Read west central oromo Macaafa Seenaa Baraa Isa Duraa 11 Bible Online

Macaafa Seenaa Baraa Isa Duraa 11 - west central oromo bible

Macaafa Seenaa Baraa Isa Duraa 11

¹Kana booddee Israa'eloonni guutummaatti Kebroonitti Daawit biratti walitti qabamanii, ?Kunoo, nuyi dhiiga kee ti, foon kee tis.

²Yeroo darbetti, utuma Saa'ol mootii ta'ee jiruu iyyuu, Israa'eloota gara duulaatti bobbaasee kan galchu si ture; Waaqayyo gooftaan kees, ?Saba koo Israa'elin situ geggeessa, situ isaan bulchas? siin jedheera? ittiin jedhan.

³Jaarsoliin Israa'el hundinuu Kebroonitti Daawit mooticha bira yommuu dhufan, Daawit isaanii wajjin fuula Waaqayyoo duratti kakaadhaan walii gale; akkuma Waaqayyo karaa Saamu'el dubbatee turettis, isaan Israa'el irratti mootii akka inni ta'uuf isa in diban*.[42]

⁴Yommus Daawitii fi Israa'eloonni hundinuu gara mandara Yerusaalem isa ?Yibus? jedhamaa turetti in duulan; innis biyya warri Yibusootaa keessa jiraatan ture.

⁵Namoonni Yibusis Daawitiin, ?Ati asitti hin galtu!? jedhan; Daawit garuu masaraa Xiyoon in qabate; isheenis ishee ?Mandara Daawit? jedhamtee beekamtee dha.

⁶Daawit yommus, ?Namni duraan dursee Yibusoota rukutu angafa ajajaa waraanaa in ta'a? jedhe; kana irratti Yo'aab inni Zeruyaan deesse duraan dursee dhaqee isaan rukutee, ajajaa in ta'e.

⁷Yommus Daawit masaraa sana qabatee keessa in jiraate; kanaaf ?Mandara Daawit? jedhamtee waamamte.

⁸Inni lafa ?Miiloo? jedhamuu kaasee masarichatti naannessee mandara in ijaare; Yo'aab immoo mandara isa hin haareffamin hafe deebisee in haaresse.

⁹Waaqayyo gooftaan maccaa isaa wajjin waan tureef, Daawit ittuma fufee jabaachaa in adeeme.

¹⁰Loltoota Daawit keessaa warri angafoota loltoota jajjaboo ta'an, warri Israa'eloota hundumaa wajjin akkuma Waaqayyo dubbatetti, Daawit guutummaa biyyichaa irratti akka mo'uuf mootummaa isaa jabeessaa turan kanatti fufanii kan jiranii dha.

¹¹Lakkoobsi gootota Daawit kanatti aanee kan jiruu dha; Yaashobi'aam Hakmontichi dura-buutuu warra soddommanii ti; inni eeboo isaa butatee ala tokkotti namoota dhibba sadii in fixe.

¹²Isatti aanee immoo Ele'azaar ilma Dodoo isa Ahohichaa ti; inni loltoota jajjaboo sadan keessaa isa tokko.

¹³Inni yeroo warri Filisxeem lolaaf Phasdamiimitti walitti qabamanitti Daawitii wajjin achi ture; yommuu namoonni Israa'el warra Filisxeem duraa baqachuu jalqabanitti inni maasii garbuu baay'een irra jiru keessa ture.

¹⁴Innii fi namoonni isaa maasii sana keessa iddoo qabatanii warra Filisxeem in rukutan; yommus Waaqayyo mo'icha guddaa isaaniif in kenne.

¹⁵Kutanni loltuu warra Filisxeem dachaa Refaa'iim keessa buufatee utuu jiruu, dura-buutota soddomman keessaa sadii Daawit bira gara kattaa isa holqa Adulaamitti dhi'oo jiru in dhaqan.

¹⁶Yommus Daawit masaraa keessa ture, loltoonni Filisxeem immoo Betlihem keessa buufatanii turan.

¹⁷Daawit bishaan kajeelee, ?Eenyutu boolla karra kellaa Betlihem bukkee jiru keessaa bishaan dhugaatii buduqsee anaaf fida laata!? jedhe.

¹⁸Loltoonni beekamoonni sun sadan buufata loltoota Filisxeemotaa gidduu ba'anii, boolla karra kellaa Betlihem bukkee jiru sana keessaa bishaan buduqsanii, Daawitiif in fidan; Daawit garuu bishaanicha akka kennaatti Waaqayyoof dhangalaase malee, dhuguu hin barbaanne.

