Read west central oromo Seera Ba'uu 28 Bible Online

Seera Ba'uu 28 - west central oromo bible

Seera Ba'uu 28

¹?Ati namoota Israa'el keessaa Aaron obbooleessa kee fi ilmaan isaa ofitti dhi'eessi! Aaronii fi ilmaan isaa, Naadaab, Abiihuu, Ele'azaar, Itaamaaris luboota ta'anii anaaf haa hojjetan*!

²Aaron obbooleessa keetiif ulfinaa fi simboo akka ta'uufitti uffata qulqullaa'aa hojjedhuuf!

³Namoonni hafuura ogummaa na biraa argatanii harka-tolina qaban, Aaron hojii lubummaa isa kan kootiif addaan akka baafamutti, uffata isaaf akka hojjetaniif itti himi*!

⁴Uffanni isaan hojjetaniifis, qomee akka gaachanaa, dirata fuula duraa, qoloo, kittaa kuulaan miidhagfame, marata mataa fi hidhata mudhii ti; isaan, Aaron obbooleessi kee fi ilmaan isaa uffatanii luboota ta'anii anaaf akka hojjetaniif uffata qulqullaa'aa in hojjetuuf.

⁵Kanas warqee, boffee bifa waaqaa, dhiilgee, bildiimaadhaa fi quncee talbaa gaarii isa walitti fo'ame irraa in hojjetu*.[139]

⁶?Isaan dirata fuula duraa sana hojii harka-toleessaatiin warqee, boffee bifa waaqaa, dhiilgee, bildiimaadhaa fi quncee talbaa gaarii walitti fo'ame irraa in hojjetu;

⁷gatiittii lamaan irras kan ittiin qaxxaamurfatan lama, duraa fi booddeedhaan itti haa qabsiifaman!

⁸Hidhanni inni ittiin hidhatamu hojii isa fakkaatuun warqee, boffee bifa waaqaa, dhiilgee, bildiimaadhaa fi quncee talbaa gaarii walitti fo'ame irraa hojjetame haa ta'u!

⁹Atis dhagaa gati-jabeessa ?Sardoniikis? jedhamu lama fuudhiitii maqaa ilmaan Israa'el isaan irratti qirixi*.

¹⁰Dhagaa isa tokko irratti maqaa nama ja'aa, dhagaa isa kaan irrattis maqaa warra hafanii ja'an akka toora dhaloota isaaniitti qirixi!

¹¹Akkuma namni dhagaa gati-jabeessa irratti hojjetu mallattoo irratti keessa galchee qirixu, atis akkasuma maqaa ilmaan Israa'el dhagaa sana lamaan irratti keessa galchitee in qirixxa; dhagaa sana immoo xiyyoo warqee daraaraa hidhaa furgaasaa fakkaatu hojjettee itti in galchita.

¹²Dhagaa sana lamaan seenaa namoota Israa'eliif, isa dirata fuula duraa sana ittiin gatiittii irra qaxxaamurfatanitti qabsiisi! Aaron immoo ittiin yaadachuudhaaf gatiittii isaa lamaanitti maqaa isaanii Waaqayyo duratti haa baatu!

¹³Ati xiyyoo warqee daraaraa hidhaa furgaasaa fakkaatu in hojjetta;

¹⁴diraa warqee qullaa'aa akka funyootti micciirame lama hojjettee, diraa isa akka funyoo sanas xiyyoo daraaraa hidhaa furgaasaa fakkaatu sanatti in qabsiifta.[140]

¹⁵?Korojoo qomee akka gaachanaa isa mi'i murtoon koo ittiin beekamu keessa taa'u hojii harka-toleessaatiin in hojjetta; ati akkuma diranni fuula duraa sun hojjetametti warqee, boffee bifa waaqaa, dhiilgee, bildiimaadhaa fi quncee talbaa gaarii walitti fo'ame irraa in hojjetta.

¹⁶Innis cinaachi isaa hundinuu wal qixxaate, dirribii dheerinni isaa taakkuu tokko, bal'inni isaas taakkuu tokko, in ta'a;

¹⁷isa irratti immoo dhagaa gati-jabeessa toora afuriin in maxxansita; toora isa duraa keessa, dhagoota gati-jabeeyyii Saardiyon, Tophaaziyon, Simaaragidos,

¹⁸toora isa lammaffaa keessa, Kaarbunkil, Safiiros, Yaasphis,

¹⁹toora isa sadaffaa keessa, Hiiyaakinxos, Kaalqedon, Ametiisxos,

²⁰toora isa afuraffaa keessa, Krisoliixos, Sardoniikis, Beerilos turan; isaanis xiyyoon warqee naannoo isaaniitti hojjetamee korojicha irratti in maxxanfamu.

²¹Dhagoonni sun akka maqaa ilmaan Israa'elitti kudha lama haa ta'an! Isaan akkuma mallattootti maqaan gosa kudha lamaanii adduma addaan keessa lixee tokko tokko irratti kan qirixame in ta'u.

²²?Ati, funcaa warqee qullaa'aa isa micciiramaa akka funyoo, qomee akka gaachanaa sanaaf in hojjetta.

²³Amartii warqee lamas qomee akka gaachanaa sanaaf hojjettee, golee qomichaa warra gara olii lamaanitti in qabsiifta.

²⁴Kana booddees funyoo warqee sana lamaan amartii lamaan golee qomichaa warra gara olii jiran sanatti qabsiisi!

