Read west central oromo Macaafa Nahimiiyaa 6 Bible Online

Macaafa Nahimiiyaa 6 - west central oromo bible

Macaafa Nahimiiyaa 6

¹Karra dallichaatti balbala hin keenye yoon ta'e iyyuu, cabaa tokko illee utuun hin hambisin dallicha deebisee akkan ijaare Sanbalaax, Xobiiyaa fi Geshem Arabichi, diinonni keenya warri kaanis yommuu dhaga'an*,

²Sanbalaaxii fi Geshem nama anatti erganii, ?Kottu, gandeen dachaa Onoo keessaa isa tokkotti wal arginaa!? jedhan; isaan garuu, wanta hamaa ana irratti hojjechuudhaaf in yaadan.

³Anis nama isaanitti ergeen, ?Ani hojii guddaatti waanan jiruuf, gad bu'uu hin danda'u; hamma ani dhiisee gara keessanitti gad bu'uttis hojichi maaliif dhaabata ree?? jedhe.

⁴Si'a afur nama anatti erganii gaaffiidhuma isaanii duraa sana na gaafatan; anis immoo si'a arfanuu deebiidhuma tokkon isaaniif deebise.[16]

⁵Sanbalaax naa'ota isaa keessaa tokkotti caaffata hin cufamin kennee, ergaadhuma isaa isa duraa sanas itti himee si'a shanaffaa anatti in erge.

⁶Caaffatichis, ?Atii fi Yihudoonni mootummaa irratti ka'uu yaaddanii dallicha deebiftanii ijaaraa akka jirtan, saba naannoo kana jiran gidduutti dhaga'amaa jira; dubbiin kun dhugaa ta'uu isaa immoo Geshemis[17] anatti himeera; akka dubbii dhaga'amaa jiru kanaatti ati mootii isaanii ta'uuf akeeka qabda*;

⁷mootii Yihudaa akka ati taatuuf Yerusaalem keessatti kan siif labsan raajotas kaafatteetta; dubbiin kun mooticha bira in ga'a waan ta'eef, kottu walii wajjin waa'ee isaa in dudubbannaa!? in jedha.

⁸Ani immoo, ?Dubbiin kun wanta ati of keessaa fuutee dubbatte malee, dhugaa miti? jedhee nan deebiseef.

⁹Isaan, ?Humna isaan buufnee hojichi akka dhaabatu in goona? jedhanii waan yaadaniif, hundumti isaanii nu sodaachisuu in yaalan; ani garuu, ?Yaa Waaqayyo humna ana jabeessi!? jedhee nan kadhadhe.[18]

¹⁰Gaaf tokkos ani gara mana Shemaa'iyaa ilma Dalaa'iyaa Mehexaabi'el isa mana isaa keessaa gad ba'uun hin taaneefii nan dhaqe; innis, ?Namoonni dhufanii si ajjeesan waan jiraniif, isaan halkanuma tokko dhufanii si ajjeesuutii kottu anii fi ati mana qulqullummaatti ol gallee balbala isaa cufannee keessa in dhokannaa!? naan jedhe.

¹¹Ani garuu, ?Ani nama isa baqatee dhokatu miti; yookiis mana qulqullummaa keessa dhokachuudhaan of oolchuu kanan yaalu sitti fakkaataa? Ani kana hin godhu? nan jedhe*.

¹²Sanbalaaxii fi Xobiiyaatu namichi kun ana irratti raajii akka dubbatuuf horiidhaan anatti bite malee, Waaqayyo akka isa hin ergin nan hubadhe.

¹³Ani sodaadhee wanta kana gochuudhaan cubbuu akkan hojjedhuuf, maqaa gadhee isaan ittiin na tuffatanis akkan qabaadhuuf inni anatti in bitame.

¹⁴Ani immoo, ?Yaa Waaqayyo ko, Xobiiyaa fi Sanbalaaxitti akkasumas No'aadiiyaa raajittiitti, raajota warra kaan warra na sodaachisanittis akka hojii isaaniitti isaanitti ilaali!? jedhee nan kadhadhe*.[19]

¹⁵Ijaarsi dallichaa guutummaatti guyyaa shantamii lama keessatti ji'a Elul keessaa gaafa guyyaa digdamii shanii in raawwate.

¹⁶Diinonni keenya hundinuu waa'ee isaa yommuu dhaga'an, sabni naannoo keenya jiran hundinuus ija isaaniitiin yommuu argan, hojichi gargaarsa Waaqayyo keenyaatiin akka hojjetame hubatanii, na'anii lafa in ilaalan.

¹⁷Yeroo sanas gurguddoonni biyya Yihudaa caaffata baay'ee gara Xobiiyaatti in ergu, Xobiiyaa biraas immoo isaaniif in dhufa ture.

¹⁸Sababii Xobiiyaan, intala Shekaaniyaa ilma Araa fuudheef akkasumas immoo ilmi isaa Yehohaanaan intala Meshulaam ilma Berekiiyaa waan fuudheef, Yihudoota keessaa namoonni baay'een isaaf in kakatan.

¹⁹Itti dabalaniis immoo hojii isaa isa gaarii anatti in odeessu, waanan dubbadhus immoo isatti in himu turan; Xobiiyaanis ana sodaachisuudhaaf caaffata anatti in erga ture.