Read west central oromo Macaafa Moototaa Isa Lammaffaa 24 Bible Online

Macaafa Moototaa Isa Lammaffaa 24 - west central oromo bible

Macaafa Moototaa Isa Lammaffaa 24

¹Bara Yehoyaaqiim mootii Yihudaa ture keessa Nebukadnezaar mootiin Baabilon biyya Yihudaatti duulee in qabate; Yehoyaaqiim mootichi waggaa sadii erga isatti bulee booddee yaada isaa geddaree Nebukadnezaar irratti in ka'e*.

²Waaqayyo karaa hojjetoota isaa warra raajotaa akkuma dubbate, loltoota Baabilon[3], loltoota Sooriyaa, loltoota Mo'aabii fi loltoota Amoonotaa Yehoyaaqiim mooticha irratti in kaase, biyya Yihudaas akka balleessaniif in erge*.

³Sababii cubbuu Minaaseen mootichi hojjetee ture hundumaaf, Waaqayyo fuula ofii isaatii duraa akka isaan balleessu dubbatee kan ture, amma dhugumaan saba biyya Yihudaa irratti in raawwatame*.

⁴Keessumatti sababii Minaaseen dhiiga namoota balleessaa hin qabnee dhangalaasee, Yerusaalemin dhiiga duwwaa godheef, Waaqayyo cubbuu isaa dhiisuufii hin barbaanne.

⁵Wanta Yehoyaaqiim bara mootummaa isaa keessa dubbatee fi kan inni hojjete hundumaa keessaa warri hafan macaafa seenaa mootota Yihudaa keessatti caafamaniiru mitii ree?

⁶Erga Yehoyaaqiim du'ee immoo ilma isaa Yehoyaakiintu mootii ta'ee iddoo isaa bu'e.

⁷Mootiin Baabilon laga Gibxii kaasee hamma laga Efraaxiisitti biyya Gibxii qabattee turte hundumaa waan fudhateef, mootiin Gibxii deebi'ee biyya ofii isaatii keessaa ala ba'ee hin duulle.

⁸Yehoyaakiin dhalatee waggaa kudha saddeetitti mootii ta'ee, Yerusaalem keessa taa'ee, ji'a sadii in mo'e; maqaan haadha isaatii ?Nehushtaa? jedhama; isheen intala Elnaataan nama mandara Yerusaalem turte.

⁹Yehoyaakiin kun akkuma abbaa isaatii Waaqayyo duratti waan hamaa in hojjete.

¹⁰Bara mootummaa Yehoyaakiin keessa loltoonni Nebukadnezaar mootii Baabilon dhaqanii Yerusaalemitti in marsan.

¹¹Utuma loltoonni isaa mandarattii marsanii jiranii, Nebukadnezaar mootichi ofii isaatii gara Yerusaalem in dhaqe.

¹²Yommus Yehoyaakiin mootiin Yihudaa, haati isaa, naa'onni isaa, gurguddoonni isaa, xu'aashonni mana mootummaa isaa keessaa ergaman mootii Baabilonitti harka isaanii in kennan; Nebukadnezaar mootiin Baabilon mootii ta'ee waggaa saddeettaffaa isaatti Yehoyaakiinin in booji'e*.

¹³Akkuma Waaqayyo dubbate, qodaa warqee isa Solomoon mootiin Israa'el mana qulqullummaaf hojjechiise hundumaa caccabsee, qabeenya mana qulqullummaa fi mana mootummaa keessaa hundumaa baasee fudhatee in gale*.

¹⁴Akkasumas guutummaa Yerusaalem keessaa, gurguddoota biyyaa, loltoota jajjaboo, namoota hojii harkaa beekanii fi namoota sibiila tuman hundumaa walumatti namoota kuma kudhan booji'ee fudhatee in sokke; biyya sana keessatti namoota baay'ee hiyyeyyii ta'an malee, kan hafe hin turre.

¹⁵Nebukadnezaar mootiin Baabilon Yehoyaakiin mooticha booji'ee biyya Baabilonitti in geesse; akkasumas immoo haadha mootichaa, dubartoota isaa, xu'aashota mana mootummaa isaa keessa ergamanii fi gurguddoota biyyattii Yerusaalemii booji'ee biyya Baabilonitti in geesse*.

¹⁶Itti dabalees guutummaa humna waraanaa keessaa namoota kuma torba, warra hojii harkaa beekanii fi namoota sibiila tuman keessaa immoo kuma tokko booji'ee biyya Baabilonitti in geesse; isaan kun hundinuu jajjaboo fi lolaaf kan ta'an turan.

¹⁷Kana booddee mootiin Baabilon Mataaniyaa wasiila Yehoyaakiin iddoo Yehoyaakiin moosisee maqaa isaa immoo Zedeqiiyaatti in geddare*.

¹⁸Zedeqiiya dhalatee waggaa digdamii tokkotti mootii ta'ee, Yerusaalem keessa taa'ee, waggaa kudha tokko in mo'e; maqaan haadha isaatii ?Hamutaal? jedhama; isheen immoo intala Ermiyaas nama mandara Liibnaa turte.

¹⁹Zedeqiiya kun akkuma Yehoyaaqiim Waaqayyo duratti waan hamaa in hojjete*;

²⁰kun Yerusaalemii fi Yihudaa keessatti waan ta'eef, Waaqayyo baay'ee isaanitti aaree hamma fuula isaa duraa isaan balleessutti in ga'e*.