Read west central oromo MACAAFA FAARFANNAA 104 Bible Online

MACAAFA FAARFANNAA 104 - west central oromo bible

MACAAFA FAARFANNAA 104

¹Yaa lubbuu ko, Waaqayyoon ulfinaan jajadhu! Yaa Waaqayyo gooftaa ko, ati maal maal guddaa dha! Ati surraa fi simboo uffatteetta.

²Ati ifa akka uffataatti ofitti marte, bantiiwwan waaqaas akka dunkaanaatti diriirsiteetta*.

³Ati utubaa mana kee bishaan gubbaa in dhaabde, duumessoota konkolaataa kee godhatte, qoochota qilleensaatiinis in adeemte*.

⁴Ati qilleensota warra ergaa kee adeeman, balaqqeessa ibiddaas warra siif hojjetan godhatte*.[358]

⁵Ati lafa hundee isaa irra dhaabde, innis yeroo hundumaa baruma baraan iddoo isaatii hin butatu*.

⁶Callabboo durii durii akkuma wayyaatti isa irra in diriirsite, bishaanonni tulloota gara irraa darbanii in dhaabatan.

⁷Yommuu ati ifatte in baqatan, sagalee kakawwee kee yommuu dhaga'anis na'anii in fiigan.

⁸Isaan tullootatti ol ba'anii kan turan, dachaatti gad deebi'anii, gara iddoo ati isaaniif keessees in dhaqan.

⁹Ati daarii isaaniif dhaabde, isaanis isa irra hin darban, lafa irra diriiruuttis hin deebi'an*.[359]

¹⁰Yaa'onni dachaa keessaa akka ba'an goote, isaanis tulloota gidduu in yaa'u.

¹¹Bineensonni caakkaa hundinuu isaan in dhugu, harronni diidaas isaanitti dheebuu in ba'u;

¹²simbirroonni qilleensa keessa balali'anis, isaan biratti mann'ee isaanii in ijaarratu, damee mukeetii gidduudhaas sagalee isaanii in dhageessisu.

¹³Iddoo buufata kee isa gara irraa sanaa, tulloota bishaan in obaafta, ija hojii kee kanaanis lafti in quufti.

¹⁴Horiidhaaf margi akka biqilu in goota; namnis ittiin haa hojjetuuf, lafa irraas midhaan akka argatuuf biqila in laattaaf.

¹⁵Wayniin garaa namaa akka gammachiisuuf, fuulli dhadhaadhaan akka calaqqisuuf, buddeennis namaaf humna akka ta'uuf in goota.

¹⁶Mukeetiin Waaqayyoo mukeetiin gaatiraa Libaanon, warri inni dhaabbate bishaan baay'ee in argatu

¹⁷simbirroonni isaan keessatti mann'ee in ijaarratu, allaattiin hawaannisaas birbirsa irratti in galu.

¹⁸Tulloonni dhedheeroonni kan qelejjee ti, holqi dhagaas lafa osoleen kooluu itti galtuu dha.

¹⁹Ji'a gargar baasuuf baatii situ uume, biiftuunis yeroo lixa ishee in beekti*.

²⁰Ati dukkanaaf yeroo in laatte, innis halkan; yeroo sanattis bineensonni caakkaa hundinuu lo'anii in ba'u.

²¹Leencoliin saafelli wanta adamsaniif in aadu, yommus nyaata isaanii Waaqayyo biraa fedhuu isaanii ti*.

²²Yeroo biiftuun baatu immoo isaan iddoo isaaniitti in deebi'u, mann'ee isaanii keessas in ciciisu.

²³Namni immoo gara jiruu isaatti in ba'a, hamma galgalaattis hojii isaatti in dadhaba.[360]

²⁴Yaa Waaqayyo, wanti ati hojjette maal maal baay'ee dha! Wanti ati uumte laficha guuteera; isaan kana hundumaas ati ogummaadhaan hojjette*.

²⁵Kunoo, galaanni guddaanii fi bal'aan achi jira, bineensonni xinnaa fi guddaan, wanti lakkoobsa hin qabne isa keessa in munyuuqa.

²⁶Isa keessa markaboonni in adeemu, lewaataan bineensi akka jawwee inni ati achi keessa haa taphatuuf tolchite achi jira*.[361]

²⁷Soora isaanii yeroo ta'utti akka isaaniif laattuuf, isaan kun hundinuu si biraa in eeggatu.

²⁸Yeroo ati isaaniif laattu, isaan walitti in qabatu; yeroo ati harka kee diriirsituuf, isaan wanta gaarii in quufu*.

²⁹Yeroo ati isaan irraa achi gara galtu, isaan na'anii abdii in kutatu; yeroo ati hafuura isaan baafatan keessaa fuutu, isaan in du'u, deebi'aniis biyyoo in ta'u*.

³⁰Yeroo ati hafuura kee itti ergitu immoo, isaan in uumamu; ati immoo irra-lafaa in haaressita*.[362]

³¹Ulfinni Waaqayyoo bara baraan haa jiraatu, Waaqayyo waan hojjetetti haa gammadu!

³²Inni ilaalchaan lafa in rom'isiisa, tuquu isaatiinis tulloota keessaa aarri in ba'a.

³³Ani jireenya koo guutuu Waaqayyoof nan weeddisa, hamman jiruttis sagalee mi'aa dhageessisee, Waaqayyoon nan faarfadha.

³⁴Gad fageessee itti yaaduun koo isatti kan tolu haa ta'u! Ani Waaqayyotti nan gammada.

³⁵Cubbamoonni lafa irraa haa dhuman, jal'oonnis si'achi hin argamin! Yaa lubbuu ko Waaqayyoon ulfinaan jajadhu! Waaqayyoon jajadhaa!