Read west central oromo MACAAFA FAARFANNAA 102 Bible Online

MACAAFA FAARFANNAA 102 - west central oromo bible

MACAAFA FAARFANNAA 102

¹Yaa Waaqayyo, kadhata koo anaaf dhaga'i, iyyati koos si bira anaaf haa ga'u!

²Guyyaa rakkina kootti, ati fuula kee achi ana irraa hin qabatin! Gurra kee gara kootti qabi, yeroo ani si waammadhuttis, dafii anaaf deebisi*![349]

³Barri koo akka aaraatti in darba, lafeen koos akkuma iddoo ibiddaa in guba;

⁴garaan koo madaa'ee akka margaa waan collageef, buddeena koo nyaachuu nan dadhaba.

⁵Sababii ani guddisee aaduuf, foon koo lafee kootti goge.

⁶Ani haadha-gaayyee ishee lafa onaa keessaa nan fakkaadhe, akka hurunguu lafa waa diigamees nan ta'e.

⁷Akkuman ilaaletti nan bula, ani akka simbira kopha-galeettii ishee bantii manaa irra jirtuu ti.

⁸Diinonni koo guyyaa hundumaa anatti ga'isan, warri na doorsisanis maqaa koo maqaa abaarsaa godhatan.

⁹Ani daaraa akka buddeenaatti nan nyaadhe, imimmaanis waanan dhugutti nan makadhe.

¹⁰Aarii kee fi dheekkamsa kee irraa kan ka'e, ati ol fuutee gad na darbatteetta.

¹¹Guyyoonni koo akka gaadidduu gabaabbachaa adeemuu ti, anis akka margaa nan coollaga.

¹²Ati garuu yaa Waaqayyo, bara baraan teessoo kee irra jirta, seenaan kees dhalootaa hamma dhalootaatti in yaadatama.

¹³Ati in kaata, Xiyooniifis garaa in laafta, yeroon dhaaba sanaa waan ga'eef, yeroon kun yeroo ati araara isheetti argisiiftuu dha.

¹⁴Garboota keetiif dhagoonni ishee iyyuu gatii qabu, hurraa'aan isaas garaa isaanii in moogessa.

¹⁵Yommus sabni lafa irraa maqaa Waaqayyoo, mootonni lafaa hundinuus, ulfina kee in sodaatu.

¹⁶Waaqayyo Xiyoonin deebisee yommuu ijaaru, ulfina isaatiin in mul'ata*.

¹⁷Inni gara kadhata warra harka duwwaa hambifamaniitti in gara gala, himata isaaniis hin tuffatu*.[350]

¹⁸Sabni amma illee hin dhalatin jiru goofticha akka jajatutti, kun dhaloota dhufuuf haa caafamu.

¹⁹Waaqayyo iddoo isaa isa qulqulluu ol gara irraa sanaatii gad in ilaala, bantii waaqaa keessaas gara lafaa in ilaala.

²⁰Inni aadnaa warra hidhamanii dhaga'uu, warra du'i itti murames gad dhiisisuu in barbaada*.

²¹Namoonni maqaa Waaqayyoo Xiyoon keessatti, jajuu isaas Yerusaalem keessatti in labsu.[351]

²²Kunis yeroo sabni hundinuu walitti qabaman, mootummoonnis Waaqayyoof hojjechuudhaaf wal ga'anii dha*.[352]

²³Utuu ani iddoo hin ga'in, inni humna koo cabseera; bara koos gabaabseera.

²⁴Ani immoo, ?Yaa Waaqayyoo ko, yaa isa waggoonni kee dhalootaa gara dhalootaatti darbanii, walakkaa bara kootiitti ana hin fudhatin!? nan jedhe*.[353]

²⁵Bara duriitti ati hundee lafaa in keesse, bantiiwwan waaqaas hojii harka keetii ti.

²⁶Isaan baduuf jiru, ati garuu haftee in jiraatta; isaan hundinuu akka uffataa in ciccitu, ati akka uffataatti baaftee isaan in gatta, isaanis in dhidhimu!

²⁷Ati garuu isuma sana, waggoonni kees dhuma hin qaban*.

²⁸Ijoolleen garboota keetii mana godhatanii in taa'u, sanyiin isaaniis fuula kee duratti jabaatanii in dhaabamu.[354]