Read west central oromo MACAAFA FAARFANNAA 103 Bible Online

MACAAFA FAARFANNAA 103 - west central oromo bible

MACAAFA FAARFANNAA 103

¹Waaqayyoon ulfinaan jajadhu, yaa lubbuu ko, keessi namummaa koo guutummaatti maqaa isaa isa qulqulluu haa eebbisu!

²Waaqayyoon ulfinaan jajadhu, yaa lubbuu ko, wanta gaarii inni godhe hundumaas hin irraanfatin*!

³Inni yakka kee siif in dhiisa, dhukkuba kee hundumaattiis si fayyisa*;

⁴Jireenya kee awwaalamuu in oolcha, gaarummaa fi oo'a si gonfa*;

⁵inni jireenya kee waan gaariidhaan in quufsa, dargaggummaan kees haara'ee akka joobiraa in taata*.[355]

⁶Waaqayyo qajeelummaa in hojjeta, warra cunqurfamaniifis firdii qajeelaa in baasa.

⁷Inni karaa hojii isaa Museetti, gocha isaas ijoollee Israa'elitti in beeksise*.

⁸Waaqayyo oo'a-qabeessaa fi araara-qabeessa, aariitti suuta in jedha, gaarummaan isaas guddaa dha*.

⁹Inni si'a hundumaa dubbii gad hin kota'u, bara baraanis akka dheekkametti hin hafu*!

¹⁰Akka cubbuu keenyaatti nu irratti hin hojjetu, akka yakka keenyaattis nutti hin deebisu.

¹¹Bantiiwwan waaqaa lafa irraa fagaachuun isaanii guddaa akka ta'e, gaarummaan Waaqayyoos akkasuma warra isa sodaataniif guddaa jabaa dha*.

¹²Ba'i-biiftuu lixa-biiftuutii akka fagaatu, innis irra-daddarbaa keenya nuttii in fageessa;

¹³abbaan ijoollee isaatiif akka garaa laafu, Waaqayyos akkasuma warra isa sodaataniif garaa in laafa*.

¹⁴Akka nuyi itti hojjetamne inni in beeka, biyyoo ta'uu keenyas in yaadata*.[356]

¹⁵Barri namaa akkuma margaa ti, akka daraaraa bakkees in daraara;

¹⁶yeroo qilleensi itti qilleensa'u, inni achii in dhabama; iddoon isaas deebi'ee hin beekamu.

¹⁷Gaarummaan Waaqayyoo garuu baraa hamma bara baraatti, warra isa sodaataniif, qajeelummaan isaas ijoollee ijoollee isaaniitiif itti in fufa*;

¹⁸warra kakuu isaa eeganii, abboommii isaa raawwachuudhaaf yaadataniifis in ta'a.[357]

¹⁹Waaqayyo teessoo isaa bantiiwwan waaqaa keessa dhaabbateera, mootummaan isaas waan hundumaa irratti gooftummaa qaba.

²⁰Isin ergamoonni isaa warri waaqa irraa, isin jagnoonni jajjaboonni warri sagalee dubbii isaa dhaggeeffattanii, ajaja isaa raawwattan, Waaqayyoon ulfinaan jajadhaa!

²¹Isin macci isaa hundinuu, isin hojjetoonni isaa warri fedha isaa gootan, Waaqayyoon ulfinaan jajadhaa!

²²Wanti inni uume hundinuu, mootummaa isaa keessaa iddoo hundumaatti, Waaqayyoon ulfinaan jajadhaa! Waaqayyoon ulfinaan jajadhu, yaa lubbuu ko!