Read west central oromo Seera Ba'uu 38 Bible Online

Seera Ba'uu 38 - west central oromo bible

Seera Ba'uu 38

¹Bazaali'el itti fufee muka laaftoo irraa iddoo aarsaa dheerinni isaa dhundhuma shan, bal'inni isaa dhundhuma shan, irraan-oleen isaa dhundhuma sadii, gara arfanuun wal qixxee kan ta'e in ijaare.

²Golee iddoo aarsaa arfan gubbaatti gaanfota baase; gaanfota sanas isuma irraa itti baasee sibiila borrajjii itti uffise.

³Mi'a iddoo aarsaa sanaa hundumaa caabii, waan ittiin daaraa hammaaran, waciitii ittiin aarsaa dhi'eessan, fileewwan foonii, baattuu irratti ibidda bobeessanis sibiila borrajjii irraa in tolche.

⁴Iddoo aarsichaattis sibiila borrajjii akka gingilchaatti wal keessa babaasee ittisa tolchee, gara walakkaa iddoo aarsaa ga'uu akka danda'utti geengoo isaa jalaan kaa'e.

⁵Golee arfan ittisa sibiila borrajjii sanaattis danqaraa ittiin baatan akka keessa loosaniif amartii afur itti baqse.

⁶Muka laaftoo irraa danqaroota tolchee sibiila borrajjii itti uffise;

⁷danqaroota sanas iddoon aarsaa akka ittiin baatamuuf amartoota isa bukkee iddoo aarsichaa isa muka irraa dhooqfamee hojjetametti jiru sana keessa loose.

⁸Waciitii fi jaliitii sibiila borrajjii of-ilaalii dubartoota warra balbala dunkaana itti wal ga'an sanaatti yeroo sagadaa hojii gargaaran irraa fuudhee tolche*.[183]

⁹Inni itti aansee oobdii in tolche; oobdichis gara harka mirgaatiin golgaa quncee talbaa fo'amaadhaan dha'amee, dheerinni isaa dhundhuma dhibba ta'u qaba ture.

¹⁰Utuboonni digdammanii fi miiloowwan isaanii digdamman sibiila borrajjii irraa, hokkoon isaanii fi amartiin walitti hidhu meetii irraa hojjetaman.

¹¹Golgaan gara harka bitaas immoo dheerinni isaa dhundhuma dhibba tokko utuboonni isaanii digdammanii fi miiloowwan isaanii digdamman sibiila borrajjii irraa, hokkoon isaanii fi amartiin walitti hidhus meetii irraa hojjetaman.

¹²Gara lixa-biiftuutiin golgaa bal'inni isaa dhundhuma shantama ta'u qaba ture; utuboonni isaanii kudhan, miiloowwan isaanii kudhan; hokkoon isaanii fi amartiin walitti hidhu meetii irraa hojjetaman.

¹³Gara boruu karaa biiftuun baatus oobdichi dhundhuma shantama bal'ata ture.

¹⁴Dheerinni golgichaa karaa ittiin ol lixan gar-tokkoon dhundhuma kudha shan; utuboota sadii fi miiloowwan sadii qaba ture.

¹⁵Dheerinni golgaa isa gara kaaniis dhundhuma kudha shan, utuboota sadii fi miiloowwan sadii qaba ture.

¹⁶Golgaan naannoo oobdichaa hundinuu uffata quncee talbaa fo'amaa irraa dha'ame.

¹⁷Miiloowwan utuboota sanaa sibiila borrajjii irraa hojjetaman, hokkoon isaanii fi amartiin walitti hidhu immoo meetii irraa hojjetaman; fiixee utuboota oobdichaattis meetiitu uffifame; akkasuma utuboonni oobdichaa hundinuu amartii meetii irraa hojjetame qabu turan.

¹⁸Golgaan karra oobdichaa uffata quncee talbaa fo'amaadhaan dha'amee, namni ogeessi immoo fo'aa bifa waaqaa, bifa dhiilgee, bifa bildiimaa qabuun irratti hoddhee tolche qaba ture; dheerinni isaa dhundhuma digdama; akkuma golgaa oobdichaa irraan-oleen isaa dhundhuma shan, bal'inni isaa dhundhuma shan ture.

¹⁹Utuboonni isaa arfanii fi miiloowwan isaa arfan sibiila borrajjii irraa hojjetaman; hokkoon isaanii fi amartiin walitti hidhu meetii irraa hojjetaman; bantiiwwan isaaniittis meetiitu uffifame.

²⁰Qofoon godoo sanaa fi oobdii sanatti naanna'anii jiran hundinuu meetii irraa hojjetaman.

²¹Mi'i godoo dhuga-baatuu inni Itaamaar Lewiichi ilmi Aaron lubichaa abboommii Museetiin tarreetti caafee qopheesse kanatti aane jira*;

²²Bazaali'el ilmi Urii, akaakayyuun Huur gosa Yihudaa keessaa wanta Waaqayyo, Musee abboome hundumaa in hojjete;

²³Aholiiyab ilmi Ahisamaak gosa Daan keessaa, inni waa qirixee bifa itti baasu uffata quncee talbaa irratti, boffee bifa waaqaa, boffee dhiilgee, boffee bildiimaadhaan kulaan miidhagsee hojjetu, isaa wajjin ture*.

²⁴Godoon qulqullaa'aan akka ittiin hojjetamuuf warqeen kenname sun hundumti isaa akka madaalii godoo qulqullaa'aatti akka kiilo graamii kuma tokkoo ture.

²⁵Meetiin namoota waldaa keessaa lakkaa'aman irraa walitti qabame, akka madaalii godoo qulqullaa'aatti kiilo graamii kuma sadii fi dhibba afurii fi digdamaa ture.

²⁶Namoonni warra dur lakkaa'amanii jiranitti dabalaman, waggaan isaaniis digdamaa hamma isaa oliitti kan jiru hundinuu lakkoobsi isaanii kumaatama dhibba ja'aa fi kuma sadii fi dhibba shanii fi shantama; isaan kun mata mataatti akka madaalii godoo qulqullaa'aatti akka walakkaa sheeqelii baasan*.

²⁷Meetii kiilo graamii kuma sadii fi dhibba shaniin miiloo godoo qulqullaa'aa fi miiloo golgichaatu hojjetame; kiilo graamii kuma sadii fi dhibba shaniin miiloo dhibba tokkotu hojjetame; kiilo graamii soddomii shaniin miiloo tokkotu hojjetame.

²⁸Akka kiilo graamii digdamaatiin immoo utubootatti hokkoo hojjetee, bantiiwwan isaanii amartiidhaan walitti qabsiise.

²⁹Sibiilli borrajjiin kennaa sochoofamuuf dhi'aate kiilo graamii kuma lamaa fi dhibba afurii fi afurtama ture.

³⁰Isaaniin miiloowwan balbala dunkaana itti wal ga'anii, iddoo aarsaa sibiila borrajjii irraa hojjetamee fi ittisa isaa isa sibiila borrajjii irraa hojjetame, mi'a isaa hundumaas in hojjete.

³¹Akkasumas miiloowwan utubaa naannoo oobdichaa, miiloowwan utubaa karra oobdichaa, qofoon dunkaanichaa hundinuu, qofoon utubaa naannoo oobdichaa hundinuus isaaniin hojjetaman.[184]