Read west central oromo Macaafa Nahimiiyaa 9 Bible Online

Macaafa Nahimiiyaa 9 - west central oromo bible

Macaafa Nahimiiyaa 9

¹Ji'ichattii gaafa guyyaa digdamii afuraffaa Israa'eloonni uffata gaddaa uffatanii, awwaaras mataa isaanii irratti firfirfatanii, soomuudhaaf walitti in qabaman.

²Sanyii Israa'el kan ta'an hundinuu warra ormaa irraa gargar ba'anii dhaabatanii cubbuu ofii isaanii fi irra-daddarbaa abboota isaanii in himatan*.

³Iddoodhuma isaanii dhaabatanii sa'aatii sadiif macaafa seera Waaqayyo gooftaa isaanii in dubbifatan; akkasumas sa'aatii sadiif cubbuu isaanii himachaa Waaqayyo gooftaa isaaniitiif in sagadan.[24]

⁴Lewwoonni warri buusaa ol ka'aa irra dhaabatanii sagalee isaanii ol fudhatanii Waaqayyo gooftaa isaanii waammatan Iyaasuu, Baanii, Qadmii'el, Shebanyaa, Bunii, Sherebiyaa, Baanii fi Kenaanii turan.

⁵Lewwoonni warri Iyaasuu, Qadmii'el, Baanii, Hashabniiyaa, Sherebiyaa, Hodiyaa, Shebanyaa fi Fitaahiyaa jedhaman, ?Ka'aatii Waaqayyoon gooftaa keessan isa bara baraa jajadhaa! ?Maqaan kee inni ulfina-qabeessi, inni wanta jajamuu fi waan galateeffamu hundumaa gara irraa jiru haa eebbifamu!? jedhaa!? jedhan.

⁶Yommus Israa'eloonni, ?Si'uma duwwaatu Waaqayyoo dha, bantiiwwan waaqaa fi bantii waaqaa isa bantiiwwan waaqaa gara irraa jirus, macca isaanii hundumaas, lafa, wanta isa irra jiru hundumaas, galaana, wanta isa keessa jiru hundumaas situ uume; isaan kana hundumaa situ jiraachisa; macci waaqa keessaas siif in sagadu*.

⁷Ati Waaqayyo isa Abraamin fo'attee Ur biyya Kaldootaa keessaa baaftee maqaa isaa ?Abrahaam? jettee moggaaftee dha*.

⁸Akkasumas yaadni isaa amanamaa ta'ee si duratti waan argameef, biyya Kana'aanotaa, biyya Heetotaa, biyya Amoorotaa, biyya Pheriizotaa, biyya Yibusootaa fi Girgaashotaa isaaf sanyii isaatiif kennuudhaaf kakuu in galteef; ati qajeelaa waan taateef, isa abdachiifte in raawwatteef*.[25]

⁹?Biyya Gibxitti gad qabamuu abboota keenyaa argitee, galaana diimaa birattis iyya isaanii dhageessee*,

¹⁰mootiin Gibxii, hojjetoonni isaa warri gurguddoonni, namoonni biyya isaatii hundinuus saba kee irratti gooftummaa argisiisuudhaan akka rakkisan beektee milikkitaa fi dinqii isaan irratti in raawwatte; kanaanis maqaan kee akkuma har'aa kana akka beekamu in goote*.

¹¹Galaanicha fuula isaanii dura ture gargar hirtee, lafa gogaa irra isa keessa akka darban in goote; warra isaan ari'aa turanis akka nama dhagaa bishaan guddaatti darbatutti tuujjubatti gad isaan in darbatte*.

¹²Saba kee garuu, guyyaa utubaa duumessaatiin, halkanis karaa isaan irra adeeman akka isaaniif ibsutti utubaa ibiddaatiin in geggeessite*.

¹³Ati bantii waaqaa irraa tulluu Siinaa irratti gad buutee isaanitti dubbattee, firdii qajeelaadhaa fi seera dhugaa, seerrataa fi abboommii gaariis isaaniif in kennite*.

¹⁴Karaa garbicha kee Musee, Sanbanni kee inni qulqulluun isaan biratti akka beekamu gootee, abboommii, seerrataa fi seera in kenniteef*.

¹⁵Yeroo beela'anitti waaqa irraa buddeena isaaniif kennitee, yeroo dheebotanittis kattaa keessaa bishaan isaaniif baafte; biyya ati akka isaan qabataniif harka ol fuutee isaaniif kakattetti akka galaniif isaan in abdachiifte*.[26]

¹⁶?Abboonni keenya garuu of bokoksanii mataa jabaatan malee, abboommii keef tole hin jenne*.

¹⁷Isaan garuu abboomamuu in didan; mataa jabaatanii didanii ka'uu isaaniitiin gara mana garbummaatti deebi'uudhaaf dura buutuu fo'atan malee, dinqii ati isaan gidduutti hojjette hin yaadanne; ati immoo Waaqayyo isa cubbuu namaaf dhiisuudhaaf qophaa'ee dha, araara-qabeessaa fi o'a-qabeessas; dheekkamsaaf suuta jetta, gaarummaan kee guddaa waan ta'eefis ati isaan hin ganne*.

¹⁸Yommuu isaan dibicha tolfatanii, ?Waaqayyo kee inni biyya Gibxii si baase isa kana? jechuu isaaniitiin arrabsoo guddaa hammamii si arrabsan*!

¹⁹Kana keessaa immoo araara kee isa guddaa irraa kan ka'e, lafa onaa keessatti isaan hin ganne; utubaa duumessaa isa guyyaa karaa isaanitti argisiisaa ture, utubaa ibiddaa isa halkan karaa isaan irra adeeman ibsaafii tures isaan duraa hin fuune.

