Read west central oromo Seera Ba'uu 37 Bible Online

Seera Ba'uu 37 - west central oromo bible

Seera Ba'uu 37

¹Yommus Bazaali'el muka laaftoo irraa sanduuqa kakuu dheerinni isaa dhundhuma lamaa fi walakkaa, bal'inni isaa dhundhuma tokkoo fi walakkaa, irraan-oleen isaa dhundhuma tokkoo fi walakkaa ta'u in tolche*.

²Keessa isaa fi duuba isaatti warqee qullaa'aa uffisee, qaalaa isaattis naannessee warqee in kaa'e.

³Amartii warqee afur tolchee, miillan isaa arfanitti lama gar-tokkoon, lama immoo gara kaaniin in baqse.

⁴Muka laaftoo irraa danqaraa tolchee, warqee itti uffise.

⁵Danqaraa sana sanduuqicha kakuu ittiin baachuudhaaf amartoota bukkee garanaa fi garasiin jiran keessa loose.

⁶Warqee qullaa'aa irraa teessoo araaraa dheerinni isaa dhundhuma lamaa fi walakkaa, bal'inni isaa dhundhuma tokkoo fi walakkaa tolche.

⁷Inni Kiruubel lama warqee tumame irraa tolchee, fiixee teessoo araaraa gar lamaanitti kaa'e.

⁸Kiruub isa tokko fiixee gar-tokkoo irratti, Kiruub isa kaan immoo fiixee gara kaanii irratti akkasitti Kiruubel lamaan teessoo araaraa irratti garanaa fi garasiin in tolche.

⁹Kiruubel qoochoowwan isaanii teessoo araaraa gubbaatti bal'isanii in golbooban, fuula isaaniis walitti gara galchanii gara teessoo araaraa in ilaalu turan.[181]

¹⁰Inni muka laaftoo irraa gabatee dheerinni isaa dhundhuma lama, bal'inni isaa dhundhuma tokko, irraan-oleen isaa dhundhuma tokkoo fi walakkaa ta'u in tolche.

¹¹Warqee qullaa'aa itti uffisee, naannoo isaattis warqee mare.

¹²Xiyyoo hamma bal'ina harkaa ga'u hidhii isaatti naannessee tolchee isattis naannessee warqee mare.

¹³Gabatichaaf amartii warqee afur tolchee, iddoo miillan isaa arfan jiran golee arfanuutti kaa'e.

¹⁴Amartoonni sun danqaraa ittiin gabaticha baataniif akka ta'utti hidhii isaatti kaa'aman.

¹⁵Danqaraa muka laaftoo irraa tolchee, gabatichi akka ittiin baatamuuf warqee itti uffise.

¹⁶Mi'a gabaticha irra kaa'amu harkee, waciitii, xoofoo, cuggee ittiin kennaa dhugaatii dhi'eessanis warqee qullaa'aa irraa in tolche.

¹⁷Bazaali'el warqee qullaa'aa irraa baattuu ibsaa in tolche; baattuun ibsichaa warqee tumame irraa hojjetame; miillan isaa, somaan isaa, qolli isaa, xoofoon isaa fi daraaraan isaa isuma irraa itti hojjetame.

¹⁸Cinaacha isaa lamaanitti damee ja'a, dameen ibsaa sadii gar-tokkotti, dameen ibsaa sadii immoo gara kaanitti baafaman.

¹⁹Damee tokko irratti qolli daraaraa lawuzii fakkaatu sadii xoofoodhaa fi daraaraa wajjin, damee isa kaan irrattis qolli daraaraa lawuzii fakkaatu sadii xoofoodhaa fi daraaraa wajjin, akkasuma damee ja'an baattuu ibsaa irratti baafaman sana irratti hojjetaman.

²⁰Qolli daraaraa lawuzii fakkaatu afur xoofoo isaa fi daraaraa isaa wajjin baattuu ibsaa sana irra jiru.

²¹Damee baattuu ibsaa sana keessaa ba'an damee lama lama gidduutti xoofoo tokko tokko, damee isaa ja'anitti immoo xoofoo lama lama tolche.

²²Xoofoon isaa fi dameen isaa battee warqee qullaa'aa tumame tokko irraa tolfame.

²³Inni ibsaa torba, waan ittiin fo'aa ibsaa kutan, baattuu isaas warqee qullaa'aa irraa in hojjete.

²⁴Baattuu ibsaa sanaa fi mi'a isaa hundumaa warqee qullaa'aa akka kiilo graamii soddomii shanii ulfaatuun hojjete.

²⁵Yommus inni muka laaftoo irraa iddoo aarsaa isa ixaanni irratti aarfamu, dheerinni isaa dhundhuma tokko, bal'inni isaa dhundhuma tokko, gara arfanuun wal qixxee, irraan-oleen isaa dhundhuma lama ta'u tolche; gaanfonni isaas isuma irraa itti in baafaman.

²⁶Inni naannoo hundumaatti, irra keessa isaatti, bukkee isaatti, gaanfa isaattis warqee qullaa'aa uffise; naannoo isaattis warqee in hojjete.

²⁷Danqaraa keessa loosanii ittiin baachuudhaaf, amartii warqee lama sabbata isaa sana jalatti karaa lachuu andaara isaa lamaanitti tolche.

²⁸Danqaraa sana muka laaftoo irraa tolchee, warqee itti uffise.

²⁹Akka warri urgooftuu gaarii qopheessan hojjetanitti, urgooftuu dibataa isa qulqullaa'aa in tolche*.[182]