Read west central oromo Macaafa Seenaa Baraa Isa Duraa 5 Bible Online

Macaafa Seenaa Baraa Isa Duraa 5 - west central oromo bible

Macaafa Seenaa Baraa Isa Duraa 5

¹Sanyiin Ruuben ilma Yaaqoob isa angafaa kanatti aanee jira; Ruuben illee angafa ture, garuu sababii inni saajjatoo abbaa isaatii tokko bira ga'eef, ijoollee Yoseef obboleessa isaatiif angafummaan in kenname; kanaaf hiddi dhaloota isaatii akka angafummaa isaatti hin caafamne*.

²Yihudaan obboloota isaa caalaatti jabaa ta'ee, biyya kan bulchu sanyii isaa keessaa yoo ba'e iyyuu, angafummaan Yoseefiif in kenname*.

³Ilmaan Ruuben ilma Israa'el isa angafaa, Henok, Faluu, Hezronii fi Karmii turan*.[19]

⁴Sanyiin Yo'el immoo kanatti fufanii kan jiranii dha; Shemaa'iyaa, Goog, Shime'ii,

⁵Miikaa, Re'aayaa, Ba'aal,

⁶Be'eraa isa Tiiglaat-Phileeser mootiin Asor booji'ee adeemee dha; Be'eraan kun geggeessituu gosa Ruuben ture*.[20]

⁷Aantiin isaa qomoo qomoo isaaniitiin akka hidda dhaloota isaaniitti caafamaniiru; isaanis Yei'el isa dura-bu'aa, Zakaariyaas,

⁸Bel'aa ilma Aazaaz, ilma Shemaa, ilma Yo'el; isaan kun lafa ?Aro'er? jedhamuu jalqabanii hamma Neboodhaa fi Ba'aal-Me'onitti qabatanii irra in jiraatan.

⁹Giil'aaditti horiin isaanii wal horanii baay'atanii waan turaniif, karaa gara ba'a-biiftuu, biyyicha hamma daarii lafa onaa isa laga Efraaxiis bira ga'utti in qabatan.

¹⁰Bara Saa'ol mootichaatti gosi Ruuben kun qomoo Hagaar lolanii isaan in mo'an; Giil'aad irraa gara ba'a-biiftuutiinis iddoo jireenya isaanii guutummaatti qabatanii, ofii isaaniitii achi in jiraatan.

¹¹Sanyiin Gaadi fuullee isaaniitiin hamma Saalkaatti qabatanii biyya Baashaan keessa in jiraatan.

¹²Baashaan keessatti Yo'el dura-bu'aa isaanii, isatti aane immoo Shaafaam, Yaanaayii fi Shaafaax turan.

¹³Obboloonni isaanii immoo akka mana mana abbaa isaaniitti Mikaa'el, Meshulaam, Sheebaa, Yoraayi, Yaakaan, Zii'aa fi Ebeer; isaan walumatti torba turan.

¹⁴Sanyiin Abiihaayil ilma Huur kanatti fufee kan jiruu dha; Abiihaayil ilma Huur, ilma Yaarokaa, ilma Giil'aad, ilma Mikaa'el, ilma Yeshiishaayi, ilma Yaakedoo, ilma Buus.

¹⁵Ahiin ilma Abdii'el, ilma Gunii isa mana abbaa isaaniitti dura-bu'aa turee dha.

¹⁶Isaan biyya Giil'aadii fi biyya Baashaan akkasumas mandaroota ishee fi guutummaa bakkee Shaaron lafa horii dheechifatan hundumaa keessa in jiraatan.

¹⁷Isaan kun hundinuu bara Yotaam mootii Yihudaa fi Yerobi'aam mootii Israa'elitti caaffata hidda dhalootaa keessatti caafamaniiru*.[21]

¹⁸Gosa Ruuben, gosa Gaadii fi walakkaa gosa Minaasee keessaa, namoonni jagnoonni jajjaboonni gaachana fudhachuu, billaa luqqifachuu, xiyya darbachuu danda'aniif akka itti lolan baranii lolaaf qophaa'an namoota kuma afurtamii afurii fi dhibba torbaa fi jaatama turan.

¹⁹Isaan kun dhaqanii gosa Hagaar, gosa Yetuur, gosa Naafiishii fi gosa Nodaabitti lola in kaasan.

²⁰Isaan Waaqayyoon waan amanataniif, lola sana keessatti gargaarsaaf gara isaatti yeroo iyyatanitti inni immoo kadhata isaanii dhaga'eefii, Hagaaronnii fi warri isaanii wajjin turan harka isaanii keessa akka bu'an in godhe.

²¹Isaan Hagaarota irraa gaalota kuma shantama, hoolota kumaatama dhibba lamaa fi kuma shantama, harroota kuma lama akkasumas immoo namoota kumaatama dhibba tokko booji'anii in adeeman.

²²Lolli sun fedha Waaqayyootiin waan ta'eef, namoonni baay'een in ajjeefaman; warri mo'anii laficha qabatan kun hamma bara ofii isaaniitii booji'amaniitti lafa sana irra in jiraatan.

²³Walakkaan gosa namoota Minaasee warri biyya Baashaanii hamma Ba'aal-Hermoonitti, Seniirii fi tulluu Hermoonitti qabatanii jiraachaa turan guddaa in baay'atan*.

²⁴Dura-buutonni mana mana abbaa isaanii immoo Efer, Yishe'ii, Elii'el, Azrii'el, Ermiyaas, Hodaawiiyaa fi Yaadii'el; isaan kun loltuu jajjaboo, beekamoo fi mana mana abboota isaaniitti dura-buutota turan.

²⁵Haa ta'u iyyuu malee, isaan Waaqayyo abboota isaaniitiif hin amanamne, isa dhiisanii gara waaqayyolii saba biyya sanaa warra Waaqayyo fuula isaanii duraa isaan balleessetti gara galan.

²⁶Waaqayyo inni kan Israa'el immoo Phulin mootii Asor isa ?Tiiglaat-Phileeser? jedhamee beekame isaanitti in kaase; mootichis gosa Ruuben, gosa Gaadii fi walakkaa gosa Minaasee booji'ee, gara Kalaa, Kaabor, Haaraa fi laga Gozaan lafa isaan itti hafanitti isaan in geesse*.[22]