Read west central oromo Macaafa Iyoob 22 Bible Online

Macaafa Iyoob 22 - west central oromo bible

Macaafa Iyoob 22

¹Yommus Eliifaaz Temaanichi deebisee,

²?Namni Waaqayyoof bu'aa qabaa ree? Namni ogeessi illee ofii isaatiif bu'aa in argata;

³ati qajeelaa yoo taate, isa hundumaa danda'u in gammachiisaa ree? Karaa kee mudaa kan hin qabne yoo godhatte, inni waa in argataa ree*?

⁴Inni sababii ati isa sodaattuuf si ifataa ree? Sii wajjinis gara abbaa firdii in dhaqaa ree?

⁵Jal'inni kee guddaa dha mitii ree? Yakki kees dhuma qabaa ree?

⁶Ati akkasumaan obboleessa kee irraa qabsiisa fudhatte, warra qullaa adeeman irraas situ wayyaa baafate*;

⁷warra gaggaban bishaan hin obaafne, warra beela'anis midhaan in dhowwatte*.[74]

⁸?Lafti kan isa irree qabuu tii ree? Isuma ulfina qabutu isa irra jiraataa ree?

⁹Warra abbaan manaa irraa du'e harka duwwaa gad dhiifte, irree warra abbaan irra hin jirre immoo in caccabsite*.

¹⁰Kanaafis kiyyoon karaa hundumaa sitti naanna'ee jira, utuu itti hin yaadinis sodaan si rom'isiisa*;

¹¹ati akka arguu hin dandeenyetti ifni kee in dukkaneeffama, lolaan bishaaniis si in liqimsa.[75]

¹²?Waaqayyo, bantiiwwan waaqaa hundumaa ol jira mitii ree? Urjiiwwan ol fagoo jiran hundumaas gad in ilaala mitii ree*?

¹³Kanaaf ati, ?Waaqayyo maal beeka? Duumessa dukkanaa'aa keessaanis faraduu danda'aa ree*?

¹⁴Inni akka hin arginetti duumessi gobbuun isa golgee jira, inni immoo gubbee bantii waaqaa irra in adeema? jetta.

¹⁵Ati garuu karaa isa durii, isa namoonni hamoonni irra adeeman irratti haftaa ree?

¹⁶Isaan iyyuu yeroon isaanii utuu hin ga'in in balleeffaman; hundeewwan isaaniis lolaadhaan in haraman*.

¹⁷Isaan Waaqayyoon, ?Nu irraa fagaadhu! Inni hundumaa danda'us maal nu godha?? jedhan*.

¹⁸Haa ta'u iyyuu malee, isumatu mana isaanii waan gaariidhaan guute, kanaaf mareen warra jal'ootaa ana irraa haa fagaatu*!

¹⁹Warri qajeelonni balleeffamuu warra jal'ootaa arganii in gammadu, warri balleessaa hin qabnes ga'oodhaaf itti in kolfu*.

²⁰Isaaniinis, ?Dhugumaan hamajaajiin keenya lafa irraa badaniiru, wanta isaan irraa hafe immoo ibiddatu fixe? in jedhu.[76]

²¹?Waaqayyotti araarami, nagaatti jiraadhu! Kanaanis wanti gaariin siif in dhufa*.

²²Seera afaan isaa keessaa ba'u fudhadhu, dubbii isaas garaa kee keessa kaa'adhu!

²³Ati gara isa hundumaa danda'uutti yoo gara galte, deebitee in ijaaramta; ati jal'ina godoo kee irraa in fageessita*;

²⁴warqee biyyoo keessa, warqee Ofiiris kattaawwan bishaan keessaa gidduu yoo keesse,

²⁵inni hundumaa danda'u immoo warqee kee fi meetii kee isa gati-jabeessa yoo siif ta'e,

²⁶yommus ati isa hundumaa danda'utti in gammadda, yeelloo malees mataa kee gara Waaqayyootti ol in qabatta*.

²⁷Isa in kadhatta, innis siif in dhaga'a; ati immoo wareega kee in baafta*.

²⁸Wanti ati murtoo gootu dhaabataa siif in ta'a; ifnis karaa keetti in ifa.

²⁹Isa of gurguddisee baannatu Waaqayyo gad in deebisa, isa gad deebi'aa immoo in oolcha*;

³⁰inni nama balleessaa qabu iyyuu in oolcha; ati garuu sababii harki kee hin xuraa'iniif in oolta? jedhe*.[77]