Read west central oromo Macaafa Iyoob 8 Bible Online

Macaafa Iyoob 8 - west central oromo bible

Macaafa Iyoob 8

¹Yommus Biildaad Shu'aahichi,

²?Hamma yoomiitti dubbii akkasii dubbatta? Dubbiin afaan kee keessaa ba'u akka qilleensa bubbisuu ti.

³Waaqayyo firdii in jal'isaa ree? Yookiis inni hundumaa danda'u dhugaa in jal'isaa ree*?

⁴Ilmaan kee isa yoo yakkan, inni immoo irra-daddarbaa isaaniif yoo isaan gate*,

⁵ati immoo Waaqayyoon yoo barbaadde, isa hundumaa danda'u yoo kadhatte,

⁶utuu ati qullaa'aa fi qajeelaa taate, inni dhugumaan amma si gargaaruudhaaf in ka'a, deebisees jireenya qajeelummaa si gonfa.

⁷Jalqabni kee gad deebi'aa yoo fakkaate iyyuu, dhumni kee immoo baay'ee guddaa in ta'a*.[25]

⁸?Dhaloota nu duraa gaafadhu! Wanta abboonni isaanii qoratanii bira ga'an ilaali!

⁹Nuyi kaleessa dhalanne, homaas hin beeknu, barri jireenya keenya lafa irraas akka gaaddisaatti dafee in darba.

¹⁰Isaanis hin barsiisanii? Sittis hin himanii? Garaadhaan waa sitti hin dubbatanii ree*?

¹¹Dhallaadduun lafa dhaqdhaqiitti malee guddachuu danda'aa ree? Babal'iinis bishaan malee in tolaa ree?

¹²Xobbeetti utuu jiranii utuma hin buqqa'in yookiis utuma hin haamamin marga caalaa dafanii in coolligu.[26]

¹³?Jireenyi warra Waaqayyoon irraanfatanii akkas in ta'a, abdiin nama Waaqayyo malee jiraatuus akkasuma in bada*;

¹⁴abdiin isaa in cita, amanannaan isaas akka mann'ee sariitii in ta'a;

¹⁵inni wanta akka mann'ee sariitii sanatti in hirkata, mann'een sun garuu hin dhaabatu; inni isatti in maxxana, mann'een sun garuu danda'ee isa hin baatu;

¹⁶inni aduu keessatti akka biqiltuu bishaan dhugee lalisuu ti, dameen isaas iddoo dhaabaa isaa irra in yaa'a;

¹⁷hiddi isaa tuullaa dhagaatti in marma, kattaawwan keessas karaa in barbaaddata;

¹⁸wanti tokko iddoo isaatii yoo isa balleesse, iddoon sun immoo, ?Ani takkaa si argee hin beeku? jedhee isa in gana.

¹⁹Kunoo, gammachuun jireenya isaatii isa kana, warri kan biraas lafaa in biqilu.[27]

²⁰?Kunoo, Waaqayyo nama hir'ina hin qabne hin gatu, warra hamaa hojjetan garuu hin gargaaru;

²¹inni ammas akka ati kolfa duwwaa taatu, arrabni kees sagalee gammachuu guddisee akka dhageessisu in godha.

²²Yommus warra si jibbanitti yeelloon in uffifama, dunkaanni warra jal'ootaas si'achi hin argamu? jedhee in deebiseef*.[28]