Read west central oromo Macaafa Asteer 9 Bible Online

Macaafa Asteer 9 - west central oromo bible

Macaafa Asteer 9

¹Ji'a kudha lammaffaa isa ?Adaar? jedhamutti, ji'ichattiis guyyaan kudha sadaffaan guyyaa abboommiin mootichaa hojii irra oole, warri diinaa Yihudoota irratti humna argachuudhaaf itti abdatan ture; amma garuu dubbiin isaa gara galee Yihudoonni guyyuma sanatti warra isaan jibban irratti humna in argatan.

²Yihudoonni warra isaan miidhuu barbaadan fixuudhaaf, guutumaa kutaa biyya Ahashweros mootichaa keessatti mandaruma mandara isaaniitti walitti in gamtatan; namoonni biyya sanaa hundinuu waan isaan sodaataniif, isaan keessaa namni tokko illee isaaniin mormuu hin dandeenye.

³Gurguddoonni kutaa biyyaa, bulchitoonni, abboonni biyyaa fi hojjetoonni mootummaa warri hojii garaa garaa irra jiran hundinuu, Mordekaayin waan sodaataniif, Yihudoota in gargaaru turan.

⁴Mordekaayi mana mootichaa keessatti guddaa beekamaa in ta'e; aboon isaas guddachaa waan adeemeef, oduun isaa guutumaa kutaa biyyichaa keessatti in dhaga'ame.

⁵Yihudoonni diinota isaanii hundumaa billaadhaan rukutanii, fixanii in barbadeessan; warra isaan jibban irratti wanta barbaadan in hojjetan.

⁶Mandara Susaan lafa manni mootummaa jiru keessatti iyyuu namoota dhibba shan raawwatanii in fixan.

⁷Akkasumas immoo Phaarshandaataa, Daalfon, Asfaataa,

⁸Phoraataa, Adaaliyaa, Ariidaataa,

⁹Paarmashtaa, Ariisaayi, Ariidaayi, Wayzaataa,

¹⁰ilmaan Haamaan ilma Hamedaataa isa diina Yihudootaa ture sanaa kurnan in fixan; qabeenya isaanii garuu hin boojine*.[25]

¹¹Lakkoobsi namoota gaafa sana mandara Susaan lafa manni mootummaa jiru keessatti ajjeefamanii mootichatti in himame.

¹²Mootichi immoo Asteer mootittiidhaan, ?Yihudoonni mandara Susaan lafa manni mootummaa jiru keessatti, namoota dhibba shanii fi ilmaan Haamaan kurnan raawwatanii fixaniiru; kutaa biyya mootummaa kootii warra hafan keessatti immoo maal godhan? Ammas wanti ati gaafattu maali? Innoo siif in kennama; maalis barbaadda? Innoo siif in raawwatama? jedhe*.

¹³Yommus Asteer deebiftee, ?Yaa mootii, jaalala kee yoo ta'e, Yihudoonni mandara Susaan keessa jiraatan boris akkuma ajaja har'aa kana akka godhaniif aboon haa kennamuuf! Ilmaan Haamaan kurnanis muka itti nama rarraasanitti haa rarraafaman!? jette.

¹⁴Yommus mootichi kun akka godhamuuf in abboome; labsii mandara Susaan keessatti labsame booddees, reeffi ilmaan Haamaan kurnanii in rarraafame*.

¹⁵Yihudoonni mandara Susaan keessa jiraatan ji'a Adaar gaafa guyyaa kudha afuraffaa ammas walitti qabamanii mandarattii keessaa namoota dhibba sadii in fixan; qabeenya isaanii garuu hin boojine.[26]

¹⁶Yihudoonni warri kaan, warri kutaa biyya mootichaa warra hafan keessa jiraatan immoo jireenya isaanii eeggachuuf, diinota isaanii harkaas furamuudhaaf yommuu walitti gamtatan, warra isaan jibban keessaa namoota kuma torbaatamii shan in fixan; qabeenya isaanii garuu hin boojine.

¹⁷Kun Adaar gaafa guyyaa kudha sadaffaa ta'e; gaafa guyyaa kudha afuraffaa immoo boqotanii, nyaatanii, dhuganiis in gammadan.

¹⁸Gamtaan Yihudootaa warri mandara Susaan keessa jiraatan garuu, Adaar gaafa guyyaa kudha sadii fi kudha afurii walitti in qabaman; gaafa guyyaa kudha shanaffaa immoo boqotanii, nyaatanii, dhuganiis in gammadan.

