Read west central oromo Macaafa Asteer 5 Bible Online

Macaafa Asteer 5 - west central oromo bible

Macaafa Asteer 5

¹Guyyaa sadaffaattis Asteer uffata mootummaa uffattee, kutaa mana mootichaa isa gara keessaa lixxee fuullee lafa mootichi taa'u in dhaabatte; mootichi immoo mana mootummaa isaa keessa teessoo isaa irra fuullee balbala manichaatiin in taa'a ture.

²Asteer mootittiin kutaa manichaa isa gara keessaa sana keessa utuu dhaabattuu mootichi yommuu arge, isheen isa biratti adda in argatte; mootichi siiqqee harka isaa keessa jiru isa warqee irraa hojjetame sana isheetti in qabe, isheenis itti dhi'aattee fiixee siiqqee sanaa in qabde*.

³Yommus mootichi, ?Yaa Asteer mootittii, maal siif godhu? Maalis barbaadde? Walakkaa mootummaa kootii iyyuu yoo ta'e siif in kennama? jedheen*.

⁴Asteer immoo deebiftee, ?Yaa mootii, jaalala kee yoo ta'e, har'a nyaachisa ani siif qopheesse irratti Haamaanii wajjin anaaf argami!? jette.[14]

⁵Yommus mootichi, ?Wanta Asteer jette akka goonutti, Haamaanin ariitiidhaan waamaa!? jedhe; mootichii fi Haamaan gara nyaachisa isa Asteer qopheessitee in dhaqan.

⁶Daadhii waynii utuu dhugaa jiranii mootichi, ?Wanti ati kadhattu maali? Innoo siif in kennama; maalis barbaadda? Walakkaa mootummaa kootii iyyuu yoo ta'e siif in kennama? jedhee Asteerin in gaafate*.

⁷Kana booddee Asteer deebiftee, ?Kadhannaan kootii fi fedhi koo, kanatti fufee kan jiruu dha;

⁸yaa mootii, ani si duratti ayyaana argadhee, waanan kadhadhe anaaf kennuun, wantan barbaades anaaf raawwachuun jaalala kee yoo ta'e, atii fi Haamaan nyaachisa ani bor isiniif qopheessu irratti anaaf argamaa! Anis achi irratti gaaffii ati mootichi na gaafatteef deebii nan kenna? jetteen.[15]

⁹Gaafas Haamaan gammadee yaadni isaas itti tolee achii gad in ba'e; garuu Mordekaayin karra kellaa mootichaa duratti yommuu arge, waan inni isaaf hin ka'iniif yookiis sodaa isa hin argisiisiniif, Mordekaayitti aaree in boba'e.

¹⁰Haa ta'u iyyuu malee, Haamaan of qabee gara mana isaatiitti galee, firoota isaa fi haadha manaa isaa Zereshin ofitti in waamsise.

¹¹Haamaan guddina qabeenya isaatii, baay'ina ilmaan isaatii, waan ittiin mootichi isa guddise hundumaa, attamittis gurguddoota biyyaa fi hojjetoota isaa gara irraa akka isa kaa'e isaanitti in baannate.

¹²Haamaan itti fufee, ?Kana duwwaas utuu hin ta'in, Asteer mootittiin, nyaachisa qopheessite irratti mootichaa wajjin ana duwwaa malee nama tokko iyyuu ol hin galchine; boris akkasuma mootichaa wajjin ani waamameera;

¹³garuu Mordekaayi Yihudicha isa karra kellaa mootichaa dura taa'u utuun arguu, kun hundinuu bu'aa anaaf hin qabu? jedhe.

¹⁴Yommus Zeresh haati manaa isaa fi firoonni isaa hundinuu, ?Muka itti nama rarraasan kan dhundhuma shantama ol dheeratu hojjechiisi, Mordekaayin isatti rarraasuudhaaf bor mootichaa wajjin dubbadhu! Kana booddee gammachuudhaan mootichaa wajjin gara nyaachisa sanaa dhaquu in dandeessa? jedhaniin; dubbiin isaa Haamaanin waan gammachiiseef, muka itti nama rarraasan sana in hojjechiise.