Read west central oromo Seera Ba'uu 36 Bible Online

Seera Ba'uu 36 - west central oromo bible

Seera Ba'uu 36

¹?Namoonni Bazaali'elii fi Aholiiyab jedhaman, warri hojii miidhagsanii hojjechuu beekan hundinuus akkuma Waaqayyo abboometti hojii ijaarsa godoo qulqullaa'aa haa hojjetan! Isaan kun warra Waaqayyo hojii garaa garaa akka hojjetaniif ogummaadhaa fi hubannaa isaaniif kennee dha? jedhe.

²Museen yommus namoota Waaqayyo ogummaa garaa isaanii keessa kaa'eef, Bazaali'elii fi Aholiiyabin, warra hojii miidhagsanii hojjechuu beekanii hojii kanaaf of kennan hundumaas, hojii kana akka hojjetaniif in waame.

³Isaan kunis kennaa namoonni Israa'el godoon qulqullaa'aan sun akka ittiin ijaaramuuf dhi'eessan Musee harkaa in fuudhan; namoonni Israa'el immoo dabalanii ganama ganama jaalala isaaniitiin kennaa isaanii Museetti in dhi'eessu turan.

⁴Kana irratti warri hojii harkaa ba'eessa godhanii beekan, warri ijaarsa godoo qulqullaa'aa irra jiran, adduma addaan hojii hojjetan dhiisanii in dhufan.

⁵Isaan, ?Sabni kun hojii Waaqayyo nu abboome kana hojjechuudhaaf wanta barbaachisu caalaatti baay'ee fiduutti jira? jedhanii Museetti in himan.

⁶Museen immoo, ?Dhiirri yookiis dubartiin tokko illee kennaa godoo qulqullaa'aa sanaaf dabalee waan tokko hin godhin!? jedhanii guutummaa buufata sanaa keessatti akka lallabaniif in abboome; kanaafis namoonni waa fiduu irraa in ittifaman.

⁷Wanti isaan kanaan dura godhan iyyuu hojii hojjetamu hundumaaf ga'ee, irraa in hafa ture.

⁸Namoota hojii godichaa hojjetan sana keessaa warri hojii miidhagsanii hojjechuu beekan, godicha bullukkoo arraba kudhan irraa in hojjetan; bullukkoowwan sun boffee quncee talbaa gaarii, boffee bifa waaqaa, boffee dhiilgee fi bildiimaa irraa walitti fo'amanii in dha'aman; bifni Kiruubelis hojii harka-toleessaatiin isaan keessatti kan hojjetame turan.

⁹Bullukkoon kunis tokkon tokkon isaa dheerinni isaa dhundhuma digdamii saddeet, bal'inni isaa dhundhuma afur; bullukkoon hundinuu immoo safarri isaanii tokko ture.

¹⁰Isaan bullukkoo shan akka baal'ee tokkootti, warra hafan shanan immoo akka baal'ee tokkootti walitti qabsiisan.

¹¹Gurroo bifa waaqaa qabu bullukkoo akka baal'ee tokkootti walitti qabsiifame isa duraa keessaa andaara arraba isa moggaatti in hojjetan; akkasumas bullukkoo akka baal'ee tokkootti walitti qabsiifame isa lammaffaa keessaa andaara arraba isa moggaatti gurroo in hojjetan.

¹²Andaara baal'ee bullukkoo isa duraatti gurroowwan shantama, andaara bullukkoo akka baal'ee tokkootti walitti qabsiifame isa lammaffaa gara moggaattis gurroowwan shantama itti in hojjetan; gurroowwan sun moggaa gamaa gamanaatiin akka wal fudhatan in ta'an.

¹³Hokkoo warqees shantama in hojjetan; walumatti godoo tokko fayyaa akka ta'utti hokkoowwan sanaan baal'ee bullukkoo lamaan walitti in qabsiisan.

¹⁴Akkasumas bullukkoo rifeensa re'ootaa irraa hojjetame kudha tokkon sanaan godoo isa duraa sana irratti dunkaana in hojjetan.

¹⁵Bullukkoon kun tokkon tokkon isaa, dheerinni isaa dhundhuma soddoma, bal'inni isaa dhundhuma afur; bullukkoon kudha tokkonuu safarri isaanii tokko ta'e.

¹⁶Bullukkoo shan kophaatti akka baal'ee tokkootti, warra hafan ja'an immoo kophaatti akka baal'ee tokkootti walitti in qaqabsiisan.

