Read west central oromo Seera Ba'uu 40 Bible Online

Seera Ba'uu 40 - west central oromo bible

Seera Ba'uu 40

¹Waaqayyo yommus Museedhaan,

²?Godoo dunkaana itti wal ga'anii sana ji'a duraa keessaa guyyaa duraatti dhaabi!

³Sanduuqa dhuga-baatuus isa keessa kaa'i, sanduuqichatti immoo golgaa tolchi!

⁴Gabatee ol galchii mi'a isaa tottolchi, baattuu ibsaas ol galchii ibsaa irra dhaabi!

⁵Iddoo aarsaa warqee irraa hojjetame isa ixaana irratti aarsan sanduuqa dhuga-baatuu sana dura dhaabi! Balbala godichaattis golgaa kaa'i!

⁶Iddoo aarsaa isa qalmi gubatu irratti aarfamus balbala godoo dunkaanicha itti wal ga'an sanaa dura dhaabi!

⁷Dunkaana itti wal ga'anii fi iddoo aarsaa sana gidduu waciitii dhiqannaa dhaabi, waciitichatti bishaan naqi!

⁸Oobdii itti naannessii tolchi, karra oobdichaatti golgaa kaa'i!

⁹Dhadhaa dibataas fuudhii godicha sanaa fi wanta isa keessa jiru hundumaa dibi, isaa fi wanta isa keessa jiru hundumaa qulqulleessi! Innis qulqullaa'aa in ta'a.

¹⁰Iddoo aarsaa isa qalmi gubamu irratti aarfamuu fi mi'a isaa hundumaa dibi, iddoo aarsichaas qulqulleessi! Innis hundumaa irra qulqullaa'aa in ta'a.

¹¹Waciitichaa fi jaliitii isaa dibii qulqulleessi*!

¹²Aaronii fi ilmaan isaa gara balbala dunkaana itti wal ga'an sanaatti fidii bishaaniin isaan dhiqi!

¹³Aaron luba ta'ee anaaf akka hojjetuuf uffata qulqullaa'aa itti uffisiitii, dibii isa qulqulleessi!

¹⁴Ilmaan isaas as fidii kittaa itti uffisi!

¹⁵Luba ta'anii anaaf akka hojjetaniif, abbaa isaanii akkuma dibde isaanis dibi! Dibamuun isaanii kun dhaloota dhufu hundumaa keessatti lubummaa bara baraa ta'ee in jiraata? jedhe.[186]

¹⁶Museen yommus wanta Waaqayyo isa abboome hundumaa akkuma sanatti in hojjete.

¹⁷Godichis waggaa lammaffaa keessaa ji'a tokkoffaatti ji'icha keessaa guyyaa tokkoffaatti in dhaabate;

¹⁸Museen godicha yommuu dhaabe, miiloowwan isaa itti kaa'ee, tuggeewwan isaa dhadhaabee, dagalees keessa loosee, utuboota isaas in dhaabe.

¹⁹Ergasii godoo sana irratti dunkaana diriirsee, dunkaana sana akka Waaqayyo abboometti godichatti in uffise;

²⁰dhuga-baatuu sanas fuudhee, sanduuqa kakuu keessa kaa'e; danqaraas sanduuqichatti hidhee, teessoo araaraas sanduuqicha irra kaa'e.

²¹Sanduuqichas godichatti ol galchee, akka Waaqayyo isa abboometti sanduuqa dhuga-baatuutti golgaa tolche.

²²Museen gabaticha karaa gara bitaa godoo sanaatiin golgaa duubaan dunkaana itti wal ga'an sana keessa dhaabe;

²³achi irras akka Waaqayyo isa abboometti fuula Waaqayyoo dura buddeena naqe.

²⁴Baattuu ibsaas fuullee gabatichaatiin karaa gara mirgaa godoo sanaa dunkaana itti wal ga'an keessa kaa'e;

²⁵ibsaas akka Waaqayyo isa abboometti Waaqayyo dura baatticha irra in dhaabe.

²⁶Ergasii Museen iddoo aarsaa warqee irraa hojjetame sana golgicha fuul duraan dunkaana itti wal ga'an keessa dhaabe;

²⁷isa irrattis akka Waaqayyo isa abboometti ixaana fooliin isaa urgaa'u aarsaa dhi'eesse.

²⁸Kana booddee balbala godichaatti golgaa kaa'e;

²⁹iddoo aarsaa isa qalmi gubamu irratti aarfamu balbala godoo sanaa dura dunkaana itti wal ga'an keessa dhaabee, akka Waaqayyo abboomettis achi irratti qalma gubamuu fi kennaa midhaanii in dhi'eesse.

³⁰Waciitiis dunkaana itti wal ga'anii fi iddoo aarsaa sana gidduu dhaabee, akka ittiin dhiqataniif bishaan itti naqe.

³¹Musee fi Aaron, ilmaan isaaniis harka isaanii fi miilla isaanii ittiin in dhiqatu turan.

³²Yeroo gara dunkaana itti wal ga'anii dhaqan hundumaa yookiis yeroo iddoo aarsaatti dhi'aatan hundumaa Waaqayyo akka Musee abboometti in dhiqatu turan.

³³Museen godichaa fi iddoo aarsaa sanatti naannessee oobdii tolchee, karra oobdichaattis golgaa in kaa'e; akkanatti Museen hojicha in raawwate.

³⁴Duumessis dunkaana itti wal ga'anitti uffise, ulfinni Waaqayyoo godicha keessa guute*;

³⁵Museen immoo duumessi godicha irra waan tureef, ulfinni Waaqayyoo godoo sana keessa waan guuteef, dunkaana itti wal ga'an sana keessa lixuu hin dandeenye.

³⁶Namoonni Israa'el hamma adeemaa turan kana hundumaatti yommuu duumessichi godoo sana irraa ka'u isaanis ka'anii in adeemu turan*.

³⁷Yommuu duumessichi irraa ka'uu dhiisu immoo hamma gaafa duumessichi irraa ka'utti isaanis achii hin ka'an.

³⁸Duumessi Waaqayyoos guyyaa guyyaa dunkaanicha irra in buufata ture, ibiddi immoo halkan halkan duumessicha irra ture; namoonni Israa'elis yeroo karaa adeemaa turan hundumaatti kana in argu turan.[187]