¹⁹Yihudoonni gandeenii fi mandaroota dallaa hin qabne keessa jiraatan garuu Adaar gaafa guyyaa kudha afurii guyyaa gammachuu, guyyaa nyaataa fi dhugaatii, guyyaa itti kennaa waliif kennan godhanii in ayyaaneffatan.

²⁰Mordekaayi wanta ta'e kana caafee, Yihudoota guutummaa kutaa biyya Ahashweros mootichaa isa dhi'oo fi isa fagoo keessa jiraatan hundumaaf in erge.

²¹Caaffata kanaanis wagguma waggaatti Adaar gaafa guyyaa kudha afurii fi kudha shanii akka ayyaaneffataniif isaaniif in dhaabe.

²²Guyyoonni kun guyyoota Yihudoonni diinota isaanii harkaa itti furaman, ji'i kunis ji'a gaddi isaanii gammachuutti, boo'ichi isaaniis kolfatti geddarame ture; kanaaf guyyoota kana guyyoota nyaataa fi dhugaatii, guyyoota gammachuu, guyyoota kennaa itti waliif kennanii fi guyyoota hiyyeessota itti gargaaran akka godhataniif isaan in abboome.

²³Akkuma Mordekaayi isaaniif caafetti Yihudoonni ayyaana ayyaaneffachuu jalqaban sana ittuma in fufan.

²⁴Kanas guyyaan sun guyyaa isa Haamaan ilmi Hamedaataa namni biyya Agaag, inni diina Yihudoota hundumaa sun, Yihudoota dhiphisee balleessuudhaaf yeroo koratetti buufanni mukaa guyyaa sanatti baaseefii waan tureef, ittiin yaadachuudhaaf in godhan.

²⁵Yommuu dubbichi karaa Asteer mooticha bira ga'e garuu, akeeki Haamaan Yihudoota irratti qopheesse inni hamaan matuma isaatti deebi'e, innii fi ilmaan isaa muka itti nama rarraasanitti akka rarraafamaniif mootichi caaffataan abboommii in baase*.

²⁶Kanaafis guyyoota kana ?Furiim? jedhanii in moggaasan; [innis guyyoota ?Buufata mukaa? jechuu dha]; sababii dubbii caaffata kana keessatti caafame hundumaatiif, sababii waan arganiitiif, waan isaanitti dhufeefis*,

²⁷Yihudoonni ofii isaaniitiif, sanyii isaaniitiif, namuma qomoo isaa Yihudiitti geddaratuufis, akka caaffata kanaatti wagguma waggaadhaan guyyoota kana lamaan yeroo isaa eeganii akka ayyaaneffataniif seera godhanii in dhaabbatan.

²⁸Guyyoonni Furiim kun Yihudoota gidduutti utuu hin ayyaaneffamin hin hafin, seenaan isaaniis sanyii isaanii keessaa hin balleeffamin! Guyyoonni kun dhaloota hundumaa, maatii hundumaa, kutaawwan biyyaa hundumaa fi mandaroota hundumaa keessatti haa yaadataman, haa ayyaaneffamanis![27]

²⁹Yommus Asteer mootittiin intalli Abiihaayil, Mordekaayi Yihudichaa wajjin caaffata waa'ee guyyoota Furiimiif caafame isa lammaffaa aboo guutuudhaan in cimsan.

³⁰Mordekaayi Yihudoota hundumaaf, kutaawwan biyya Ahashweros mootichaa dhibbaa fi digdamii torbanuufis caaffata in erge; caaffaticha keessattis nagaanii fi gabiin akka isaaniif ta'uuf hawwa isaa erga mul'isee booddee,

³¹caaffanni kun, ?Akkuma ani Mordekaayi Yihudichii fi Asteer mootittiin abboomnaan, Yihudoonnis immoo waa'ee soomuu fi waa'ee boo'anii kadhachuu seera godhanii ofii isaaniitiif, sanyii isaaniitiifis dhaabanitti akkasuma guyyoota Furiim kana yeroo isaanii eeganii ayyaanessuun akka barbaachisu cimsuudhaaf caafame? jedhe.

³²Abboommiin Asteer seerrata guyyoota Furiimiif ba'e kana in cimse; kunis caafamee kaa'ameera.