Read west central oromo Seera Ba'uu 1 Bible Online

Seera Ba'uu 1 - west central oromo bible

Seera Ba'uu 1

¹Ijoolleen Yaaqoob isa Israa'el jedhame, warri maatii isaanii fudhatanii Yaaqoobii wajjin biyya Gibxiitti gad bu'an maqaan isaanii kanatti aanee jira;

²Ruuben, Shimi'oon, Lewwii, Yihudaa,

³Yisaakor, Zebuloon, Benyaamiin,

⁴Daan, Niftaalem, Gaadi, Asheer.

⁵Sanyiin Yaaqoob kun lubbuu torbaatama turan; Yoseef duraan iyyuu biyya Gibxii ture*.

⁶Barri isaanii genyaan Yoseef, obboloonni isaa hundinuu, dhaloonni bara sana keessa turan hundinuus in du'an.

⁷Sanyiin Israa'el warri achitti hafan garuu wal horanii, baay'atanii, gurmuu baay'ifatanii, guddaa jabaatanii biyyicha in guutan*.[1]

⁸Ergasii immoo mootiin haaraan Yoseefin hin beekne tokko biyya Gibxii irratti in mo'e*.

⁹Mootichi saba isaatiin, ?Ilaa! Namoonni Israa'el kun guddaa baay'atanii nutti jabaataniiru.

¹⁰Egaa isaan kana caalaa akka hin baay'anne gochuudhaaf, kottaa afchaalummaadhaan isaan in qabannaa; kanaa achi lolli yoo ka'e diina keenya bira goranii, nu lolanii biyya keessaa in ba'u? jedhe*.

¹¹Kanaaf warri Gibxii namoota Israa'el hojii jabaadhaan gad qabanii, humnaan akka hojjechiisaniif namoota itti godhan; warri Israa'elis mandaroota gombisaa midhaanii Fiitoomii fi Raamsesin Fara'ooniif innis mootii warra Gibxiif in ijaaran*.

¹²Danuudhuma warri Gibxii gad isaan qaban keessaa, warri Israa'el immoo caalaa baay'atanii, lafa guutan; kana irraa kan ka'e warri Gibxii jabeessanii isaan in sodaatan.

¹³Warri Gibxii Israa'elootatti hammaatanii akka garbaatti isaan hojjechiifatan.

¹⁴Suphee isaan kuchisiisuudhaan, xuuphii isaan tolchisiisuudhaan, hojii garaa garaa maasii keessaa hojjechiisuudhaanis hojii isaanitti ulfaachisanii jireenya itti hadheessan; hojii kana hundumaa hojjechiisuudhaan isaanitti in hammaatan.[2]

¹⁵Yommus mootiin Gibxii deessiftuu dubartoota Ibrootaa warra ?Siifraa fi Phuwaa? jedhamaniin,

¹⁶?Dubartoota warra Ibrootaa yommuu deessiftan, akkuma mucaan dhalateen dhiira ta'ee fi durba taatee ishee ilaalaa! Dhiira yoo ta'e ajjeesaa! Durba yoo taate garuu jireenyatti hambisaa!? jedhe.

¹⁷Deessiftoonni sun garuu Waaqayyoon waan sodaataniif, akka mootiin Gibxii isaan abboome hin goone; mucooliin dhiiraas akka jiraatan godhan.

¹⁸Mootiin Gibxii yommus deessiftoota sana waamsisee, ?Maaliif dubbii kana balleessitanii, mucooliin dhiiraa akka jiraatan gootan?? isaaniin jedhe.

¹⁹Deessiftoonni sun immoo mootichaan, ?Dubartoonni warra Ibrootaa akka dubartoota warra Gibxii miti; isaan jireenya isaaniiti jajjaboo dha, deessiftoonni utuu isaan bira hin ga'in da'anii in eegu? jedhan.

²⁰Waaqayyo immoo deessiftoota sanaaf gaarii godhe; namoonni Israa'elis baay'atanii guddaa in jabaatan.

²¹Warri deessiftuun Waaqayyoon waan sodaataniif inni immoo mana isaan godhachiise.

²²Kana irratti mootichi saba isaa hundumaa abboomee, ?Ijoollee dhiiraa warra Ibrootaa hundumaa akka dhalataniin bishaan Abbayyaa keessa buusaa, ijoollee durbaa isaanii immoo jireenyatti hambisaa!? jedhe.