Read west central oromo Seera Ba'uu 9 Bible Online

Seera Ba'uu 9 - west central oromo bible

Seera Ba'uu 9

¹Waaqayyo ammas Museedhaan, ?Gara mootichaa dhaqiitii, ?Waaqayyo gooftaan inni kan warra Ibrootaa:- Sabni koo dhaqee anaaf haa hojjetuu gad dhiisi*!? jedha.

²Ati diddee amma iyyuu qabaa yoo isaanitti jabeessite,

³ani kunoo fardeen, harroota, gaalota, saawwan, bushaayee, horii kee warra ala dheedan hundumaa irratti dha'icha guddaa isaa fiduudhaaf harka koo ol nan fudhadha*!

⁴Garuu horii warra Israa'elii fi horii warra Gibxii gidduutti garaagarummaa nan godha, kan Israa'elootaa hundumaa keessaa tokko iyyuu hin du'u*;

⁵Waaqayyo yeroo kun itti ta'u dhaaba godhee, ?Ani wanta kana bor biyyichatti nan fida? jedhii itti himi!? jedhe.[40]

⁶Borumtaa isaas Waaqayyo wanta kana in godhe; horiin warra Gibxii hundinuu in dhuman; horii Israa'elootaa keessaa garuu tokko illee hin duune.

⁷Mootichi itti ergee, horii Israa'elootaa keessaa tokko illee akka hin du'in in hubate; haa ta'u iyyuu malee, mootichi garaa isaa in jabeesse, saba sanas gad hin dhiifne*.[41]

⁸Waaqayyo ergasii Museedhaa fi Aaroniin, ?Cilaattii qodaatti qabatu iddoo ibiddaatii harka guutaatii hammaaradhaa, Museen ija mootichaa duratti gara waaqaatti haa facaasu!

⁹Innis guutummaa biyya Gibxii irratti haa awwaara'u, namaa fi horii guutummaa biyya Gibxii irrattis iita madaa'u haa fidu!? jedhe*.

¹⁰Yommus isaan cilaattii qodaatti qabatu iddoo ibiddaatii hammaaratanii fuula mootichaa dura in ijaajjan; Museen cilaattii sana gara waaqaatti in facaase; inni immoo namaa fi horiitti iita madaa'u in ta'e*;

¹¹iiti madaa'u warra ayyaana hedan, warra Gibxii hundumaattis in ba'e; kanaaf warri ayyaana hedan iita madaa'u kanaan Musee dura dhaabachuu dadhaban.

¹²Waaqayyo garuu mootichi mataa akka jabaatu in godhe; akkuma Waaqayyo Museetti dubbatee ture inni isaaniif hin dhageenye*.[42]

¹³Kana booddee Waaqayyo Museedhaan, ?Bor ganama bariidhaan ka'iitii mooticha duratti dhi'aadhuu, ?Waaqayyo gooftaan inni kan Ibrootaa sabni koo dhaqee anaaf haa hojjetuu gad dhiisi*!

¹⁴Biyya hundumaa keessa kan akka koo akka hin jirre akka beektutti, alana dha'icha baay'ee jabaa si irratti, hojjetoota kee irrattis nan buusa*.

¹⁵Egaa akkan harka koo ol fudhadheen si, saba kees utuun dha'eera ta'ee silaa yowwana ati lafa irraa baddeetta;

¹⁶haa ta'u iyyuu malee, ani humna koo sitti argisiisuudhaaf, maqaan koos biyya hundumaa keessatti akka beeksifamuuf ati dhaabattee akka haftu nan godhe*.

¹⁷Ati amma iyyuu saba koo irratti ol of qabda malee gad isa hin dhiifne.

¹⁸Erga akkas ta'ee, ani kunoo bor yowwana cabbii baay'ee ulfaataa biyyi Gibxi erga beekamee jalqabee hamma ammaatti takkaa bu'ee hin beekne itti nan buusa!

¹⁹Egaa amma hojjetoota kee ergiitii horii kee, waan alaa qabdu hundumaas manatti galchisiisi! Namni, horiinis warri alatti argaman manatti utuu hin sassaabamin yoo hafan, cabbiin itti in bu'a, isaanis in duddu'u? jedhiitii itti himi!? jedhe.

²⁰Hojjetoota mootichaa keessaa warri isa Waaqayyo dubbate sodaatan hojjetoota isaanii fi horii isaanii mana manatti baqachiisan.

²¹Warri wanti Waaqayyo dubbate garaa isaanii hin rukutin hafe garuu, hojjetoota isaanii, horii isaaniis alatti in dhiisan.[43]

²²Waaqayyo ergasii Museedhaan, ?Guutummaa biyya Gibxii irratti, nama irratti, horii fi bineensa irratti, biqiltuu biyya sanaa hundumaa irratti cabbiin akka bu'uuf, harka kee gara waaqaatti ol qabi!? jedhe.

²³Museen ulee isaa gara waaqaatti ol qabe, Waaqayyo sagalee kakawwee dhageessisee cabbii in fide, bakakkaanis lafatti in bu'e; Waaqayyo biyya Gibxii irratti cabbii in roobsise*.

²⁴Cabbiin in bu'e; cabbicha baay'ee ulfaataa sana keessas balaqqeessa bakakkaatu ture; warri Gibxi saba ta'anii erga beekamanii jalqabee kan akkasii guutummaa biyya sanaa keessatti ta'ee hin beeku.

²⁵Cabbichi guutummaa biyya Gibxii keessatti nama, horii, bineensa, warra alatti hafan hundumaa in rukute; biqiltuu hundumaas rukutee, mukkeetii bakkee keessaas in caccabse.

²⁶Biyya Gooshen iddoo Israa'eloonni jiraatan duwwaatti cabbiin hin buune*.[44]

²⁷Mootichi immoo kana irratti Musee fi Aaronitti ergee waamsisee, isaaniin, ?Ani alana yakkeera, Waaqayyo qajeelaa dha, anii fi sabni koo garuu balleessaa qabna.

²⁸Waaqayyoon kadhadhaa! Sagaleen kakawwee Waaqayyo dhageessisu kunii fi cabbiin kun baay'ateera; ani gad isin nan dhiisa, isin si'achi as hin turtan? jedhe*.

²⁹Museen deebisee mootichaan, ?Mandaricha keessaa akkuman ba'een harka koo gara Waaqayyootti nan bal'isa, lafti kan Waaqayyoo ta'uu isaa akka beektutti kakawween in dhiisa, cabbiinis si'achi in dhaabata*.

³⁰Garuu atii fi hojjetoonni kee amma iyyuu Waaqayyo gooftaa akka hin sodaanne ani beeka? jedhe.

³¹Yeroo sana talbaan daraaree, garbuun immoo asheetee waan tureef, isaan cabbichaan in rukutaman.

³²Qamadii fi honboriin garuu gara booddee waan bilchaataniif oolaniiru.[45]

³³Museen mooticha biraa ka'ee mandaricha keessaa ba'ee, harka isaa gara Waaqayyootti in bal'ise; kakawwichi, cabbichis in dhaabate, bokkaan lafa irratti roobaa tures in caame.

³⁴Mootichi garuu bokkichii fi cabbichi, kakawwichis akka dhaabate yommuu arge, ammas itti dabalee in yakke; garaan mootichaa, kan hojjetoota isaas in jabaate.

³⁵Mootichi akkuma mata-jabeessa ta'etti in hafe; akkuma Waaqayyo afaan Museetiin dubbatee ture, Israa'eloota gad hin dhiifne*.[46]