Read west central oromo Macaafa Seenaa Baraa Isa Lammaffaa 21 Bible Online

Macaafa Seenaa Baraa Isa Lammaffaa 21 - west central oromo bible

Macaafa Seenaa Baraa Isa Lammaffaa 21

¹Kana booddee Yoshaafaax du'ee, mandara Daawit keessatti abboota isaa biratti in awwaalame; Yoraam ilmi isaa immoo mootii ta'ee iddoo isaa in bu'e.

²Obboloonni Yoraam Azaariyaa, Yehii'el, Zakaariyaas, Azariyaahuu, Mikaa'elii fi Shefaaxiyaa dha; isaan kun hundinuu ilmaan Yoshaafaax mootii Israa'el.

³Abbaan isaanii tokkon tokkon isaaniitiif meetii baay'ee fi warqee baay'ee akkasumas mi'a gati-jabeessa in kenneef; biyya Yihudaa keessaa immoo mandaroota masaraa qaban kenneefii akka isaan itti galan in godhe; Yoraam immoo angafa waan ta'eef mootummaa in kenneef.

⁴Yoraam mootummaa abbaa isaa qabatee erga jabaatee booddee, obboloota isaa hundumaa akkasumas geggeessitoota Israa'el keessaa kaan billaadhaan in fixe.

⁵Yoraam yommuu mootii ta'e nama waggaa soddomii lamaa ti; inni Yerusaalem keessa taa'ee waggaa saddeet mo'e.

⁶Yoraam intala Ahaab waan fuudheef, akkuma sanyii Ahaab fakkeenya hojii mootota Israa'el duukaa bu'ee, Waaqayyo duratti wanta hamaa in hojjete.

⁷Waaqayyo garuu sanyii Daawit keessaa, bara baraan akka ibsaatti kan geggeessu akka hin dhabamne abdachiiseera; kanaaf inni kakuu isaa isa sanyii Daawitiif dhaabe sanaaf jedhee Yoraamin balleessuu hin barbaanne*.[58]

⁸Bara mootummaa Yoraam keessa Edoom Yihudaa irraa cabsatee mootummaa ofii isheetii in dhaabbatte*.

⁹Kana irratti Yoraam hojjetoota isaa warra gurguddootaa fi konkolaattota isaa hundumaa fudhatee dhaqee, utuma warri Edoom karaa hundumaa isaaf ajajjuuwwan konkolaattota isaa marsanii jiranii, halkaniin ka'ee rukutee isaan in mo'e.

¹⁰Warri Edoom garuu hamma har'aatti iyyuu akkuma Yihudaa irraa cabsatanitti jiru; Yoraam Waaqayyoon gooftaa isa kan abboota isaatii waan irraanfateef, namoonni mandara Liibnaas baruma sana keessa isa irraa in cabsatan.

¹¹Inni tulloota Yihudaa irratti iddoowwan waaqayyolii tolfamoof itti sagadan ijaaree sabni Yerusaalem achitti isaaniif akka sagadu in godhe, warra Yihudaas karaa irraa in kaachise.[59]

¹²Baras Eliyaas raajichi caaffata kanatti fufee jiru Yoraam mootichaaf in erge; caaffatichis, ?Waaqayyo gooftaan inni kan Daawit abbaa keetii, ?Ati karaa abbaa keetii karaa Yoshaafaax irra, karaa akaakayyuu keetii karaa Aasaa mootii Yihudaa irras adeemuu dhiiftee,

¹³karaa mootota Israa'el irra in deddeebite; maatiin Ahaab akkuma waaqayyolii tolfamoo waaqessan namoonni biyya Yihudaa fi mandara Yerusaalem keessa jiraatanis isaanuma akka waaqeffatan in goote; akkasuma immoo obboloota kee ilmaan abbaa keetii warra si irra wayyan in ajjeefte.

¹⁴Kanaaf amma Waaqayyo immoo saba kee, ilmaan kee, niitota kee, wanta ati qabdu hundumaas dha'icha guddaadhaan in rukuta.

¹⁵Atis ofii keetii dhukkuba jabaadhaan in qabamta, dhukkuba mar'umaaniitiinis yeroo dheeraa in rakkatta; kana booddee immoo mi'i garaa kee si keessaa gad in jiga? jedha? jedhe*.[60]

¹⁶Waaqayyo yommus warra Filiisxiyaa fi Araboota warra biyya Itiyoophiyaa bukkee jiraatan Yoraam irratti in kaase.

¹⁷Isaan Yihudaatti duulanii qabatanii mi'a mana mootichaa keessa jiru hundumaa in saaman; kana malees niitota isaa fi ilmaan isaa fudhatanii in adeeman; ilmaan isaa keessaa Ahaaziyaa isa quxisuu malee tokko illee hin hafne.

¹⁸Kana hundumaa booddee immoo Waaqayyo, dhukkuba mar'umaanii isa ittii fayyuun hin danda'amneen isa in rukute.

¹⁹Mootichi waggaa lama guutuu dhukkubichaan rakkachaa erga turee booddee, mi'i garaa isaatii isa keessaa gad jigee, inni dhiphina guddaadhaan in du'e; sabni isaa ulfina abboota isaatiif ibidda bobeessaniiru, ulfina isaatiif garuu ibidda hin bobeessine*.

²⁰Inni mootii ta'ee mo'uu yommuu jalqabe nama waggaa soddomii lamaa ture; Yerusaalem keessa taa'ee waggaa saddeet mo'e; yeroo inni du'e namni isaaf hin gaddine; inni mandara Daawit keessatti in awwaalame; haa ta'u iyyuu malee, iddoo awwaala moototaatti hin awwaalamne*.[61]