan ol ba'uu danda'uuf milikkinni isaa maali?? jedhee, Isaayaasin in gaafate.

⁹Yommus Isaayaas deebisee, ?Gaadidduun buusaa manaa tarkaanfii kudhan gara fuula duraatti haa adeemu moo yookiis tarkaanfii kudhan gara booddeetti haa deebi'u? Waaqayyo waan dubbate akka fiixaan baasuuf milikkinni inni siif kennu isa kana? jedhe.

¹⁰Hisqiyaas immoo, ?Tarkaanfii kudhan gara fuula duraatti adeemuun gaadidduu hin dhibu waan ta'eef, mee tarkaanfii kudhan gara booddeetti haa deebi'u!? jedhe.

¹¹Kana irratti Isaayaas raajichi Waaqayyoon in kadhate; Waaqayyo immoo gaadidduun manaa inni buusaa mana Akaaz irraa gad bu'e tarkaanfii kudhan gara booddee akka deebi'u in godhe.

¹²Hisqiyaas dhukkubsatee akka fayye mootiin Baabilon Merodaak Baladaan ilmi Baladaan yommuu dhaga'e caaffataa fi kennaa namootatti in ergeef.

¹³Hisqiyaas jarreen ergaman sana simatee, mana qabeenya isaatii keessa kan jiru hundumaa, meetii, warqee, urgooftuu, dhadhaa ejersaa isa ba'eessa, mi'a waraanaa, badhaadhummaa biyya isaa keessa jiru hundumaa keessaa tokko illee utuu hin hambisin isaanitti in argisiise.

¹⁴Kana booddee Isaayaas raajichi gara Hisqiyaas mootichaa dhufee, ?Jarreen kun maal jedhan? Eessaas gara kee dhufan?? jedhee in gaafate; Hisqiyaas immoo, ?Baabilon biyya fagoo sanaa ba'anii dhufan? jedhee deebiseef.

¹⁵Itti fufees Isaayaas, ?Mana kee keessatti maalfaa argan?? jedhee in gaafate; Hisqiyaas immoo deebisee, ?Wanta mana koo keessa jiru hundumaa arganiiru; qabeenya koo keessaa kan ani isaanitti hin argisiisin tokko illee hin jiru? jedhe.

¹⁶Kana irratti Isaayaas raajichi Hisqiyaasiin, ?Mee, wanta Waaqayyo jedhu dhaga'i!

¹⁷Waaqayyo, ?Kunoo! Guyyaan ati qabeenyi kee inni mana kee keessa jiruu fi inni abboonni kee hamma har'aatti walitti qaban hundinuu gara biyya Baabilonitti geeffamu in dhufa; wanti tokko illees siif hin hafu*;

¹⁸ilmaan ati godhatte keessaas kaan gara biyya Baabilonitti in geeffamu; achittis xu'aashii ta'anii mana mootii Baabilon keessa in ergamu? jedha? jedhe*.

¹⁹Yommus Hisqiyaas, ?Hamma ani jirutti nagaanii fi gabiin in ta'a mitii ree?? jedhee, Isaayaasiin, ?Dubbiin Waaqayyoo inni ati dubbatte kun ba'eessa? jedhe*.

²⁰Wanta Hisqiyaas hojjete keessaa warri hafan, jagnummaan isaa, kuufama bishaanii hojjechiisee faaggaadhaan bishaan mandaratti galchuun isaa macaafa seenaa mootota Yihudaa keessatti caafamaniiru mitii ree?

²¹Erga Hisqiyaas du'ee immoo ilma isaa Minaaseetu mootii ta'ee iddoo isaa bu'e.