¹⁷Andaara bullukkoo akka baal'ee tokkootti walitti qabsiifame isa duraatti gurroowwan shantama, andaara bullukkoo akka baal'ee tokkootti walitti qabsiifame isa lammaffaattis gurroowwan shantama in hojjetan.

¹⁸Hokkoo sibiila borrajjii shantama hojjetanii walumatti dunkaana tokko akka ta'utti baal'ee bullukkoo sana lamaan walitti qabsiisan.

¹⁹Dunkaana sanaaf irra-buusa gogaa korbeessa hoolaa isa duugamee diimeffame irraa, irra-buusa lammaffaaf immoo raroo hoolaa bishaanii irraa in hojjetan.

²⁰Godoo sana ol qajeelchuudhaaf tuggeewwan babattee muka laaftoo irraa in hojjetaniif.

²¹Tuggeen batteen tokko dheerinni isaa dhundhuma kudhan, bal'inni isaa dhundhuma tokkoo fi walakkaa ture.

²²Tuggeen batteen kun adduma addaan isa kaanii wajjin wal keessa galuuf akka ta'utti fiixee isaa irraa mucha qaba; kanas tuggeewwan godoo sanaa hundumaatti in godhan.

²³Tuggeewwan kana yeroo hojjetan, cinaacha godoo sanaa isa gara mirgaaf tuggee digdama tolchan.

²⁴Tuggee digdamman sanaaf miiloo meetii irraa hojjetame afurtama in tolchan; akkasitti tuggeen tokko muchi isaa lamaan kan keessa lixu miiloo uraa qabu lama lama jala isaatti qaba ture.

²⁵Cinaacha godoo sanaa isa lammaffaa, isa gara bitaaf, tuggee babattee digdama in hojjetan.

²⁶Akkasumas adduma addaan tuggee tokko jalatti miiloo lama lama, walitti miiloo meetii irraa hojjetame afurtama in godhan.

²⁷Cinaacha godoo sanaa isa gara dugda duubaa, isa gara lixa-biiftuuf immoo tuggee babattee ja'a in hojjetan.

²⁸Golee godichaa warra gara dugda duubaaf tuggee babattee lama in hojjetan.

²⁹Isaan karaa jalaa jalqabanii hamma bantiitti wal irra darbanii amartii isa gara olii irratti walitti in qabsiifaman; kan lachuu isaanii akkasuma in ta'e, isaan golee lamaan in argisiisan.

³⁰Akkasitti tuggeen babatteen saddeet miiloo jalaa meetii irraa hojjetaman kudha ja'anii wajjin achitti argaman; tuggeen tokko miiloo lama lama jala isaatti qaba ture.

³¹Dagaleewwan muka laaftoo irraa in hojjetan; isaan tuggeewwan cinaacha godichaa gar-tokkoof dagalee shan turan.

³²Tuggeewwan cinaacha godichaa isa gara kaaniifis dagaleen shan, tuggeewwan cinaacha godichaa isa dugda duubaa, gara lixa-biiftuuttiifis dagaleen shan turan.

³³Dagaleen inni gidduu, walakkaa tuggeewwan sanaa irra gara tokkoo hamma gara kaaniitti in fulla'e.

³⁴Tuggeewwan sanatti warqee uffisan; amartiiwwan isaanii warra dagaleewwan keessa galanis warqeedhaan in hojjetan; dagaleewwan sanattis warqee in uffisan.

³⁵Golgaa isa boffee bifa waaqaa, boffee dhiilgee, boffee bildiimaadhaa fi quncee talbaa gaarii isa walitti fo'ameen dha'ame irraa in hojjetan; inni immoo bifni Kiruubel hojii harka-toleessaatiin kan keessatti hojjetame ture.

³⁶Isaan utubaa afur muka laaftoo irraa hojjetanii warqee itti uffisan; mismaara warqee, meetii baqfamaa irraas miiloo afur in tolchaniif.

³⁷Golgaa boffee bifa waaqaa, boffee dhiilgee, boffee bildiimaadhaa fi quncee talbaa gaarii walitti fo'ameen dha'amee, hoddhaadhaan miidhagfame irraa balbala godichaaf in hojjetan.

³⁸Utubaa shanii fi mismaara isaanii in tolchan; mataa utuboota sanaa fi amartii isaanii warra walitti hidhanitti warqee in uffisan; miiloon isaanii shanan immoo sibiila borrajjii irraa kan hojjetaman turan.