Read west central oromo Macaafa Iyoob 30 Bible Online

Macaafa Iyoob 30 - west central oromo bible

Macaafa Iyoob 30

¹?Amma garuu warri na booddee ta'an anatti in kolfu, isaanis warra ani bara baay'eedhaaf abboonni isaanii saroota bushaayee koo eeganii wajjin akka hin teenyeef illee tuffadhee dha*.

²Abboonni isaanii kun, humni isaan ittiin hubatan erga irraa darbe, jabinni irree isaanii anaaf maal godha?

³Dhabaa fi beela irraa kan ka'e goganiiru, isaan lafa gogaa, onaa fi qoddii in qorqu.

⁴Biqiltuu lafa soogiddaa huuxxii wajjin in buqqifatu, hidda muka hadhaa'aas nyaata isaanii in godhatu.

⁵Namoota gidduudhaa baafamaniiru, namoonnis akka hattuutti isaanitti in iyyu.

⁶Fottoqaa lafaa keessa, kattaa gidduu, boolla lafaa keessas jiraachuun giddii isaanitti ta'e.

⁷Huuxxii keessaa akka harree in alaakan, huuxxii qoraattii jalatti walitti in tuuta'an.

⁸Ilmaan gowwootaa, ilmaan warra maqaa hin qabnee, biyya keessaa oofamaniiru.[96]

⁹?Ammas ani muka weedduu isaanii ti, muka mammaaksa isaaniis nan ta'e*.

¹⁰Isaan ana ciigga'anii anattii in fagaatu, fuula kootti tufuufis hin seesan*.

¹¹Waaqayyo fo'aa iddaa kootii laafisee, waan gad na deebiseef, isaan immoo wanta isaan ittisu fuula koo duratti of irraa in gatan.

¹²Gara harka koo mirgaatiin tuuta toora hin qabnetu ka'a, isaan miilla koo karaa irraa kaachisu, karaa isaanii isa badiisaas ana dura in kaa'u;

¹³isaan karaa koo in kutu, na balleessuudhaaf rakkina anatti in baay'isu namni isaan dhowwus hin jiru.

¹⁴Akka waan qaawwa bal'aa keessa darbaniitti in dhufu, ona caccabaa jalaanis gad in konkolaatu.

¹⁵Naasuun akka lollaatti ana irra ba'u, ulfinni koo akka waan qilleensi fudhateetti ana irraa in sokke; qabeenyi koo akka duumessaatti ana irraa in darba.[97]

¹⁶?Ammas lubbuun koo na keessaa ba'uuf jetti, guyyoonni rakkinaas na qabatan.

¹⁷Dhukkubni halkan lafee koo in ura, ana irraas in harcaasa; dhukkubni nyaataa koos ana hin dhaggeeffatu.

¹⁸Humna dhukkuba kootii isa guddaadhaan uffanni koo bifa bade, dhukkubni koo kun akka mormi kittaa nama qabutti na qabe.

¹⁹Inni dhoqqee keessatti na darbate, anis gad deebi'ee akka biyyoo fi daaraa nan ta'e;

²⁰yaa Waaqayyo, ani sittan iyyadhe, ati garuu anaaf hin deebifne; ani nan dhaabadhe, ati garuu calluma jettee na ilaalte*.

²¹Ati gara-jabinaan anatti gara galte, aangoo irree keetiinis na dhoofte.

²²Ati isas akkan yaabbadhu na goote, gara qilleensaatti ol na fuute, bubbee keessatti immoo na aate.

²³Gara du'aatti, gara mana warri jiraatan hundinuu itti wal ga'aniittis akka ati na geessitu anuu beeka*.[98]

²⁴?Haa ta'u iyyuu malee, warri hiyyeessonni rakkina isaanii keessatti, firdii dhugaadhaaf yeroo gara kootti iyyatan, ani ciqilee isaan irra dhaabbadhee beekaa ree?

²⁵Ani warra rakkina keessa jiraniif hin boonyee ree? Warra deegaadhaafis garaan koo hin gaddinee ree*?

²⁶Yeroo ani waan gaarii abdadhetti hamaatu dhufe, yeroo ani ifa eeggadhetti dukkanatu dhufe.

²⁷Yaaddoonii fi dhiphinni garaa koo in gube, takkaas gab anatti hin jenne, guyyoonni rakkinaas tarree galanii na dura jiru*.

²⁸Anis aduuttii fagaadheen gaddaa adeema, wal ga'ii keessa ijaajjees gargaarsaaf nan iyya.

²⁹Ani akka waangoo addaan baatee boossuu, akka guchii goromtii lafa duwwaa keessaas kopha-galeessa nan ta'e*.

³⁰Gogaan dhagna koo ana irratti gurraaca'e, lafeen koos ho'aan in gubate*.

³¹Kiraarri sirba koo sagalee boo'ichaatti, ululleen koos sagalee wawwaannaatti in geddarama.[99]