Read west central oromo Seera Ba'uu 31 Bible Online

Seera Ba'uu 31 - west central oromo bible

Seera Ba'uu 31

¹Kana booddee Waaqayyo Museedhaan,

²?Ilaa! Ani gosa Yihudaa keessaa Bazaali'el ilma Urii akaakayyuu Huur maqaa dha'ee waammadheera.

³Ani Waaqayyo hafuura kootiin, ogummaadhaan, hubannaadhaan, beekumsa waan garaa garaa miidhagsanii hojjechuutiinis isa guuteera.

⁴Inni akka itti warqee, meetii, sibiila borrajjiis hojjetan akeeka in baasa.

⁵Dhagaas ijaarsaaf in tolcha, muka in soofa, waan garaa garaas miidhagsee in hojjeta.

⁶Ani kunoo, akka inni isaa wajjin hojjetuuf gosa Daan keessaa Aholiiyab ilma Ahisamaak kenneeraaf; waan ani si abboome hundumaa akka godhaniif warra ogeessota hundumaaf ani ogummaa kenneeraaf*.

⁷Dunkaana isa ana Waaqayyo duratti itti wal ga'an, sanduuqa dhuga-baatuu, teessoo araaraa, mi'a godichaa hundumaas haa hojjetan!

⁸Gabatee fi mi'a isaa, baattuu ibsaa warqee qullaa'aa irraa hojjetame mi'a isaa hundumaa wajjin, iddoo aarsaa isa ixaanni irratti aarfamu haa tolchan!

⁹Iddoo aarsaa qalmi gubamu irratti gubatu, mi'a isaa hundumaa wajjin, waciitii, jaliitii isaas haa qopheessan!

¹⁰Uffata kulaan miidhagfame, uffata qullaa'aa isa Aaron lubichii fi ilmaan isaa yommuu anaaf hojjetan uffatan haa qopheessan!

¹¹Dhadhaa dibataa, ixaana urgaa'us iddoo qulqullaa'aa sanaaf haa qopheessan, isaan kana hundumaa akkan si abboometti haa hojjetan!? jedhe.[153]

¹²Ammas Waaqayyo Museedhaan,

¹³?Saba Israa'eliin, ?Sanbatoota koo eegi! Ani Waaqayyo isa si qulqulleessu akkan ta'e akka beektuuf, dhaloota hundumaa keessatti Sanbanni kun anaaf si gidduutti milikkita? jedhi!

¹⁴Guyyaa Sanbataa eegi inni siif qulqullaa'aa dha; namni qulqullinatti isa hin eegne haa ajjeefamu! Namni guyyaa sanatti hojii hojjete hundinuu saba isaa keessaa haa balleeffamu!

¹⁵Guyyoonni ja'a guyyoota hojiin itti hojjetamuu dha, guyyaa inni torbaffaan garuu guyyaa aara-galfannaa ti, guyyaan kun ana Waaqayyoof kan qulqullaa'ee dha; namni guyyaa Sanbataatti hojii hojjete hundinuu haa ajjeefamu!

¹⁶Sabni Israa'el dhaloota isaanii hundumaa keessatti akka kakuu bara baraatti Sanbata haa ayyaaneffatan!

¹⁷Ani Waaqayyo guyyaa ja'a keessatti bantii waaqaa fi lafa uumee, guyyaa torbaffaatti immoo waanan hojjechaa ture hundumaattii boqodheen aara galfadhe; kun anaa fi saba Israa'el gidduutti bara baraan milikkita in ta'a? jedhe*.[154]

¹⁸Waaqayyo tulluu Siinaa irratti Musee wajjin dubbatee erga fixee booddee, gabatoota dhuga-baatuu lamaan, gabatoota dhagaa warra ofii isaatii quba isaatiin irratti caafe sana Museetti in kenne*.[155]