Read west central oromo Macaafa Iyoob 15 Bible Online

Macaafa Iyoob 15 - west central oromo bible

Macaafa Iyoob 15

¹Yommus Eliifaaz Temaanichi deebisee,

²?Namni ogeessi beekumsa waa'ee hin baafneen deebii kennaa ree? Qilleensa ba'a-biiftuu isa gubaa garaa isaa in gutataa ree?

³Dubbii bu'aa hin qabneen, yookiis haasaa waa'ee hin baafneen in falmataa ree*?

⁴Ati garuu Waaqayyoon sodaachuu in dhiifte; irra deddeebitees waa'ee isaa yaaduu irraa in deebite.

⁵Yakki kee dubbii waan si barsiisuuf, ati akka warra haxxeetti dubbachuu fo'atte;

⁶dubbiidhuma keetu sitti farada, arrabuma keetus dhugaa si irratti ba'a malee, ana miti*.[50]

⁷?Nama lafa irraa hundumaa keessaa situ dura dhalatee ree? Ati gaarota dura uumamtee ree*?

⁸Akeeka Waaqayyoo isa dhokataa dhagesseettaa ree? Ogummaanis si'uma bira ga'ee dhaabatee ree*?

⁹Wanta nuyi hin beekne, maalfaa beekta? Wanta nuyi hin hubanne, maalfaa hubatta?

¹⁰Mataan isaanii harrii kan ta'e, warri lafa guuran, abbaa kee caalaa kan dulloomanis nu gidduu jiru.

¹¹Si jajjabeessuun Waaqayyo yookiis suuta jedhee sitti dubbachuun isaa sitti xinnaatee ree*?

¹²Yaadni kee maaliif si fudhatee sokka? Aariidhaanis iji kee maaliif boba'aa?

¹³Inni Waaqayyotti si aarsee dubbii jabaa akkasii si dubbachiise maali?[51]

¹⁴?Namni maali iyyuu qullaa'aa ta'uu danda'aa ree? Yookiis nama ta'ee kan dhalate maali iyyuu, qajeelaa ta'uu danda'aa ree*?

¹⁵Kunoo, inni qulqulloota isaa iyyuu hin amananne, bantiiwwan waaqaas ija isaa duratti qullaa'oo miti erga ta'ee*,

¹⁶egaa yoos inni yakka hojjechuu akka bishaanii dheebotu, hammam ciigga'amaa fi manca'aa haa ta'u ree?[52]

¹⁷?Ani wantan arge nan dubbadha, isas sitti nan hima dhaggeeffadhu*!

¹⁸Innis wanta namoonni ogeeyyiin abboota isaanii irraa fudhatanii, utuu hin dhoksinis dubbatanii dha.

¹⁹Lafti isaan duwwaadhaaf kennamee ture, ormis isaan gidduu hin linne.

²⁰Namni jal'aan guutummaa bara isaatii rakkinaan dadhabee in jiraata; nama nama sodaachisuufis bara muraasatu kaa'ameefii jira.

²¹Sagaleen nama naasisu gurra isaa irraa in iyya, utuu inni, ?Nagaa dha? jedhus saamtonni balaa isatti in buusu;

²²egaa billaan isa in eeggata, deebi'ee dukkana keessaa akka ba'us hin abdatu;

²³reeffi isaas irbaata allaattii in ta'a, badiisatti akka dhi'aates in beeka;

²⁴rakkinnii fi mudamni akka mootii lolaaf qophaa'eetti isa irra in ba'u, isa in naasisus*;

²⁵inni harka isaa Waaqayyo irratti waan ol fudhateef, isa hundumaa danda'u irrattis jabaa waan of fakkeesseef,

²⁶boqu-jabinaan gaachana isaa isa yabbuu fudhatee isatti in fiiga*.[53]

²⁷?Innoo fuulli isaa coomaan bobbokokeera, mudhiin isaas coomaan furdateera;

²⁸inni mandaroota diigaman, manneen namni keessa hin jiraanne, warra diigamanii tuulamuuf jedhan keessa in taa'a*.

²⁹Inni hin sooromu, badhaadhummaan isaa jabaatee hin dhaabatu; qabeenyi isaa hundee hin godhatu;

³⁰inni dukkana duraa hin ba'u, arrabni ibiddaa damoota isaa in gogsa, hafuura afaan Waaqayyoo keessaa ba'uunis fuudhamee in sokka;

³¹gatiin isaaf kennamu wanta waa'ee hin baafne waan ta'uuf, inni wanta waa'ee hin baafne amanachuudhaan of hin gowwoomsin*!

³²Yeroon isaa utuu hin ga'in in coollaga, dameen isaas hin lalisu;

³³inni akka muka waynii isa ija isaa isa hin bilchaatin hurgufatuu ti, akka muka ejersaa isa daraaraa isaa harcaafatuu ti.

³⁴Kutanni warra Waaqayyoon hin qabnee dhala hin godhatan, godoowwan warra gabbarsuu jaallataniis ibiddatu xaph godha.

³⁵Isaan garaatti hammina in yaadu, wanti yaada isaanii keessaa ba'us rakkina in fida; yaada isaanii keessatti gowwoomsaa in qopheessu? jedhe*.[54]