Read west central oromo Seera Ba'uu 25 Bible Online

Seera Ba'uu 25 - west central oromo bible

Seera Ba'uu 25

¹Waaqayyo Museedhaan,

²?Israa'eloonni kennaa akka anaaf kennanitti itti himi; nama garaan isaa akka kennuuf ajaje hundumaa irraa kennaa sana fuudhaa*!

³Wanti isin isaan harkaa fuutan warqee, meetii, sibiila borrajjii,

⁴uffata jirbii bifa waaqaa, dhiilgee, bildiimaa, quncee talbaa gaarii, rifeensa reettii,

⁵gogaa korbeessa hoolaa isa diimeffame, raroo hoolaa bishaanii, muka laaftoo,

⁶dhadhaa ejersaa ibsaadhaaf, dhadhaa ejersaa akka dibatamuuf, ixaana foolii tolee fi urgooftuu,

⁷callee Sardoniikis, callee gati-jabeessa, kan biraas dirata fuula duraa fi qomee akka gaachanaatti kaa'amuu dha.

⁸Ani isaan gidduu akkan jiraadhuuf isaan godoo qulqullaa'aa anaaf haa ijaaran*!

⁹Iddoo buufataa sanaaf mi'a isaa hundumaa akka fakkeenya isa ani sitti argisiisutti hojjedhu*![130]

¹⁰?Isaan sanduuqa kakuu dheerinni isaa dhundhuma lamaa fi walakkaa, bal'inni isaa dhundhuma tokkoo fi walakkaa, irraan-oleen isaas dhundhuma tokkoo fi walakkaa ta'u muka laaftoo irraa haa tolchan!

¹¹Keessa isaa fi duuba isaatti warqee qullaa'aa uffisi, qaalaa isaattis naannessii warqee kaa'i!

¹²Amartii warqee afur tolchi, miilla isaa arfanitti lama gar tokkoon lama immoo gara kaaniin itti baqsi!

¹³Muka laaftoo irraa danqaraa tolchii, warqee itti uffisi!

¹⁴Danqaricha immoo sanduuqicha kakuu ittiin baachuudhaaf amartoota bukkee garanaa fi garasiin jiran keessa loosi!

¹⁵Danqaroonni sun amartoota sanduuqa kakuu keessa akka loofamanitti haa taa'an malee achii hin fuudhamin*!

¹⁶Dhuga-baatuu ani siif kennu sana sanduuqicha keessa in keessa.[131]

¹⁷?Teessoo araaraa dheerinni isaa dhundhuma lamaa fi walakkaa, bal'inni isaa dhundhuma tokkoo fi walakkaa warqee qullaa'aa irraa tolchi*!

¹⁸Kiruubel lama warqee tumamaa irraa tolchiitii gar lamaan fiixee isaa teessoo araaraatti kaa'i!

¹⁹Kiruub isa tokko fiixee gar tokkoo irratti, Kiruub isa kaan immoo fiixee gara kaanii irratti tolchi!

²⁰Kiruubel qoochoowwan isaanii teessoo araaraa gubbaatti bal'isanii haa golbooban! Fuulli isaanii immoo walitti gara galee gara teessoo araaraa haa ilaalu!

²¹Teessoo araaraa sana sanduuqicha irra kaa'i; sanduuqicha keessa immoo dhuga-baatuu ani siif kennu sana kaa'i.

²²Ani achitti sin arga, teessoo araaraa irraan, Kiruubel lamaan sanduuqa dhuga-baatuu irra jiran gidduudhaan, abboommii ani namoota Israa'eliif kennu hundumaa sitti nan hima*.[132]

²³?Ati gabatee dheerinni isaa dhundhuma lama, bal'inni isaa dhundhuma tokko, irraan-oleen isaa dhundhuma tokkoo fi walakkaa ta'u muka laaftoo irraa tolchi!

²⁴Warqee qullaa'aa itti uffisi, naannoo isaattis warqee mari!

²⁵Xiyyoo hamma bal'ina harkaa ga'u hidhii isaatti naannessii tolchi, isattis naannessii warqee mari!

²⁶Gabatichaaf amartii warqee afur tolchii, iddoo miillan isaa arfan jiran golee arfanuutti kaa'i!

²⁷Amartoonni sun immoo danqaraa ittiin gabaticha baataniif akka ta'utti hidhii isaatti haa dhi'aatan!

²⁸Danqaraa muka akka laaftoo irraa tolchi, warqees itti uffisi! Gabatichis ittiin haa baatamu.

²⁹Harkeewwan isaa fi waciitii isaa, xoofoodhaa fi cuggee ittiin kennaa dhugaatii dhi'eessan, warqee qullaa'aa irraa tolchi!

³⁰Buddeena ilaalchaas yeroo hundumaa ana dura gabaticha irra kaa'i*![133]

³¹?Ati warqee qullaa'aa irraa baattuu ibsaa tolchi! Baattuun ibsichaa warqee tumame irraa haa hojjetamu, miilli isaa, somaan isaa, qolli isaa, xoofoon isaa, daraaraan isaas, isuma irraa haa ta'u!

³²Cinaacha isaa gar-lamaanitti damee ja'a, dameen ibsaa sadii gar tokkotti, dameen ibsaa sadii immoo gara kaanitti haa baafamu!

³³Damee tokko irratti qolli daraaraa lawuzii fakkaatu sadii, xoofoodhaa fi daraaraa wajjin, damee isa kaan irratti immoo qolli daraaraa lawuzii fakkaatu sadii, xoofoodhaa fi daraaraa wajjin akkasuma damee ja'aan baattuu ibsaatti baafaman sana irratti haa hojjetamu!

³⁴Qolli daraaraa lawuzii fakkaatu afur xoofoo isaa fi daraaraa isaa wajjin baattuu ibsaa sana irratti argamuun irra jira.

³⁵Damee baattuu ibsaa sana keessaa ba'an damee lama lama gidduutti xoofoo tokko tokko, damee isaa ja'anitti immoo xoofoo lama lama tolchi!

³⁶Xoofoon isaanii fi dameen isaanii hundinuu battee warqee qullaa'aa tumame tokko irraa haa tolfaman!

³⁷Ibsaa torba tolchi, akka isaan iddoo isa fuula isaanii dura jiru sanatti ibsaniif baattuu sana irra dhadhaabi!

³⁸Waan ittiin fo'aa ibsaa kutanii fi baattuun daaraa isaa warqee qullaa'aa irraa haa hojjetaman!

³⁹Baattuun ibsichaa sunii fi mi'i isaa hundinuu warqee qullaa'aa akka kiilo graamii soddomii shanii ulfaatuun haa hojjetamu*!

⁴⁰Akka fakkeenya isa tulluu irratti sitti argisiifame sanaatti ilaalii hojjedhu*![134]