Read west central oromo Macaafa Iyoob 38 Bible Online

Macaafa Iyoob 38 - west central oromo bible

Macaafa Iyoob 38

¹Yommus Waaqayyo bubbee sana keessaa Iyoobitti dubbatee,

²?Inni dubbii beekumsa malee dubbatamuun, akeeki koo akka hin mul'anne godhu kun eenyu*?

³Ati ka'ii, mudhii kee hidhadhuu qophaa'i! Ani sin gaafadha, ati immoo anaaf deebisi*![135]

⁴?Yommuu ani hundee lafaa kaa'e, ati eessa turte? Hubannaa isaa yoo qabaatte anatti himi*!

⁵Beekta yoo ta'e, safara isaa eenyutu murtoo itti godhe? Yookiis eenyutu funyoo irra harkise*?

⁶Hundeen isaa maal irra dhaabame? Yookiis dhagaa isaa isa golee qajeelchu eenyutu dhaabe*?

⁷Yeroo sanatti urjoonni gara barii in faarfatan, warri waaqa irraa ?Ilmaan Waaqayyoo? jedhamanis guddisanii sagalee gammachuu in dhageessisan*.[136]

⁸?Yeroo galaanni cabsatee manii isaa keessaa ba'utti, balbala itti godhee kan isa ittisu eenyu ree?

⁹Yeroo ani duumessa uffata isaa, duumessa isa dukkanaa'aas wayyaa marata isaa godheef,

¹⁰daariis godheefii, balbala isaa fi danqaraa isaa itti kaa'ee,

¹¹?Hamma asiitti in dhufta, kana irra garuu hin darbitu; asitti bokoka dha'aa keetiitti ittisi in godhama? nan jedheen*.[137]

¹²?Ati erga dhalattee ganama abboomtee, bariin lafaas iddoo isaa akka baru gooteettaa?

¹³Akka inni garasii fi garanaan andaara lafaa qabee, warri jal'oonni irraa gad hurgufaman gooteettaa?

¹⁴Lafichi akka suphee jiidhaatti ittiin mallateessaniitti bifa in geddarate, uumamni isa irraa hundinuus bifa garaa garaatiin miidhagfamanii in mul'atu;

¹⁵ibsaan warra jal'ootaa isaan duraa in qabame, irreen isaanii inni ol fuudhames in cabe.

¹⁶?Ati burqituu galaanaa bira dhaqxeettaa? Gad fageenya galaanichaas qoruudhaaf keessa adeemteettaa?

¹⁷Balballi karra du'aa siif banameeraa? Karra iddoo dukkana sodaachisaa sanaas argiteettaa*?

¹⁸Bal'ina lafaa hubatteettaa? Kana hundumaa beekta yoo ta'e anatti himi![138]

¹⁹?Karaan lafa ifni jiraatutti geessu meerre? Dukkanni immoo eessa jiraata?

²⁰Ati gara daarii isaatiitti akka isa geessituuf, daandii mana isaas gargar baaftee akka hubattuuf eessa ree?

²¹Mee jedhi kaa! Atoo yeroo sana dhalatteetta, kanaaf in beekta; barri jireenya kees baay'ateera*![139]

²²?Ati gombisaa cabbii lixxee beektaa? Gombisaa qorraas argiteettaa?

²³Isa ani yeroo dhiphinaatiif, guyyaa lolaaf guyyaa waraanaatiif kaa'e sana*,

²⁴karaan ifni ittiin asii fi achi tamsa'u, qilleensi gara ba'a-biiftuu inni gubaan, ittiin lafa irra bittimfamus isa kam?

²⁵Eenyutu lolaa bishaaniif bo'oo, balaqqeessa kakawweefis karaa baase*?

²⁶Lafa namni hin jirretti eenyutu lafa onaa namni keessa hin jiraannettis bokkaa roobsee,

²⁷lafa gad dhiifamaa waa'ee hin baafne quubsa? Margi lalisaanis akka irratti biqilu godha?

²⁸Egaa bokkaan abbaa qabaa ree? Copha fixeensaa immoo eenyutu dhalche ree?

²⁹Cabbiin gadameessa eenyu keessaa ba'e? Qorra akka hurrii addaatu isa waaqa keessaa ba'us eenyutu dhale?

³⁰Yeroo bishaan wal qabatee akka dhagaa ta'u, irri callabboos yeroo qorru,

³¹tutee urjoota ?Torbii? jedhaman walitti hidhu, yookiis hidhaa urjoota ?Sadee? jedhamanii hiikuu in dandeessaa*?[140]

³²?Ati urjoota marsan yeroo isaaniitti in geggeessitaa? Urjii isa ?Amaaketa? jedhamu immoo ilmaan isaa wajjin karaa in argisiiftaa?

³³Abboommii bantii waaqaa keessa jiru beektaa? Seerrata isa keessaas biyya lafaa irra dhaabuu in dandeessaa*?[141]

³⁴?Lolaan bishaanii akka si liqimsuuf, sagalee kee ol fuutee duumessatti dubbachuu in dandeessaa*?

³⁵Ati, bakakkaan akka ba'uuf in ergitaa? Innis, ?Kunoo, ani asan jira? siin in jedhaa?

³⁶Eenyutu ogummaa iddoo dhokataa keessa kaa'e? Hubannaa immoo sammuudhaaf eenyutu kenne?

³⁷Eenyutu ogummaadhaan duumessoota lakkaa'a? Eenyutu qalqala bishaanii isa waaqa keessaa jigsee bishaan gad naqa?

³⁸Biyyoon lafaa akka jabaatu, supheenis akka dafee wal qabatu eenyutu godha?[142]

³⁹?Ati leenca dhaltuudhaaf nyaata ishee adamsitaa ree? Saafela leencaas beela in baaftaa ree?

⁴⁰Yeroo isaan walitti galanii mann'ee isaanii keessa jiranitti, iddoo ciisicha isaaniitti riphanii yeroo ciisanitti beela isaan in baaftaa ree?

⁴¹Yeroo cuuconni ishee waan nyaatan dhabanii asii fi achi jooranii, ana Waaqayyotti boo'anis, qurruudhaaf eenyutu nyaata kennaaf*?[143]