¹⁹Kanaafis, ?Waaqayyoon koo kana gochuu ana irraa haa fageessu! Jarri kun lubbuu isaanii gurguranii waan fidaniif, ani immoo dhiiga namoota lubbuu isaanii gurguranii bishaan kana fidanii dhuguu ree?? jedhe; isaan lubbuu isaanii qubaan of keessatti gad qabaa waan fidaniif Daawit bishaanicha dhuguu hin barbaanne; wanti loltoonni jajjaboonni sadan kun godhan kana ture.

²⁰Abiishaayi obboleessi Yo'aab immoo dura-buutuu warra sadan sanaa ture; innis eeboo isaa butatee namoota dhibba sadii in fixe, warra sadan keessattis maqaa in godhate.

²¹Inni warra hafan sadan keessaa caalaatti ulfina guddaa waan qabuuf, ajajjuu isaanii in ta'e; haa ta'u iyyuu malee, akka warra kaanii beekama hin turre.

²²Benaayaan ilmi Yihoyaadaa namni biyya Kabzii'el, loltuu jabaadhaa fi nama hojii gurguddaa hojjete ture; inni namoota Mo'aab warra akka leencaa lama in ajjeese; gaaf tokkos cabbii keessa boolla tokko keessa lixee leenca tokko ajjeeseera.

²³Nama biyya Gibxii hojjaan isaa dhundhuma shan dheeratu tokkos ajjeeseera; namichi Gibxii kun eeboo somaan isaa hamma muka wayya-dhooftuun wayyaa isa dha'e itti maru furdatuu in qabata ture; Benaayaan immoo ulee qabatee bira ga'ee eeboo isaa harka isaa keessaa butee, isumaan namicha Gibxii sana in ajjeese.

²⁴Benaayaan ilmi Yihoyaadaa kana gochuu isaatiin loltoota jajjaboo sana sadan biratti beekamaa in ta'e*.

²⁵Kanaanis inni warra soddomman sana keessatti baay'ee ulfina in argate, garuu akka warra kaan sadanii beekamaa hin turre; Daawit immoo warra isa eegan irratti gaafatamaa isa in godhate.[43]

²⁶Loltoota keessaa jagnoonni jajjaboonni kanatti aananii kan jiranii dha; isaanis Asaahel obboleessa Yo'aab, Elhaanaa ilma Dodoo Betlihemichaa,

²⁷Shaamoot Haroricha, Helez Phelonicha*,

²⁸Iiraa ilma Iiqish Teqo'ichaa, Abii'ezer Anaatoticha,

²⁹Siibekaayi Hushicha, Iilaayi Ahohicha,

³⁰Maharaayi Netofaaticha, Heled ilma Ba'anaa Netofaatichaa;

³¹sanyii Benyaamiin keessaa Iitaayi ilma Riibaayi Giibe'aahichaa, Benaayaa Phiiraatonicha.

³²Dachaa Ga'aash keessaa Huraayi, Abii'el Aarbataahicha,

³³Azmaawet Baharumicha, Eliyaabaa Sha'albonicha;

³⁴ilmaan Haashem Giizonichaa, Yonaataan ilma Shaagee Haraarichaa,

³⁵Ahii'aam ilma Saakaar Haraarichaa, Eliifaal ilma Ur,

³⁶Hefer Mekeraaticha, Ahiiyaa Phelonicha,

³⁷Hezroo Qarmelosicha, Na'araayi ilma Ezbaayi,

³⁸Yo'el obboleessa Naataan, Miibhaar ilma Hagrii,

³⁹Zeleq Amoonicha, Naharaayi Berooticha isa mi'a lolaa Yo'aab baatu, Yo'aab kana Zeruyaatu da'e;

⁴⁰Iiraa Yaatiricha, Gaareb Yaatiricha,

⁴¹Uriiyaa Heeticha, Zaabaad ilma Ahilaayi,

⁴²Adiinaa ilma Shiizaa Ruubenichaa isa gosa Ruubeniif, loltoota soddomman isaa wajjin turaniifis dura-buutuu turee dha.

⁴³Haanaan ilma Ma'akaa, Yoshaafaax Miitaanicha,

⁴⁴Uziiyaa Ashteraaticha, Shaamaa'ii fi Yei'el ilmaan Hotaam Aro'erichaa,

⁴⁵Yediyaa'elii fi obboleessa isaa Yohaa ilmaan Shiimrii Tiizaahichaa,

⁴⁶Elii'el Mahawaaticha, Yeriibaayii fi Yoshaabiyaa ilmaan Elnaa'aam, Iitmaa Mo'aabicha,

⁴⁷Elii'el, Obedii fi Yaa'aasii'el Mezoobicha turan.[44]