²⁵Fiixee funyoowwan sanaa lamaan daraaraa akka hidhaa furgaasaa lamaanitti akkasumas fuula duraan isa dirata fuula duraa sana ittiin gatiittii irra qaxxaamurfatanitti in qabsiifta.

²⁶Amartii warqee lamas hojjettee, fiixee qomee akka gaachanaa sana lamaanitti, andaara isaa isa gara keessaatiin dirata fuula duraa sanatti aanutti in keessa.

²⁷Ammas amartii warqee lama tolchiitii fuula duraan warra dirata fuula duraa sana ittiin gatiittii irra qaxxaamurfatan lamaanitti, gara jalaan iddoo inni hidhata sana gara irraatti walitti bu'utti qabsiisi!

²⁸Isaan qomeen akka gaachanaa sun hidhata sana irra akka taa'utti, qomeen akka gaachanaa sun dirata fuula duraa sanattii hiikamee akka hin laafnetti, shanqaqqoo bifa waaqaa qabuun amartii isaa amartii dirata fuula duraatti haa hidhan!

²⁹?Akkasitti Aaron iddoo qulqullaa'aa sana yommuu lixu, yeroo hundumaa ana Waaqayyo duratti akka ittiin yaadatamaniif, maqaa ilmaan Israa'el isa korojoo qomee akka gaachanaa isa mi'i murtoon koo ittiin beekamu keessa taa'u irra jiru sana laphee isaa irratti haa baatu!

³⁰Uriimii fi tumiim mi'a ittiin murtoo koo beekan immoo, korojoo qomee akka gaachanaa sana keessa in keessa; isaan yeroo Aaron gara iddoo isa fuula koo duraatti ol lixu laphee isaa irratti in argamu; akkasitti Aaron yeroo hundumaa fuula koo duratti, mi'a ittiin namoota Israa'eliif murtoo godhu laphee isaa irratti in baata*![141]

³¹?Qoloo dirata fuula duraa wajjin uffatamu guutummaatti boffee bifa waaqaatiin in hojjetta;

³²inni gidduudhaa qaawwa ittiin mataatti diratan haa qabaatu! Qaawwa sanatti wanti goodamee dha'ame naannoo isaa irratti haa hodhamu! Hidhiin isaa akka hin cirannetti akka kal'ee kan jabaatu haa ta'u!

³³Naannoo andaara isaa ija muka akka rumaanii, boffee bifa waaqaa, dhiilgee fi bildiimaadhaan hojjetamaniin in tolchita; gidduu gidduu isaaniitti immoo bilbila warqee itti in hojjechiifta;

³⁴tarreen isaas bilbila warqee, ija muka akka rumaanii, bilbila warqee, ija muka akka rumaanii ta'e andaara uffatichaa irratti hojjetame naanna'ee wal ga'a.

³⁵Aaron yeroo hojii lubummaa hojjetutti isa haa uffatu! Inni akka hin duunetti yeroo inni gara iddoo qulqullaa'aatti fuula koo duratti ol galuuf yeroo inni achii gad ba'u sagaleen bilbilichaa haa dhaga'amu*![142]

³⁶?Wanta akka daraaraa warqee qullaa'aa irraa hojjedhuutii, akka nama mallattoo irratti keessa galchee qirixuutti, ?Waaqayyoof kan qulqullaa'e? kan jedhu isa irratti qirixii baasi*!

³⁷Isa immoo maataba bifa waaqaatiin marata mataatti in qabsiifta; marata sana irrattis gara fuula duraatiin haa ta'u!

³⁸Inni adda Aaron irra haa oolu! Aaron immoo balleessaa wanta qulqullaa'aa isa ijoolleen Israa'el kennaa isaanii isa qulqullaa'aa godhanii addaan baasan keessatti argamu ofii isaa irratti in baata; kennaan kun ana Waaqayyo duratti akka fudhatamaniifis Aaron yeroo hundumaa wanta akka daraaraa warqee sana adda isaa irraa qabaachuun irra jira.

³⁹Kittaa sanaa fi marata mataa sanas quncee talbaa gaariitiin dhoofsisi! Hidhanni mudhiis hoddhaa harkaatiin kan miidhagfame haa ta'u![143]

⁴⁰?Ilmaan Aaroniifis kittaa, hidhata mudhii, wanta mataatti kaa'atanis in hojjettaaf; isaan ulfinaa fi simboodhaaf akka ta'aniifitti in hojjetta*.

⁴¹Uffata kana Aaron obbooleessa kee fi ilmaan isaatti uffisiitii luboota ta'anii anaaf akka isaan hojjetanitti isaan dibii hojicha irra isaan dhaabi, isaan qulqulleessis*!

⁴²Qullaa isaanii dhoksuudhaafis fiddoo dhagnatti aanu quncee talbaa irraa in hojjettaaf; inni mudhiidhaa ka'ee gudeeda kan ga'u haa ta'u!

⁴³Aaronii fi ilmaan isaa iddoo qulqullaa'aa sana keessatti hojjechuudhaaf dunkaana itti wal ga'an sana lixanii iddoo aarsaatti yommuu dhi'aatan, balleessaa of irratti fidanii akka hin duunetti, kana haa uffatan! Kun isaa fi sanyii isaa warra isa booddee dhufaniif yeroo hundumaaf seerrata dhaabataa haa ta'u![144]