²⁰Hafuurri kee inni gaariin akka isaan barsiisuuf isaaniif kennite; maannaa isaaniif kennuus harka keessa hin qabanne; yeroo isaan dheebotanis bishaan isaaniif kenniteetta.

²¹Ati lafa onaa keessatti waggaa afurtama wanta isaan barbaachisu isaaniif kennite; homtuu isaanitti hin hir'anne, uffanni isaanii isaan irratti hin dhumne, miilli isaaniis hin iitofne*.[27]

²²?Ati karaa golee hundumaa mootummootaa fi saba lafa irraa isaaniif in kennite; isaanis biyya Sihoon mootii Heshboonii fi Oog mootii Baashaan in qabatan*.

²³Ijoolleen isaanii akka urjoota waaqa keessaa akka baay'atan gootee, gara biyya isa abboonni isaanii itti lixanii akka qabataniif abdachiiftetti isaan in galchite*.

²⁴Ijoolleen isaaniis itti lixanii biyyicha in qabatan; atis saba biyya Kana'aan gad deebiftee mootota isaanii fi namoota biyya sanaa wajjin akka fedhan akka isaan godhaniif harka isaanii jala in galchite*.

²⁵Isaan mandaroota gurguddaa dallaa dhagaa qaban, lafa coomaa, manneen mi'a gaggaariidhaan guutaman, boolla bishaanii qotamanii qophaa'an, iddoo dhaabaa waynii fi ejersaa akkasumas mukkeetii iji isaanii nyaataman baay'ee in qabatan; isaan nyaatanii quufanii in gabbatan; gaarummaa kee isa guddaadhaanis qannootti in jiraatan*.[28]

²⁶?Booddee garuu isaan si didanii ka'an malee, hin abboomamne, seera kees of duubatti in gatan; raajota kee warra gara keetti isaan deebisuuf jedhanii dhugaa isaanitti ba'an in ajjeesan; kana gochuun isaaniis arrabsoo guddaa hammamii ture*!

²⁷Kanaaf ati harka diinota isaanii warra isaan dhiphisaniitti dabarsitee isaan in kennite; isaanis yommuu dhiphatan sitti in iyyatan; ati bantii waaqaa irraa isaaniif dhageessee, akka baay'ina araara keetiitti, harka diinota isaanii keessaa baasee kan isaan oolchu isaaniif in kennite.

²⁸Erga takka aara galfatanii garuu, isaan deebi'anii si duratti hamaa hojjechuutti in ka'an; atis harka warra isaan jibbaniitti isaan kennite, warri isaan jibbanis isaan in mo'an; yeroo isaan deebi'anii sitti iyyatanitti immoo ati bantii waaqaa irraa isaan dhageessee akka araara keetiitti si'a baay'ee isaan oolchiteetta.

²⁹Gara seera keetiitti akka isaan deebi'aniif, ati isaan gorsiteetta; isaan garuu of bokoksanii abboommii kee dhaga'uu in didan; wanta si duratti qajeelaa ta'e isa namni eegee ittiin jiraatu irrattis ka'anii in yakkan; mataa jabaatanii didanii dugda sitti gatan malee, si hin dhageenye*.

³⁰Haa ta'u iyyuu malee, ati bara baay'ee isaaniif obsitee, karaa raajota keetii hafuura keetiin isaan in gorsite; isaan garuu si dhaga'uu waan didaniif, harka saba naannoo sana jiraniitti isaan in laatte*.

³¹Ati Waaqayyo araara-qabeessaa fi o'a-qabeessa waan taateef, baay'ina araara keetiif jettee isaan balleessuu, isaan gatuus in dhiifte*.[29]

³²?Kanaafis yaa Waaqayyo keenyaa, gooftaa guddaa gooftaa aango-qabeessaa fi sodaatamaa! Yaa isa kakuu keetii fi gaarummaa kee eegduu! Rakkinni bara mootota Asorii hamma har'aatti nu irra, mootota keenya irra, gurguddoota keenya irra, luboota keenya irra, raajota keenya irra, abboota keenya irra, guutummaa saba kee irras ga'e, fuula kee duratti wanta xinnootti hin ilaalamin*!

³³Wanta nu irra ga'e hundumaafuu ati dhugaa qabda, nuyi garuu waan jal'aa hojjenne*.

³⁴Mootonni keenya, gurguddoonni keenya, luboonni keenya, abboonni keenyas seera kee duukaa hin buune, abboommii kee fi gorsa ati isaan gorsites hin dhaggeeffanne.

³⁵Isaan biyya bal'aa fi coomaa ati laatteef keessatti, bara mootummaa isaanii isa ati arjummaa itti argisiifte keessatti iyyuu siif hin hojjenne, hojii isaanii isa hamaa irraas hin deebine.

³⁶Kunoo, har'a nuyi garboota; biyya abboonni keenya midhaan isaaf wanta gaarii inni baasu akka nyaataniif, ati kenniteef keessatti nuyi garboota taane.

³⁷Wanti baay'een lafichi kennu, mootota warra ati sababii cubbuu keenyaaf nu irra keesseef in gala; isaan nuuf horii keenya irratti akka jaallatan in hojjetu; nuyi rakkina guddaa keessa jirra.[30]

³⁸Yaada kana hundumaas nuyi caaffataan walii galtee tokko in dhaabna; isas gurguddoonni keenya, Lewwoonni keenyaa fi luboonni keenya mallattoo isaaniitiin in cimsu? jedhan.